Entrevista ekstenso ku Raffy Jozefa un dje grandinan di Beisbòl di Kòrsou Antia

Entrevista ekstenso ku Raffy Jozefa un dje grandinan di Beisbòl di Kòrsou Antia

WILLEMSTAD- Djasabra 8 di òktober 2022 den oranan di mainta Deporte Kòrsou a risibí e tristu notisia ku Rafael Fernando Jozefa, mihó konosí komo Raffy a bai sosegá. Sin duda un entre e mihó 5-nan den historia di Beisbòl na Kòrsou , Aruba, Antia i region.  Djadumingu 16 di òktober 2022 lo hiba Raffy Jozefa na su último lugá di sosiegu. Nos ta bai reprodusí un entrevista profundo ku nos a tene ku Raffy na febrüari 2002.

Revista Deportivo Kòrsou ku awor www.deportekorsou.com tabatin un sekshon hopi gusta ku ta Deportista Destaká. Un sekshon hopi gusta bou di nos lesadónan kaminda nan por a sera konosí ku e deportista i dirigente ku a destaká den pasado òf ta destakando ahinda.
Nos a dediká atenshon na Rafael Raffy Jozefa, pelotero ku poder ekstra ordinario un di esnan mas grandi di Kòrsou i den regio.

RAFFY
Rafael Fernando Jozefa, a nase na Aruba dia promé di mart 1950, Raffy manera nan ta yamé kariñosamente  tempu ei (na 2002) tabatin 31 aña kaba na UTS i ta biba na Kaya Krisokola 63.
Raffy ta kasa ku Myris Jozefa-Zimmerman i tin dos yu Michèlle (44) i Rafael (37).
Raffy a splika nos ku su kasa i su yu muhe nunka no a hasi deporte, mientras e yu hòmber Rafael ta sigiendo pasonan di su tata. Ela hunga beisbòl for di den Liga Vruminga te den Liga Hubenil i Dòbel A.
Tata di Raffy Jozefa yama Ruben Newton alias Big Jim i su mama Madelene Jozefa – Illidge (QEPD) Raffy a splika ku su mama a fayesé na 1999.
“Mi tata tabata hunga beisbòl, mi mama tabata hunga sòftbòl, kòrfbal i tambe kricket.
Mi yu ta lora ku basketbòl i pin pòn pero ta beisbòl e gusta.

‍

KOMIENSO
Mi a kumikuminsá ku beisbòl ofishal ku 11 aña, mi a kuminsá den un ekipo ku yama US Cats NA Aruba, e tempu ei Webster ku Elias Kock nan aki tabata hunga. Mi a hunga ku un reportero hopi konosí na Aruba ku ta Kadochi Kock. Nos a hunga beisbòl den mesun tim na Aruba.
Despues mi a bai den un tim ku yama Super Cleaning. Asina ei mi a hunga mi dos añanan den beisbòl Senior League tambe. Di Senior League mi a sali bai A-klas siendo mi por a hunga un aña den Senior League ahinda. Den e aña ei, mi tabata ya kaba ku 15 aña den e pre-selekshon di Dòbel A. Mi a kai afó si ora mester a forma e tim. Mi tabata e úniko mucha den e tim.
Mi a hunga dos aña den A klas ku e tim di Heineken. Despues mi a hunga dòbel A tres aña ku Heineken te ku aña 1969. Mi ta orguyuso di por bisa ku mi a hunga den e promé ekipo di Aruba ku a gana Kopa Antiano esei tabata na aña 1967.

‍
Mi a kuminsá hunga outfield despues mi a bai primera, despues mi a keda outfield/primera. Na Kòrsou mi a kuminsá hunga outfield den Bridgestone despues mi a bai primera. Ei nan a nami e nòmber di Stofzuiger. E kosnan ei ta treining nan ta.
E hende ku a yuda mi hopi den e kos ei tabata Harold Koeiman. Ora nos kaba di kalentá e tabata tira pikonaso di distansia kòrtiku pami i mi tabata kue, kue, kue pikonaso i despues mi  kuminsá dominá den kuementu di pikonaso. Mi a keda trein apesar ku mi tabata dominá e kos ei. Andres Jones tambe tabata tira algun bala pami.
Mi keda trein e kos ei te dia mi stòp di hunga. E kos ei ta treining treining i mas treining.
Mi tin ku bisa bo ku for di den Little League mi a kuminsá destaká, e poder si a bini den Senior League.
Mi a hunga vòli, basket i sòftbòl. Vòli na nivel di selekshon di Aruba. For di na skol mi a hunga vòli. Mi a hunga den e ekipo di Don Bosco di Aruba huntu ku rumanan Leisner i rumannan Jones (Steve i Junny ruman di Andres Jones, tata di Andruw).

‍
Mi a biba na Aruba te ku aña 1970. Mi a bin Kòrsou via Marcel Brigida. Dor ku ami ku ne tabata hunga den selekshon di beisbòl. Na Kòrsou Marcel a bisami bin trein ku nos. Mi a bise ku no por pasobra mi no tin nada di trein, esta wante, sapatu di bala ets.
Atardi promé ku Marcel bin buska mi ya Wilfrido Valeriaan tabata na mi kas. Mi a bai trein ku nan, nan a papia ku mi. Nan a bisa pa mi keda mi a bisa nan ku e kos ei no ta bai asina, mi mester papia ku mi mama promé.
Mi a yama mi mama mi a puntré, ela bisa mi tami mester sa. E ora ei mi a bai Aruba i bini bèk pa keda. Dia mi a bin Kòrsou mi a legumai, vòli, basket i sòftbòl. Dia mi a drenta Kòrsou mi a drenta Bridgestone ku awor ta Royal Scorpions.
A tim tabata Firestone promé, despues ela bira Bridgestone despues ela bira Kentucky Fried Chicken, Royal Scorpions Mr. Baseball.

SIFRASNAN
Raffy Josefa a sali kampion bate na 9 okashon den dòbel A. Den mas o ménos 18 pa 19 aña ku e super pelotero aki a hunga. Na 5 okashon Raffy Josefa a gana tripel korona, un hazaña inkreíbel. E lideratonan den homerun Raffy no ta kòrda.
Raffy: “Mi no ta kòrda kuantu biaha mi a sali kampion homerun. Segun mi ta mas ku 9 sí, mas biaha ku mi a sali kampion bate. Mi tin ku bai chèk e sifrasnan mi no ta kòrda for di kabes.
Spit tambe mi tabatin mi tabata roba base tambe. Dia mi a bin for di Aruba mi ta dal un rolling den kuadro kore yega safe na primera, komo infielder bo no ta saka mi out fásil. 1975 bin ariba mi pia a kibra i for di e dia ei mi a keda hunga ku dolo strit. Mi ta subi vèlt hunga i niun hende no sa ku mi tin dolo. Mi a sigi trein normal.”

ROYAL SCORPIONS
Promé aña di Raffy na Korsou di e ekipo di Ford nan bira kampion. Blue Hawks a bira kampion e aña ei. “Nos a bira kampion 71, 72, 73, 1974  i 75 nos a bira supkampion. E aña ku nos a bira kampion atrobe tabata 1979. Semper nos tabata entre kampion i sup-kampion. 1980 nos a hunga un par di wega den Stadion di Rif despues nos a bai Sentro Deportivo Kòrsou.
Mi ta kòrda play-off final 1979 kaminda nos tabata atras den e serie 2-0 ku chèns di pèrdè e seri 3-0, Chape Bernardus ta dal un ròllin pa shòrt ku Richenel Daal ta pifia riba dje ayó Wild Cats, i einan nos ta krese i gana 3 wega strit pa bira kampion ku Keller den nos tim.
E dia si mi a spanta pasobra mi no por a imaginami ku Scorpions tabatin dje tantu fanátiko ei. Un fanátiko te den e mastnan di lus ariba aya ku un bandera ku Jones skibi riba dje. Hopi great e aña ei. Andres Jones tabata den forma. Pa mi e mihó pelotero di tur tempu na Antia. Mi konosé Andres hopi tempu nos a lanta huntu den San Nicolaas e tin un par di aña mas grandi ku mi pero mi tabatin e plaser di mira e mener aki djaserka. Tremendo pelotero i tremendo persona.

‍
Un señora a bisa mi pa kompará Andruw i Andres ‘Henry’ Jones. Mi a bisa ku Henry Jones ta mihó atleta ku Andruw. Mi a mire hunga beisbòl, basket, vòli futbòl den tremendo forma tur e deportenan aki den e mihónan.
Andres Jones ta kore masha duru mes, meskos ku su yu Andruw sin ‘hustle’ masha.
Andres ta kore un bala riba un suave bayendo patras di banda mas duru ku kualke hungadó ku ta koriendo bai patras di frente, ku kara. Algu inkreíbel. Andres ta hunga aden gewon pero bo no por bañé fasil. E yu tin mas power ku ne pero pa bati si e tata ta mihó.
1980 nos a pèrdè bira supkampion i 1981 nos a bira kampion atrobe. Ye Zimmerman, Rudson Roberto, Raymond Zoerka, ets. tabata den tim. Pa mi e aña ei tabata di Rudson Roberto e mucha hòmber ei a subi dòbel A i hasi dòbel A di dje. Tira masha bon mes i hasi Scorpions kampion. E tabatin un bala ku ta kibra bai afo”, Raffy a konta nos 20 aña pasá.

RIVAL FUERTE/KOSNAN MEMORABEL
“Mi a respetá tur hende komo batiadó, un hòmber ku na bate den bo mas por hasi bo tim daño. Mi tabata problema ku Yubi Mercelina. Su forma di tira tabata kompliká. E tabata na bo lomba e tabata tira e bala from nowhere. Mi no tabata gues muchu pero Yubi tabatin hopi éksito kontra di mi.
Mi a yega i ‘gues’ algun biaha i mi a dal e bala masha leu mes. Mi a gues Reumert Monte, George Brown mi a gues un lansamentu. Na Santo Domingo mi no a gues nan a redanan mes.
Na Santo Domingo i esun di Reumert Monte a bai masha leu mes. Esun ku mi a gues di Reumert a sali for di Stadion den SDK den Senter Right. Mi mes a spanta e dia ei, pafo di Stadion. Ela tira mi un rekta aden, strike, bolbe tirami un rekta aden, mi a pidi time. Mi no a para mes un serka di e plato e bala a bolbe bin rekta aden i mi a konekté leu den senter right for di stadion.
E otro homerun leu di guess tabata na Santo Domingo na 1986 hungando kontra Santo Domingo promé wega mi a tende e manager ta bisa e gai tira kurva. Mi a saka e bala pafo di stadion den senterfield. Un batiadó so, un Merikano so a yega di saka e bala ei dje leu ei.

‍

‍
Otro kos ku mi ta kòrda ku den e final di aña 1985 mi a bai hunga ku pia malu den un final kontra Santa Rosa. Andres Jones ku tabata kasi retirá a bin remplasá mi ela bisa mi e no por. Mi a bisa Djo Djo Wilsoe ku tabata manager di Scorpions e tempu ei ku mi no por. Mi por a bati so mi no por a kore. Mi a bai tòg, mi ta kòrda ku mi a bati homerun kontra Papito Stewart i pa kolmo ku a pia malu ei skor e kareda di gana pa Scorpions bira kampion.
Hungadónan bon ku mi a hunga kontra dje i den tim huntu ku nan. Andres Jones, tremendo, Defuntu Willy Pietersz, super, Keller, bon picher bon batiadó, Fichi tremendo batiadó i fileado, Nato bon hitter bo faya e ta bati hit fásil pa right,  Lipo Elhage hopi forsa mes, Philip ta bon mes, Philip ta pone e picher tira strike, Wenny Jacoba bon hungadó.
Papiando di dòbel A, tempu mi a subi dòbel A na Aruba mi no tabata hunga tur dia i tin wega mi tabata sali for di wega saliendo batiendo di 2-2.
Mi a yega sali kampion bate di Kopa Antiano den mi promé aña den dòbel A empatá ku Willy Pietersz, di dos den kareda empuhá tras di Willem Spanner.
Mi a yega di bati hopi riba .400 mi a yega di bati .485.Mi a yega di bati .400 i no sali kampion bate.  Mi a sali hungadó mas valioso na mas ku 4 okashon

1979
Mi mihó aña den beisbòl. Mi a gana triple korona sali MVP. Mi a kibra mi mes rèkòrt di homerun. E rèkòrt  di mi mes tabata 11. Mi a bati 16 homerun den e temporada ei den 24 wega. E aña ei kompletu mi tabata un hit pa mi bati .500 overall. Mi a konektá 23 homerun e aña ei kontando play-off ku Kopa Antiano ets. aden. Mi a gana tripel korona den Kopa Antiano tambe. Kontra Marlboro tambe e aña ei, mi a bati un homerun kontra Ron Stewart ku a dal riba waya bin paden. Tabata un homerun bisto pero umpirenan no a mire sino lo mi a kaba aña ku 17.
E nòmbernan ‘Stofzuiger i tambe Poder’ ta Orlando Cuales a bini ku nan.
Mi ta kòrda tambe ku mi tabata kue un drive di dal 10 homerun den lapso di tres siman. Despues e ta baha e ta bira unu den algun dia despues e ta bolbe subi atrobe.

SELEKSHON
For di mucha Raffy Josefa ta biahando ku selekshon. “Den Hubenil mi a bai ku un selekshon ku tabatin Eddie Ras, Elias Kock, Richard Simmons, Fio Webster, tremendo selekshon.
Mi a forma parti di tur selekshon for di dia mi a hunga beisbòl. Mas o menos na aña 1982 òf ta 83 mi a keda for di un selekshon Panamericano di kual Aruba tabata base i nan a laga mi afó. Voor de rest tur selekshon mi a hunga. Den mi último aña mi a bai ku selekshon komo coach.
Mi a yega di sali kampion bate den selekshon 1972 na Haarlemse Honkbalweek. Na 1986 mi a sali mihó hungadó amateur na Santo Domingo.
Nos a puntra Raffy Josefa tokante di batimentu pafó. Tabatin hopi papia ku Raffy no tabata bati ora e bai afó ku selekshon.

‍
Raffy::Ta bo ta promé hende ku ta puntra e kos ei. Berdat den kuminsamentu tabata bai malu. Mi a analisá mi mes kiko mi problema tabata. Mi a bin saka afo i ela drecha.
Aña 68 mi a bai Hulanda ku Italia, na 69 mi a bai Santo Domingo a bai basta bon. Na 71 mi a bai Cuba. Mi problema mas grandi tabata, ku mi tabata trata di hasi mas ku mi por. Tur biaha ku ma bai afó mi tabata trata di hasi mas ku mi por. 1972 mi a bai Haarlemse Honkbalweek mi a sali kampion bate. Despues nos a bai honkbalweek un biaha mas,faltando un wega, Faltando un wega mi tabata di dos den bateo. Na Indianapolis mi tabata den e promé diesnan. Na Santo Domingo 86 mi a bati bon 80 piku na Cuba mi a tabata kimando e liga faltando dos tres wega. Mundial na Cuba mi a sali entre e lidernan den doblete. Mi promé dos tres añanan mi a hunga malu. Mi kera demonstrá ken mi ta i mi no a logra.
Beisbòl di antes i awor ta fásil. Antes nos tabata trein hopi tur dia. Mi tabata hunga den Scorpions i mi tabata trein tur dia trein ku Scorpions. Mi tabata bai tempran tereno di Suffisant ku mi bate i wante ku bala mi so bai trein. Tin hende por a bisa ku ta loko mi mester ta nos tabata trein mes”, Raffy Jozefa ta konta nos e tempu ei  for di su kas na Kaya Krisokola.

HOBI
“Deporte en general. Mi gusta sport en general, mi gusta tur sport ku tin i mi ta altanto di tur. Mi hòbi sí aworaki ta golf. Tur wikènt mi ta golf. Si bo no a bin entrevista mi aworaki lo mi tabata riba kancha di golf.” Raffy ta sigi konta.

OTRO KOSNAN
Raffy: “Mi plato faborito ta bakiyou, ku batata dushi ku su yams, ku su domplin ku e kosnan ey. Pa loke ta outo mi outo preferí ta Cadillac. Si mi tabata por lo mi a kumpra un Cadillac. Mi ta kere lo mi logra unu si. Mi ta un hende ku ta biba manera mi por mi no ta forsa bara niun kaminda. Lokual mi por affort mi ta hasi lokual mi no por affort mi no ta hasie. Mi por affort un Cadillac for di aworaki pero tin otro kos ku tin prioridat.”

BON EKSPERENSIA
“Den Deporte ? Bon eksperensia hungando deporte mi a siña konosé mi mes i konosé hende. I mas siña kiko ta union, kiko ta berdat di kolega den deporte ku gusta e wega. Bo ta mira kiko abo ta duna i kiko nan ta duna pa sali ku lo máksimo. Deporte ta i tabata bon pami”

MAL EKSPERENSIA
Raffy: :Un kampionato Centro Americano i Del Caribe na Cuba. Mi tabata way out. mi no tabata konta mes. Promé biaha den mi bida ku nan a pone mi banki i nan a ponemi ku nan rason tambe. Mi no a reklamá niun hende nada. Mi a sinta apoyá manera mester ta. Mi tabata malu malu, nada no tabata bai bon.”

AWORAKI
(E tempu ei na aña 2002) “Mi a stòp beisbòl veterano, mi ta stòp ku sòftbòl tambe. Wak mi a hunga beisbòl hopi aña ku hopi dolo di pia, na mi enkel vooral. Mi stòp di hunga beisbòl i mi a keda hunga sòftbòl i algu di beisbòl veterano. Pa mi sigi hunga ku doló na e edat aki no ta bala pena. Mi ta preferá sinta wak mi yu hunga, wak Andruw tur dia na television, anto dibertí mi mes ku mi golf. Si liga 50 sòftbòl tabata anochi lo mi a bai. Un kos ta yamer ku mi yu no a mira hunga beisbòl. Dia mi a stòp di hunga beisbòl e tabatin 3 pa 4 aña. Nunka mi no a pushá den beisbòl tampoko e kos a bai dimes. Mi yu muhe si a mira hunga beisbòl den forma.
By the way mi ta skout pa Atlanta Braves. skout mes no Bird Dog. Bird Dog ta un trahado di skout. Mi no a firma niun hende ahinda pasobra ami no ta kere den manda mucha Venezuela i Santo Domingo ku eseinan. Mayoria di e muchanan ku a bai try-out ku mi a firma ku otro ekipo.

‍

‍
Mi tin gana di yuda den beisbòl si. Pero mi mester tin mas tempu, Mi ta gradisí mi kasa masha hopi mes ku e tabata banda di mi i soportami. Mi ta trein tres biaha pa siman i tin wega tambe ke men henter siman riba tereno. Mi ta yega kas atardi i sali bai lage so ku e muchanan. Ora tin wega tambe bo ta sali stadion bo ta yega kas pero bo no por drumi. Bo ta yega kas kansa i drumi te banda di 2’or i bo tin ku lanta 5’or di marduga. Ami ta lanta 5’or pasobra na mi kas ami ta drecha desyuno. Mi kasa ta kushiná, mi ta hopi kontentu ku e sosten ku ela dunami durante añanan” Raffy ta splika Revista Deportivo Kòrsou.

MENSAHE
Raffy: “Esnan den deporte. Si bo ke bira un bon deportista bo tin ku praktika anto praktika bon, serio. Esnan ku ta trein e muchanan. Trata di siña e muchanan di e forma korekto. Mi no ta bisa ku tin hende ta hasi mal trabou, pero komo tékniko trata na sa mas tantu posibel di e wega. Siña e wega korekto, siña e mucha filea un bala korekto, tira un bala korekto. Hasi tur kos manera mester ta.
Esnan pafó di deporte komo fanátiko, bai wega, stimulá e hungadónan no papia malu di hungadó. Hungadó riba un vèlt no ta hasi nada pa malu e no ta hasié pa malu. Si un hungadó skòp un bala malu no ta pa malu ela hasie. Palabra malu na tereno komo fanatiko no hasié. Respetá mucha pa mucha respetá bo. Hende grandinan no ta respetá mucha nan ta hasi kos dilanti di mucha kere ku e mucha no ta mira.
Dia mi baha si mi ta kere ku mi tin mas tempu pa trein mucha. Un kos mas mi no ta kere mas den trein un ratu atardi só. Mi ni no ta kere den e sistema ei. Bai atardi dal dos bala i hunga mi no ta kere. Nos mester bira un tiki mas profeshonal. Bai bòrchi splika treining di peso ets. Den beisbòl den regio nos no ta konta mas. Nan ta bini ku nan hungadónan profeshonal. Nos profeshonalnan nan Hulanda ta usa nan. Nan ta sigi bin wak mas hungadónan tambe. Hungadónan stòp di wak direktiva zorg pa bosnan tei hasi bosnan trabou i direktiva lo hasi nan trabou. Raffy’Stofzuiger, Poder’ Jozefa ta terminá e entrevista.

‍

‍

‍