WILLEMSTAD - Federashon Biyar Kòrsou ta kla pa ranka sali ku nan promé aktividat di 2021 wikènt benidero. E evento aki, kampionato nashonal bola 9 , ta tuma lugá dianan 30 i 31 awor. Esenario di e promè aktividat ta e palasio di biyar na Kòrsou, House of Billiard Play na Landhuis Granbeeuw. Tur partisipante mester tene nan mes na e protokòl instituí pa Febiko. No ta permití públiko, pues e partisipante nan so por ta presente den sala.
Tur hende mester tin mondkapje bisti i mester registrá na entrada. A mustra den 2020 ku nos por, pues ban sigi ku e mesun disiplina pa asina nos por sigi praktika nos deporte faborito. Kòrda ku mester tin kontribushon i inskripshon pagá pa por partisipá. E evento ta patrosiná pa Montana Bierhuis . Ta kuminsa diasabra pa 10or di mainta. Federashon Biyar Kòrsou ta desea tur partisipante tur klase di eksito den kampionato nashonal wikènt benidero.
