FFK a eligi direktiva nobo
A ELIGÍ DIREKTIVA NOBO DI FFK: LAGA NOS TRAHA HUNTU RIBA
FUTURO DI NOS FUTBÒL!
Willemstad, 10 aprel 2025 – Ayera ‘nochi durante un reunion general di miembronan di Federashon Futbòl Kòrsou (FFK) a eligí e direktiva nobo pa aklamashon pa e periodo di 2025 te 2029. E elekshon a tuma lugá konforme ku e statuto di FFK i ta marka un komienso nobo pa nos futbòl nashonal.
E direktiva nobo ta konsistí di e siguiente miembronan:
• Gilbert Martina – Presidente
• Fabi Constancia – Vise-presidente
• Kenneth Bernabella – Miembro di direktiva
• Ludwig Alberto – Miembro di direktiva
• Arif Potmis – Miembro di direktiva
• David Heykoop – Miembro di direktiva
• Rudsel Schmidt – Miembro di direktiva
E direktiva nobo ta pone hopi énfasis riba rekonstruí konfiansa entre tur aktor den e mundu di futbòl lokal: entre miembro di direktiva, empleadonan di FFK, klupnan esnan afiliá, rèfri i otro stakeholdernan. Konfiansa ta e fundeshi pa move huntu den un direkshon di progreso.
Un otro punto importante ta komunikashon: e direktiva kier mantené un komunikashon habrí i proaktivo ku tur miembro i tambe ku e medio di komunikashon, pa yega na un bon diálogo i transparensia.
Bon gobernashon korporativo (Good Corporate Governance) ta un balor fundamental pa e direktiva nobo. Tur desishon i akshon lo tuma lugá segun e regla i statuto vigente di FFK, ku klaridat den liderato.
E direktiva ta konsiente di e desafionan aktual den nos futbòl lokal. Prioridat prinsipal ta pa reaktivá e kompetensia, ku meta pa kuminsá e temporada 2025/2026 den ougùstùs òf sèptèmber 2025. I den mei, yüni i yüli 2025 lo tin un torneo pa klupnan di promé, di dos i terser divishon.
Den kuadro ku e nombramentu di un komité di normalisashon pa FIFA den ougùstùs 2025, un plan di transishon lo wòrdu implementá pa reorganisá e struktura interno di FFK. E reorganisashon aki ta esensial pa un futuro sostenibel.
Tambe lo tin atenshon spesial pa e organisashon interno di FFK. E direktiva lo traha riba pone e edifisio na òrdu, stabilisá e finansa, i mehora e kòntròl finansiero i maneho di gastu.
Pa fortifiká nos futbòl lokal, e direktiva lo traha riba desaroyonan di klupnan, kapasitashon di trainernan i mehorá e infrastruktura di futbòl.
Desaroyo di hubentut ta un otro pilá. Ku ayudo di e programa FIFA Grassroots, nos ta bai traha riba krea oportunidat pa muchanan ku tin talento pa sigui ku un bista riba kresementu den futbòl.
Finalmente, atenshon lo wòrdu duná na e selekshonnan nashonal: U15, U17 i selekshon grandi pa hòmber i muhé. Nan mester un struktura profeshonal i stabil pa representá Kòrsou ku dignidat riba podio internashonal.
Den último añanan, nos futbòl a pasa pa un periodo di turbulensia. Un dicho di afrikanonan ta bisa: “Ora olefantenan ta bringa,e yerba ta sufri.” Konflikto entre stakeholdernan a pone e futbòl lokal na un paro. Pero awe nos tin un oportunidat nobo. Otro dicho afrikano ta bisa: “Si bo ke yega lihé, bai bo so. Si bo ke yega leu, bai huntu.”
E direktiva nobo ta komprometé su mes pa traha huntu ku tur stakeholder. Den e dianan ku ta bin, tur klup afiliá lo haña un invitashon personal pa un diálogo ku e direktiva.
Laga nos traha huntu pa un mihó futuro!
Let’s go together – Laga nos ban huntu
