Final Torneo SKAK+ djadumingu 28 di yüli na Van Engelen Ballpark

Final Torneo SKAK+ djadumingu 28 di yüli na Van Engelen Ballpark

‍
WILLEMSTAD- E tradishonal Torneo SKAK+ organisá pa SIPS a start djaweps 25 di yüli i ta terminá djadumingu 28 di yüli na Van Engelen Ballpark. SKAK+ ta para pa Sòftbòl Komersial Aruba i Kòrsou i SKAK a bira SKAK+ debi ku Boneiru i Sint Maarten tambe ta partisipando último añanan. SIPS ta Stichting Internationale Politie Sportweken, ku ta e fundashon ku ta organisá deporte  entre polisnan di Aruba, Boneiru, Kòrsou, Isla Riba, Hulanda i Sürnam.

‍

Ta trata di un torneo di ekiponan komersial i e aña aki lo tin ekiponan 40+ tambe adén.  Ekiponan ku ta partisipá den 40+ ta CUR, Polis, Flow/Selikor i SDKK. Varios ekipo popular manera Selikor, Brandweer, Taxi Driver, Aqualectra, Building Depot, EWT/Mac Donalds, Quick ’60, Renaissance tambe ta partisipá na e torneo aki. Di Aruba tin Balashi i Taxi Drivers i di Boneiru WEB NV.

DJADUMINGU 28 DI YÜLI
Final den e kategoria 40+ Flow/Selikor kontra CRU pa 2.45 pm djadumingu 28 di yüli. Ekipo SDKK/GGGZ/Damen a terminá na di 3 lugá.
Ekiponan Brandweer lo topa ku WEB (Boneiru) i Corendon lo hunga kontra Taxi Drivers (Aruba) den semi-final di e hobennan djadumingu den oranan di mainta.  Weganan di semi-final ta 11’or i 12’or. Final lo ta 4’or di atardi.

‍

Frank Curiel te rekordá selekshon Little League 50 aña pasá

WILLEMSTAD – Franklin ‘Frank’ Curiel, un dje grandísimonan di Beisbòl, miembro di Salon di Fama di FDOK  a rekordá ku 50 aña pasá selekshon Little League a pèrdè pa no hit no run den un wega kontra Cuba. E kampionato di Latino America (Little) e aña ei a tuma lugá na Panama. Frank a kòrda ku e hungadónan di Cuba tabata masha grandi mes i ora a reklamá, nan a bisa dikon nos hungadónan no ta krese.  E tempu ei Reina di Deporte tambe tabata bai ku tabata Glenda Dania i Zenaida Geerman a bai komo chaparon.  Yuyu Schoop tata di Hensley i Evans Schoop tabata hefe di delegashon. Hungadónan den e selekshon e aña ei tabata entre otro Perry Sprock (QEPD), Nelly Jakoba, Hugo Daou, Wendell Brigitha i Silonero. Mayoría di e hungadónan ei tin nèt 60 òf 61 aña aktualmente.

Selekshon Intermediate i selekshon Minor den eskterior

WILLEMSTAD- Dos selekshon mas di Kòrsou a sali pa eksterior e siman aki. Selekshon Intermediate ku a bira kampion di Latino America na República Dominicana dia 29 di yüni a awe, djarason 24 di yüli pa Livermore, California pa kompetí den e Mundial. E kampionato Mundial ta di 28 di yüli pa 4 di ougùstùs.  E prome wega di e selekshon ta djaluna 29 di yüli 12’or pm ora di Kòrsou i 9’or am ora di Livermore.   Selekshon Minor a sali djabièrnè 26 di yüli pa Mayaguez pa kompetí den e kampionato Latino Americano.  E kampionato ta di 26 di yüli pa 4 di ougùstùs.

MAS INFORMASON DI SÒFTBÒL I BEISBÒL

Fanátikonan di Deporte bon dia. Djaluna 22 di yüli tabatin e delaster Podcast di Little League Extra Inning di 2024. Jeffrey Martina i Gino Valeriaan a repasá e proyekto rumbo pa Williamsport 2024. A pasa riba kon e proyekto a kuminsá ku publikashon den korant den luna di aprel, sigí pa podcastnan promé ku e play-offnan di Little League den luna di mei. Despues di e play-offnan a sigi diferente podcast rumbo pa e kampionato di Karibe ku a tuma lugá di 14 pa 21 di yüli den Stadion Post 6.  E kampionato di Karibe i transmishonnan di Extra Digital a resultá un éksito rotundo. Mester bisa si lo tabata mas dushi si un di e selekshonnan di Kòrsou lo a bira kampion i sigi rumbo pa Williamsport den ougùstùs.

* * * * *

Nos tin un selekshon mas ku mester hunga kampionato Latino Americano ku ta e selekshon di Minor Pabou ku ta rumbo pa Puerto Rico. E kampionato lo ta di 26 di yüli pa 4 di ougùstùs. Selekshon Intermediate di Liga Pabou kampion Latino Americano a sali djarason rumbo pa Livermore, California. E selekshon Intermediate a bira kampion na República Dominicana. Den e selekshon aki tin sigur 5 hungadó ku ta bayendo nan di 3 Mundial sigí. Ta trata aki di Jaydlin Wiel, Shemar Jacobus, Alexander Provacia, D-Shawn Winklaar i Joshua Acosta. E hungadónan menshoná a bai Williamsport na 2022 i 2023 ku e selekshon di Liga Pabou.

* * * * *

Pa loke ta trata e kategoría Minor, no tin Mundial naturalente. Un tempu tabata selekshon Big League tambe ku segun nos a drei te ku 2015 pa despues Litte League Internashonal na Williamsport a stòp ku e parti di 17 i 18 aña. Hopi hóben a firma kaba na e edat òf a drenta skol na USA i no ta masha interesá mas den hunga Little League. Miéntras tantu moveshonnan ta sigi den Little League i promé ku aña kaba lo start ku e kampionato di 2025. Den 2025 Kòrsou lo kuminsá prepará pa kampionatonan di Little League i Senior League di Karibe.

* * * * *

Ban un ratu pa Slowpitch. Den Liga 60 ekipo Jaws a kibra invikto di Nos Tambe Por. Na e momentunan aki no tin ekipo invikto mas den e kampionato. Djadumingu awor lo tin kandela entre ekiponan Nos Tambe Por i Los Amigos. Kandela sigur debí ku 5 hungadó di Nos Tambe Por di 2023 a move pa Los Amigos despues ku temporada a terminá. Ta trata aki di sigur 4 hungadó ku tabata regular den e ekipo Nos Tambe Por.  Di mes ta spera bon públiko pa wak e wega aki manera ta e kaso tur djadumingu na Frank Curiel Ballpark na momentu ku e 60+nan ta dibertí. 70+nan ta sigi move i siman pasá djamars nan a train huntu ku e 60+nan na Frank Curiel Ballpark den oranan di mainta.

* * * * *

Ekipo Tur Goso a bira kampion di Liga Streanan di Ayera 50+ djadumingu último na Sam Bunting Ballpark dilanti un públiko grandi. Ekipo Tur Goso a bira kampion bèk despues ku na 2023 nan a kai vensí kontra di Eureka den final. Murielle de Jongh- Avastia kasá di Taffy de Jongh a bira e MVP di e final. Murielle komo picher a gana tur dos wega pa ekipo Tur Goso.  Liga Streanan di Ayera meskos ku The Diamond Stars League a yega na final i pa loke ta trata Sòftbòl Femenino Veterano tur kos lo keda konsentrá riba Liga di Nos Tur den Frank Curiel Ballpark.

* * * * *

Djasabra tabatin Liga Amstel na Van Engelen Ballpark. Na mes momentu tabata Liga 50 ku ta halando basta atenshon, debí ku e situashon ta hopi pèrtá entre e promé 6 ekiponan. Pitufos ta den kabes ku rèkòrt di 7-2, sigí pa Marlins 6-2, Ban Serio 6-2, Baranka 6-3, Jaws 5-3, Flamboyan 4-5, Sluggers 3-5, Artemisia 3-6, Catpower 2-7 i Lions 1-8. Djasabra 27 di aprel ekipo Jaws a gana Sluggers pèrtá. Wikènt benidero lo mester tin un wega entre Sluggers i Jaws. Ta pendiente pa e wega entre Ban Serio i Marlins ku mester sigi kaminda a bini un protesta di Ban Serio tokante di un hugada ku a keda dekretá double play riba un infield flai. Ban Serio a protestá e hugada i a gana e protesta. Marlins a gana e wega despues pero a bin kita e wega bèk i lo start kaminda e protesta tabata manera menshoná. Nos ta keda te aki. Te mayan ku Poder di Dios.

‍