Firebirds ta gana selekshon di Beisbòl Veterano 9 pa 2
WILLEMSTAD- Djadumingu 13 di yüni tabatin un wega amistoso entre Firebirds i selekshon di Beisbòl Veterano den Tio Daou Ballpark. Un bon públiko tabata presente pa mira e wega aki ku tabata un fundraising organisá pa FEBEKO, pa mira Firebirds gana e veteranonan relatívamente fásil 9 pa 2. Hopi kier a mira e veteranonan kontra e ekipo hóben di Firebirds den akshon. E veteranonan a wanta basta bon den e promé inningnan i e wega tabata 4-2 te den di 5 inning. Poko poko pero sigur e hóbennan di Firebirds a dominá e partido ku a bai 9 inning kompletu.
Pa e hóbennan a destaká Jersely (Vriendjes) Cicilia ku dos tripel i Jurickson Fecunda a dal homerun. Emile Haswell Jr a dal un homerun pa e veteranonan. Emile Haswell Sr. a dirigí e selekshon di Beisbòl Veterano i Ghionelo Jansen pa Firebirds. Firebirds a nota 9 kareda, dal 11 hit i kometé 1 eror. Selekshon Veterano a skor 2 kareda, bati 7 hit i hasi 1 eror. Tantu e públiko presente komo FEBEKO tabata satisfecho ku e interkambio entre Veteranonan i e hóbennan. Por spera mas aktividat entre FEBEKO i BEVEKO den futuro.
