Gamers ta gana Cicoza dos biaha den final i bira kampion Liga Amstel
WILLEMSTAD- Gamers ku tremendo picheo di Emilio Velarde a bira kampion Liga Amstel di 2024. E gran final a tuma lugá djasabra 23 di novèmber na Van Engelen Ballpark. Gamers a gana wega number 1 ku skor di 6-5 lagando Cicoza den tereno i wega number 2 Gamers a gana Cicoza ku skor di 25-13. Emilio Velarde ku a picha den tur dos wega final a bira MVP di e seri final.
Despues di wega tabatin entrega di premio. Direktiva di Liga Amstel a manda un mensahe kaminda nan ta yama danki. “Nos di direktiva Liga Amstel kier a gradisí tur ekipo, umpayer, skorer i muy espesial fanátikonan ku a duna aporte na nos liga i tambe e ekipo di X-Treme ku den e parti play-off apesar ku nan no a klasifiká a sòru di bin yuda pa e parti veldwacht te final. Danki na kada un di bosnan su aporte. Nos di direktiva Liga Amstel ta deseá pueblo di Kòrsou kompletu un felis pasku i un prospero aña 2025. Ku dicha i felisidat lo reina den kada un su hogar. Liga Amstel rumbo pa 2025.
Wega 1
Gamers 6, Cicoza 5
Gamers a dal 8 hit i hunga sin eror. Alexander Rodriguez a gana den relevo pa Emilio Velarde. Liandry Kirindongo i Kevin Boekhoudt a bati di 4-2. Liandry Kirindongo a dal un homerun.
Cicoza a bati 12 hit i kometé 2 eror. Ryan van Heydoorn tabata e picher pèrdèdó den relevo di Frensel Meyers. Urlich Snijders i Ryson Polonius a bati di 4-3. Shurby Sambo a dal un homerun. Ryner Polonius a bati di 3-2.
Wega 2
Gamers 25, Cicoza 13
Games a bati 21 hit i hasi 1 eror. Emilio Velarde tabata e picher ganadó. Julio del Rosario i Liandry Kirindongo a bati di 4-3. Kevin Boekhoudt di 3-2. Adonis Suarez a dal 2 homerun. Darwin Blanquicett a dal un homerun. Jonjendri Rifaela a dal un homerun ku tabata un grandslam.
Cicoza a bati 12 hit i hasi 5 eror. Ryan van Heydoorn tabata e picher pèrdèdó. Germaine Genaro a bati di 3-2. Andley Simmons i Roderick Bernadina a bati di 4-2. Andley Simmons, Myson Cathalina, Roderick Bernadina i Ryson Polonius a dal un homerun.
PREMIONAN
Kampion: Gamers.
Supkampion: Cicoza.
Di tres lugá: Terremoto Giants.
MVP Final: Emilio Velarde.
Kampion bate: Jeandimar Ignacio (X-Treme) avg .723.
Kampion picher: Jermaine Esprit (Thrillers) 8-0.
Lider di homerun Rochendrik Alexander.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, felis siman. Pa loke ta trata Beisbòl Veterano, playoff lo sigi den 2025. .Den pasado masha hopi final a hunga den luna desèmber. Na 2018 kampionato a terminá 9 di desèmber. Na 2010 kampionato a terminá dia 19 di desèmber. Kampionato di 2020 a terminá den 2021 debí na Covid. Promé biaha ku un kampionato a terminá e sigiente aña.
* * * * *
Manera ya a bira un tradishon na mitar desèmber nos lo tin e resumen di e liganan, kaminda nos lo pone pòtrèt di ekiponan ku a bira kampion tantu riba nivel di komersial komo liganan. Na 2024 Liga van Engelen a kai afó i e otro liganan kustumbrá a drei normal. Den femenino tabatin 3 liga di kual unu ta 50+. E Slowpitch ta keda e deporte hopi gustá. Den Kopa ABC&S a bini un kampion nobo ku ta ekipo Cicoza. Segun nos Cicoza tabata e último kampion di Kopa ABC&S (2015), despues ku Swift a sigi gana hopi título tras di otro i tabata Cicoza mes ku a bin kibra e racha di ekipo Swift birando kampion na Sint Maarten den mei 2024.
* * * * *
Vários kambio na kaminda den liganan. Den Liga 60 tin indikashon fuerte ku Wimbert Hato, gran dirigiente di Jaws i kampion komo manager di Jaws na 2022 lo bai Pitufos. Wimbert tabata un di e pilanan di Jaws pa hopi aña. Parse ku Wimbert lo ta manager di Pitufos den 2025. Vários hungadó mas di Jaws lo move pa otro ekiponan. Tin indikashon ku tin muchu bon hungadó riba otro, espeshalmente den outfield i e hungadónan ke bai un otro tim kaminda nan lo por hunga regular. Gibi Henrietta di Los Amigos lo ta na kaminda pa Pitufos. Algun hungadó di Los Amigos ta na kaminda pa Nos Tambe Por. Beisbòl Veterano 50+ lo tin dos ekipo nobo. Sigi Hunga lo tei bèk i Glenn Lacruz ku tabata pa bin ku ekipo Energy lo bini ku su mes ekipo. Moveshonnan interesante. Nos ta keda te aki pa awe i te djabièrnè ku Poder di Dios.
