Gran final Torneo Hope den 6  kategoria i animashon di Oriri Dia di Obrero

WILLEMSTAD- Djarason 1 di mei, Dia di Obrero ta e fecha final di Torneo Hope 2024. Lo tin final den 6 kategoria i entre 6’or pa 9’or pm  lo tin animashon di grupo musikal Oriri. Awe nos tin resultadonan di vários wega di siman pasá i e skema di e weganan final.

Fanátikonan di Aqualectra durante Torneo Hope.

‍
SKEMA
10.00 Flow/Selikor – KPC (40+)
11.45 The Fire Team – Chonchies (COED Open)
13.30 Among Us – The Living Legends (Soshal Open)
15.15 Onderwijs /GSH/HICC – MCB (COED)
17.00 SOV Brandweer – Aqualectra (Soshal Maskulino)
19.00 ADC/CMC/Brandweer -SBAB (Soshal Femenino)

Veteranonan di FDDK (Sedreko) tabata presente pa animá nan ekipo.

‍

Djabièrnè 26 di aprel
Soshal Femenino
Onderwijs/GSH 12, ORCO/SSC/GB 6.

Djasabra 27 di aprel
Soshal Maskulino 40+
Flow/Selikor 11, MCB 1;
KPC 8, CRU 7;
SDKK/GGZ/Damen 3, Aqualectra 0.

MCB den ambiente. MCB ta den final di COED Femenino.

‍

Djasabra 27 di aprel
Soshal Maskulino
Aqualectra 11, Selikor 3;
FDDK 6, EWT/MCD/Centrum 0;
Brandweer 10, Onderwijs/GSH/ 7;
Corendon/GGZ./RE 6, KEYFIN 3.

Mas ambiente durante torneo Hope.

Djasabra 27 di aprel
COED
Guardian/Jeje Car Rental/Pinnacle 10, SGR+ 2;
Onderwijs /GSH/HI 8, Guardian/Jeje/Pinnacle 5;
MCB 12, KEYFIN 10
Onderwijs/GSH 10, Corendon/Licores 4;
MCB 7, KEYFIN 6.

Aida Juliana super Softbolista di tur tempu a saka pòtrèt ku algun hóben pelotero.

Djadumingu 28 di aprel
Soshal Maskulino 40+
KPC  10, Aqualectra 6;
FLOW/Selikor 8, SDKK/GGZ/Damen 4.
Soshal Maskulino
Brandweer 17, FDDK 13;
Aqualectra7, Corendon/GGZ/RE 6.

Latinonan a bini pa animá nan ekipo preferí durante Torneo Hope.

MAS INFORMASHON DI SÒFTBÒL I BEISBÒL

Lesadónan, bon dia. Felis dia di Obrero. Nos tei atrobe ku informashon di Sòftbòl i Beisbòl. Awe, 1 di mei ta fecha final di Torneo Hope 2024 i manera ya a bira un tradishon masha hopi hende mes ta move pa Van Engelen Ballpark pa gosa den e weganan final. Lo tin final den 6 kategoría manera ya nos anunsiá den e edishon di ayera.   Kandela for di mainta 10’or te den oranan di anochi. Lo tin animashon di Oriri di 6’or pm pa 9’or pm i lo tin vigilansia pa outo i na porta.

Wega krusial Pariba vs Pabou awe 1 di mei.

‍
* * * * *
Weganan final di awe, djarason 1 di mei ta: Pa 10.00 am ta Flow/Selikor – Polis den 40+, 11.45 ta kategoría COED, The Fire Team vs Chonchies. 13.30 ta final Soshal Open Maskulino entre Among Us i The Living Legends. 15.15 lo ta final COED entre Onderwijs/GSH/HICC kontra di MCB. 5’or pm ta e gran final di Soshal Maskulino entre Brandweer i Aqualectra  i 7’or final Soshal Femenino, entre ADC/CMC/Brandweer kontra SBAB. 4’or pm riba tereno B lo tin un wega amistoso entre Curacao Growth fund i RBC JM Guru.

Brandweer denfinal atrobe vs Aqualectra.

‍
* * * * *
E aña aki segun nos tin ménos ekipo den Torneo Hope. Tabatin aña ku nos a yega kasi 90 ekipo den Torneo Hope. No tin e klase Challenger mas den Torneo Hope. Torneo ku a start bou di nòmber Torneo BAB despues a bira Torneo SBAB na aña 2007, inisiá pa Sherwin Casper i Ryan Isebia di SBAB. Despues ta historia i e torneo a bira un éksito rotundo. Na 2011 MCB a tuma over enkabesá pa Gino Valeriaan i yama e torneo, Torneo Hope. Hopi aña pasá tabatin Torneo Union Komersial organisá pa Terremaster, Rene Hooi i Hildo Bernadina na komienso di  añanan 2000. Pa vários aña a yama e torneo, Kopa Pim Fangman.

Potret HOPE di 2019, MCB kampion Femenino Soshal.

‍
* * * * *
Den kategoría Soshal Maskulino lo ta un ripitishon di e final di Amstel Bright Premier Cup, kaminda ekipo Brandweer i Aqualectra a enfentrá otro. Den e gran final di Amstel Bright Premier Cup ekipo Brandweer a gana ku skor di 11-10 despues ku Brandweer tabata atras 10-1. Brandweer a nota 3 kareda den di 4 inning, 2 den di 5 inning, 3 den di 6 inning i dos kareda den nan último chèns komo ekipo di kas pa gana di Aqualectra. Un ‘come back’ inkreibel dilanti un públiko masha grandi mes na Van Engelen Ballpark.  Wega kayente ku tabatin vários eror, pero emoshonante.  E gran final ei tabata 10 di mart.

Aqualectra vs Bandweer kandela den seshon Maskulino Soshal.

‍
* * * * *
Wikènt awor ta final di Torneo 60+ organisá pa Lions. Lo tin e último 4 weganan di e buelta regular riba djasabra i djadumingu lo tin e wega final pa 3’or entre e number unu di e dos pulnan. Weganan di djasabra awor ta 10’or Lions vs Jaws. Ekipo Jaws mester gana pa klasifiká pa final, pa evitá empate na promé lugá.  Despues pa 12’or ta sigi Curacao Super Stars i ekipo Amigos. Ekipo Amigos tin un chèns ainda i ta dependé kon bai ku e wega, Nos Power kontra di Nos Tambe Por pa 2’or. E último wega di djasabra atardi ta Pitufos vs Sluggers.  Djadumingu ta 11’or wega entre number 3-nan di kada pul, 1’or wega entre number 2-nan i pa 3’or e gran final.

Fanatikonan di tur dia na Torneo Hope. Saluado pa Henry Wal, veteranisimo.

‍
* * * * *

Beisbòl Veterano ta start djasabra 4 di mei ku e promé wega entre Jandoret Raiders i Broncos pa 1’or pm. Wega number 2 djasabra ta 3.30’or  entre Santa Rosa Memories i Santa Maria Pirates.  Djadumingu 5 di mei pa 1’or Azucar vs Marlins i despues 3.30 Yesterday vs Flamingos.  E wega entre Santa Maria vs Santa Rosa ta kandela mes. Awe ta fecha pa entregá lista di ekiponan di Beisbòl Veterano 40+. Santa Maria i Santa Rosa a reforsá fuerte, miéntras Quality e kampion invikto di 2023 tin algun picher hóben tremendo parse.

BEVEKO:" Tur detaye ta kla pa tart kampionato 2024."

‍
* * * * *
Liga 50 di Sòftbòl ta start djasabra 4 di mei ku 4 wega na Van Engelen Ballpark. Dia 18 di mei tin apertura ofishal i dia 11 di mei lo no tin wega debí ku ekiponan Marlins i Ban Serio lo representá Kòrsou den Kopa ABC&S di 50+ ku lo tuma lugá na Aruba. Nos ta keda te aki i te djabièrnè ku Poder di Dios.

Gilbert Keller, presidente di Liga 50.

‍