Grandioso apertura di LIga Casca Leonora Sòftbòl T-Ball
WILLEMSTAD – Djabièrnè 10 di sèptèmber den oranan atardi na Buena Vista Ballpark tabatin apertura di Liga Sylvio “Casca” Leonora. Den e liga aki lo tin sinku ekipo di T-Ball ku lo partisipá. E ekiponan aki ta Buena Vista, Santa Rosa, Souax, Domi i Suffisant. T-ball ta un wega di sòftbòl pa mucha muhé entre 5 pa 8 aña ku e meta pa e muchanan sera konosí ku e wega di sòftbòl.
E liga for di 2002 ta dediká na Sylvio “Casca” Leonora kende a nase na Kòrsou 24 di febrüari 1931. Na 2006 Casca a fayesé na e bunita edat di 75 aña dia 24 di mart 2006. For di añanan 50 Casca a kuminsá komo umpire na un edat relativamente hóben i el a sa di empayá den tur liga di beisbòl i sòftbòl ku por tin. Pa djis nombra algun ta Liga Wimpiri, Liga Vruminga, Little League beisbòl i sòftbòl, sòftbòl eskolar, sòftbòl di CSB maskulino i femenino na tur nivel i tambe liganan di FEBEKO Klase A i Dòbel A. Pa tur e esfuerso ku Casca a hasi henter su bida ku hopi amor pa e deporte, a dediká e liga aki na 2002 (di 19 kampionato) na su nòmber. Na e apertura tabatin invitadonan di honor,
presidente di Liga Casca Leonora sr. Ralph Pereira ku a dirigí palabra na presentenan, District Administrator sr. Urny Floran, presidente di Curacao Little League Sòftbòl Ruisandro Cijntje, miembro di direktiva di Curacaose Softball Bond i sr. Shurentley de Lima. Yu di Casca Leonora, Silvio Leonora jr i nietunan di Casca Leonora tambe tabata presente.
