Grandioso apertura Weganan Sentro Amerikano i di Karibe 2023
EL SALVADOR---Tabata riba djabièrnè 23 yüni 2023, den oranan di anochi na El Salvador, ku a tuma lugá e apertura ofisial di e di 24 edishon di Weganan Sentro Amerikano i di Karibe.
Un ke otro unda ku Kòrsou lo kompetí den 6 diferente deporte, kual nan ta beisbòl, natashon, sòftbòl femenino, tènis, atletismo i arkeria.
E parti di e seremonia ofisial di un tremendo i bunita apertura ku partisipashon di e delegashonnan partisipante, a hala basta atenshon.
Tabata un show kompletu den stadion nashonal Estadio Jorge ‘El Magico’ Gonzalez, unda ku entre otro presidente di e pais, Nayib Bukele a hiba palabra i sigur a aksentuá riba e parti di seguridat di e pais.
E stadion ku kapasidat di alrededor di 35 mil fanátiko, tabata kompletamente yen, ku DJ Marshmello komo e invitado speshal pa e okashon.
E akto ofisial a kulminá ku un tremendo i grandioso di show di vürwèrk, for di rònt di e stadion, ku tabatin tribunanan kompletamente yen.
Tur esaki, despues ku den oranan di mainta a hisa banderanan di e 37 paisnan ku ta kompetí den e 38 diferente deportenan, den e di 24 edishon di e kompetensia deportivo pa paisnan den Sentro Amérika i Karibe.
Un ke otro despues ku un dia promé, riba djaweps 22 yüni 2023, tambe a tene un Asamblea General, den Hotèl Crowne Plaza.
Aki presidente di FDOK, Rignaal ‘Jean’ Francisca, tambe tabata presente den representashon di nos isla.
Aki tabata tambe e presidente di e komishon organisadó, Luis Mejia, kende a hiba palabra. Entre otro el a splika kon preparashonnan a bai i ku e edishon aki, ta konta ku 17 deportista, kende ta madayistanan olímpiko.
Entre otro el a indiká Yulimar Rojas (Venezuela), Marileidy Paulino (Repúblika Dominikana) i Mariana Pajon (Colombia), komo esnan mas konosí.
Konhuntamente algun foto, unda por mira entre otro presidente di FDOK, Rignaal ‘Jean’ Francisca na e Asambleo General i tambe parti di e grandioso apertura ofisial.
Tur esaki danki na Gobièrnu di Kòrsou, Ofisina di Turismo i tambe FDOK.
