Historia ekipo Swift for di 1970
Resientemente nos tabatin un entrevista ku SergioLeon, doño/presidente di ekipo Swift i alabes presidente di e Fundashon Van Engelen. Nos a relatá e parti di kompra i e desaroyonan na a parke. Awor nos tin mas detaye di e historia di ekipo Swift i tambe algún detaye di desaroyo di Van Engelen Ballpark durante tempunan ku a pasa.
SWIFT
Sergio Leon: “Na aña 1970 un grupo di amigu, miembro di SUVEK a bini ku e idea pa kuminsá hunga Sòftbòl riba e tereno di bala (Futbòl) na SUVEK. Despues ku e interes pa hunga Sòftbòl a sigui krese, a bini ku e idea pa kuminsá traha un tereno di Sòftbòl einan mes. Na 1972 a kuminsá ku e parke na SUVEK. E tim e tempu ei a kuminsá pa partisipá na Liga Independiente fundá dor di Rudy da Costa Gomez, ku a hunga na varios tereno. Entre otro St Joris i na Sabana. Liga independiente tabata konsistí di basta ekipo komersial entre otro: AGT,Veteranos, Kintore Jaws, VLC, Quick 60, Cicoza i SWAT. Liga independiente a pasa pa un mihó mundu i a lanta e ora ei Liga Amistad. Liga Amistad te ainda ta eksistí i ta hunga aworaki riba Ricardo Elhage Ballpark na Sta Rosa. (Liga Amistad mas o menos aña 2015 Liga Amistad a stòp di organisá kampionato).
Entre tantu e ekipo di SUVEK a kambia di nòmber i a bira Softball Club Swift na aña 1977 ku statuto i Reglamentu Doméstiko. SBC Swift den estrecho laso ku SUVEK ta mantené e parke di Sòftbòl i na Van Engelen di aña 1980 pa aña 2012. Pa por hasi esaki,ta pone bòrchi di propaganda den outfield pa un suma chiki i e sènnan ku drenta anualmente ta ser usa pa invertí bèk den e parke di Sòftbòl dor di mehoramentu di e tereno, pero tambe e fasilidatnan pa e públiko i hungadónan.
Na aña 1987 despues di hopi fundraising, SBC Swift a logra di pone lus den e parke di SUVEK, pa di e manera ei tambe por hasi uso di e tereno den oranan di anochi.
Inmediatamente depues di esaki a lanta Liga 40 ku ta un liga di Sòftbòl pa hungadónan veterano ku a pasa e edat di 40 aña. Te ainda Liga 40 ta hunga 2 bes pa siman na SUVEK Sòftbòl park. Miéntras tantu SBC Swift a kuminsá na aña 1993 ku Liga van Engelen ku ta hunga tur djadumingu na e parke ya menshoná. Ta tin 11 ekipo ta partisipá den Liga van Engelen. Pa hopi aña kaba e kampeonato di Sòftbòl di skol organisá dor di Fundashon Sedreko a ser hunga na SUVEK Sòftbòl park.
Tambe e torneo di Little League, ántes konosí bou di e nòmber di Torneo Andruw Jones, awor FABB, ku ta ser organisá dor di Fundashon Akademia diBaseball Brievengat ta tuma lugá na Suvek Ballpark. Komo kiera ku e vèlt di Futbòl tabatin hopi aña pará pornada, atrobe SBC Swift a bini ku e proposishon pa traha un di dos tereno di Sòftbòl, e aktual vèlt B , mirando e demanda grandi ku tin pa hunga Sòftbòl. E parke aki tin tamaño ku tambe e por ser usá pa hunga Beisbòl Little League. E tereno aki a keda klá na aña 2005 i e tereno aki ta ser usá diariamente dor di ekiponan di Sòftbòl i tambe selekshon di Beisbòl Little League.”
