Fanátikonan di Deporte Kòrsou, bon dia i felis wikènt. Wikènt kargá ku Beisbòl Sòftbol na Kòrsou. Beisbòl Klase A ta start ku play-off na Montab Ballpark. Weganan di e wikènt aki lo tuma lugá na Montab Ballpark. Manera nos a relatá anteriormente ekiponan Santa Rosa (1), Firebirds (2), Groot Kwartier (3) i Suffisant Royal Magic(4) a klasifiká pa play-off. Djasabra 28 di ougùstùs ekipo Santa Rosa Indians lo topa ku Suffisant Royal Magic pa 11.30’or i despues pa 2’or Firebirds lo topa ku Groot Kwartier Stars. Djadumingu 29 di ougùstùs pa 09.00’or Suffisant Royal Magic lo topa ku Santa Rosa Indians i despues pa 11.30’or mesun ekiponan lo topa otro si ta nesesario. Ta trata di un seri mihó di 3. Pa 2’or Groot Kwartier ta topa ku Firebirds i si bini empate, mester hunga wega number 3 di e seri.
* * * * *
Den Hubenil lo tin weganan di deskite entre ekiponan Firebirds, Wild Cats i Santa Rosa. Djasabra 28 di ougùstùs pa 10.00’or Firebirds vs Wild Cats, despues pa 12.30’or Firebirds vs Santa Rosa Indians. Djadumingu 12.30’or tin 3 wega di e deskite ku ta Wild Cats vs Santa Rosa Indians. Pa otro siman ta start ku play-off semi-final i final. E siman aki weganan di Hubenil lo ta na Bonnam i otro siman ta bai na Montab. Ekiponan di Klase A i Hubenil a hunga dos buelta di kampionato regular i awor ta start ku play-off.
* * * * *
Djarason nos a kòmbersá ku Jedrek Magdalena ku ta presidente di FEBEKO. Nos a elaborá riba e parti di instant replay review stail di MLB den Beisbòl lokal. Jedrek a bisa ku bèrdat esei tabata den plan, pero a wanta un ratu, debí na gastunan ku esaki ta trese kuné. Mester wak dos kamara mas, unu banda di primera i otro banda di tersera. Mester paga un umpire mas ku ta pafo di tereno di wega tras di home plate ku mester bai tuma e desishon despues di wak e video. Jedrek: “Pa otro aña nos lo evaluá atrobe i wak ku FEBEKO por karga e gastunan. Ku otro palabra, e posibilidat tei pa usa Instant Replay pa e umpirenan por determiná ku ta mantené e apresiashon (call) ku umpire a hasi òf lo kambia e apresiashon manera ta pasa den MLB.
* * * * *
Pitufos a gana protesta ku nan a hasi kontra Flamboyan. Ta trata di e wega ku a tuma lugá dia 14 di ougùstùs 2021, kaminda riba eror en tiru di kécher, e koredó ku tabata na tersera a bai home. Archie Davelaar manager di ekipo Pitufos a manda su protesta adén i finalmente a bin gana e protesta. Tabata Vernon Delanooi ku tabata na segunda despues ku ela bati un doblete. Bala a bai laga kècher i Vernon a move pa tersera i riba tiru di e kècher e bala a bai laga e tersera base. Vernon a bai home i despues a bini nota kareda number 4. Despues Flamboyan a nota masha hopi kareda den mesun inning ei i e wega a kaba 11-5. Na momentu ku Vernon a bai home, Pitufos tabata ganá 5 pa 3.
* * * * *
Ban pa e weganan di wikènt awor. Djabièrnè 27 di ougùstùs pa 8’or tin wega entre Shining Stars i Curacao Sweethearts. Djasabra pa 8’or ta Sin Stress ta topa ku Un Kara den e klèsh di Liga di Nos Tur. For di dia e liga aki a lanta kada un wega entre e dos ekiponan aki ta unu. Despues ku Chilling a drecha i Join Me tambe a bini, tin mas ekipo ku ta duna e ekipo Un Kara dolo di kabes. Djasabra den Liga Amstel tin 4 wega na Van Engelen Ballpark. 10.00 Bombers – Terremoto, 12.00 Cicoza – Gamers, 14.00 X-Treme – Sugar, 16.00 Terremoto – Thrillers.
* * * * *
Beisbòl Veterano e wikènt aki na Tio Daou Ballpark. Djasabra 28 di ougùstùs 10.30 Azucar – Marlins, 13.00 Bulldogs – Santa Rosa, 15.30 Marchena Stars – Otrabanda. Djadumingu 29 di ougùstùs 10.30 The Brothers – Yesterday, 13.00 Jandoret – Quality Stars, 15.30 Isla Crackers – Santa Maria Pirates. Den Liga 50 ekipo Sigi Hunga lo topa ku Vosama pa 9’or na Tio Daou Ballpark djadumingu 29 di ougùstùs 2021.
