Fanátikonan di Deporte Kòrsou, bondia. Nos tei ku informashon di Beisbòl manera ta e kaso tres biaha pa siman. Bon públiko djasabra na Vi Jansen Ballpark pa mira Beisbòl Veterano. Polis a presentá djadumingu i para e wega. Despues a tuma desishon ku e ultimo inning di e seri lo sigi den 2021.
Basta reklamo riba e eskohensia di kampion bate den Beisbòl Veterano. Michelangelo Celestina di Isla Crackers a sali kampion bate ku un averahe di .688 produkto di 11 hit den 16 turno. Michelangelo Celestina tabatin 23 aparishon na plato den 12 wega ku su ekipo a partisipá. Reklamo a drenta di parti di Ramiro Balentina i Santa Maria Pirates. Ramiro Balentina a bati .593, 16 hit den 27 turno. Ramiro tabatin 38 aparishon na plato. Direktivanan di BEVEKO pa basta aña no ta pone e kriterianan kon ta bini na remarke pa bira kampion bate i kampion picher. Parse ku BEVEKO a skohe pa pone 1.8 òf ta 1.9 aparishon na plato pa weganan ku ekiponan a partisipá. Ké mèn, e batiadó den 12 wega mester yega 12 x1.8 aparishon na plato pa e por yega e kantidat di aparishon na plato pa bira kampion bate. Direktiva a tuma desishon ku Lo Celestina ta kampion bate.
* * * * *
Mester bisa ku e kriterianan no ta poné pretu riba blanku i ta bira difísil pa reklamá. Beisbòl di Grandes Ligas (MLB) ta husga 3.1 aparishon na plato. Ké mèn, un batiadó mester tin e kantidat ei dependé e kantidat di weganan (e aña aki tabata 60 wega). Normalmente den temporada di MLB un ekipo ta hunga 162 wega, ké mèn un batiadó di MLB mester tin por lo ménos 502 aparishon na plato (162x3.1). Wega di MLB ta bai 9 inning sigur, miéntras na Kòrsou tin time limit tantu den Beisbòl Dòbel A komo den Beisbòl Veterano. Den Beisbòl Veterano ekiponan ta hunga 7 inning, pero ta masha poko wega ta yega 7 inning debí na time limit. Di e 12 weganan ku e timnan a hunga den 2020 debí na Covid-19, masha poko ekipo a yega 3 wega di 7 inning. En todo kaso mester pone e kriterianan for di komienso di temporada pa hungadó i maneho di ekiponan por ahustá i alabes e sifranan mester ta up to date.
* * * * *
Pa loke ta trata picheo tambe no tin e kriterianan pon’é. Mester pone kuantu inning un picher mester tira pa bini na remarke pa kampion picher. Si ta ERA (Earned Run Average) mas abou ta gana mester stipula esei, si ta mas wega ganá ta bira kampion picher òf ta mihó average di ganá i pèrdí. Mester pone regla tambe ku den kaso di empate, ta duna dos hungadó un kopa. Den kaso di homerun tambe mester pone for di tempran den kaso di empate kiko ta bai pasa. Por wak reglanan di ántes di FEBEKO i adaptá nan na Beisbòl Veterano.
