Fanátikonan di Deporte Kòrsou, bondia. Awe djaweps ta e gran fecha di e play-off final mihó di 7 entre Santa Rosa i Wild Cats. Wega finalísimo, wega number 7. Segun nos masha tempu no tabatin un wega number 7 di play-off final. Wild Cats a bira faborito pa bira kampion despues ku Santa Rosa tabata faborito despues di wega number 2, 3 i 4. Tene kuenta si ku Santa Rosa a keda bati e bala normal, filea normal (den wega number 6 nan no a kometé eror). Nos tin e numeritonan pa loke ta trata e seri final aki. Pa loke ta e seri final Santa Rosa despues di 5 wega a nota 31 kareda, Wild Cats 24 kareda. Santa Rosa a konektá 55 hit, Wild Cats 44 hit. Santa Rosa a kometé 6 eror (3 den wega number 4). Wild Cats a kometé solamente 1 eror den e promé 4 weganan ku tabata un parti hopi fuerte. Djasabra Wild Cats a kometé 4 eror pa yega 5 eror kometé den e promé 5 weganan. Despues di 6 wega Santa Rosa 36 kareda, Wild Cats 33 kareda. Santa Rosa 67 hit, Wild Cats 57 hit. Pa loke ta eror tur dos ekipo tin 8 eror kometé den 6 wega.
* * * * *
Santa Rosa tin mas hit ku Wild Cats, Santa Rosa a nota mas kareda ku Wild Cats. Tur dos ekipo tin 8 eror durante e seri final aki ku tin 6 wega tras di lomba. Ké mèn, Wild Cats ta faborito si, pero mester tene kuenta ku e bala ta rondo i Santa Rosa lo sigi ataka i pone preshon den e wega. Wild Cats lo habri ku Jair Jurrjens ku tabata e atrakshon e temporada aki i Santa Rosa tin nan as ku ta Jordan Lucas. Manera nos a splika anteriormente Wild Cats tin 15 titulo, number 2 den historia di titulo di Dòbel A di tur tempu tras di Royal Scorpions ku tin 18. Santa Rosa tin 6 titulo. Wild Cats a bira kampion na 1975, 76, 77, 78 i 80. Despues di einan di 1994 te ku 2001. Despues na 2016 i 2017. Santa Rosa a bira kampion na 1965, 1986, 1987, 1988, 2003 i 2008. Ta di 4 ekipo ku mas título den historia di nos Beisbòl Dòbel A.
* * * * *
Nos a bai bèk den tempu pa loke ta trata e dos ekiponan aki i nos tin mas nòmber pa menshoná. Den e ekipo revelashon di Beisbòl Dòbel A den aña 70 Wild Cats tabatin varios hungadó estrea. Wild Cats a bin para a recha viktorioso di Royal Scorpions birando kampion na 1975, 76, 77 i 78. Promé ku esei ta Royal Scorpions tabata manda. Royal Scorpions tabata kampion na 1966, 67, 68 i 69. Blue Hawks kampion na 1970. Royal Scorpions atrobe na 71, 72, 73 i 74. Ké mèn Royal Scorpions 8 biaha kampion den 9 aña i Wild Cats a bin para e kos ei tempunan di gloria di Stadion di Rif. Wild Cats a lanta komo Altamira Braves ku a kibra na 1962 i ku despues a bira Dominguito Sugar Kings pa despues Wild Cats a nase ku varios hungadó di Braves. Danki na Cedric Kirindongo pa e datonan i den pasado nos a risibí algun dato di Chucho Maduro tambe. Cedric Kirindongo i su ruman Ushley ‘Chebu’ Kirindongo a bini Wild Cats na 1972.
* * * * *
Algun hungadó di tempu di gloria di Wild Cats di 1975 bin ariba. Ashley Winklaar, Arie den Hartog, Glenn Felida, Ronnie Thomas, Lesley Welvaart, Ushley Kirindongo, Bramford Hasham, Eddie Holsman, Richenel Daal, Humprey Hooi, Humprey Lourens, Gigi Hooi, Antonio Keller, Melvin Thomas, Bienvenido Philipson, Melvin Roosendaal, Dudley Wilsoe, Emile Maduro, Bob van de Mark, Toby Abraham, Papito Lodewijks, Tolly Castillo i Nelson ‘Kabouter’ Gutieres, Chicho Jessurun (manager), Johnny Hellmund (coach) i Joe Paulina (coach). Den aña 1980 a bin aserka, Emile Hawswell, Ramsey Sprock ets. Keda pendiente pa mas di pasado di Wild Cats i di Santa Rosa.
