Fanátikonan di Deporte Kòrsou felis wikènt. Awe nos tin mas informashon di e dos ekiponan ku ta den play-off final, esta Wild Cats i Santa Rosa. Pa mayan djadumingu ta Risandro Pastor lo habri pa Wild Cats kontra Jordan Lucas di Santa Rosa. E wega di djasabra a keda suspendé i nos tin e komunikado manda pa FEBEKO.
Por fabor tuma nota ku partido di awe ta keda kanselá i partido 2 lo tuma lugá mañan djadumingu 4 di òktober na Tio Daou Ballpark. Stadion Johnny Vrutaal na Rif no ta den estado pa por usa i kambio pa otro stadion no ta prudente debí na pronostiko di wer ku a risibí di Meteo. Tuma bon nota ku entrega di premio tambe lo tuma lugá mañan djadumingu promé ku partido kuminsando 5'or en punto.
Por lo demas, partido 3 ta tuma lugá djamars 6 di òktober i partido 4 djaweps 8 di òktober. Ambos partido tambe lo ta na Tio Daou Ballpark. Diskulpa pa kualke inkumbiniensia.
Ban bèk pa informashon di e dos ekiponan i mas detaye di kampionnan di pasado den Beisbòl Dòbel A. Tur dos picher a gana dos wega den semi-final i ta práktikamente e estelar di nan ekipo. Nos lo bai bèk tambe den tempu ku e dos ekiponan aki pa loke ta trata títulonan den nos Beisbòl. Den ERA moderno di Beisbòl, kuminsando for di 1965, e ekipo Santa Rosa a bira kampion na 6 okashon. Santa Rosa a bira kampion na 1965, na 1986, 1987 1988, 2003 i 2008. Na 1988, Santa Rosa por poko a bira kampion 4 aña sigi di nos Beisbòl Dòbel A. Santa Rosa tabata dilanti na e okashon ei 3-0 den e seri kontra di Santa Maria. E ekipo Santa Maria a gana 4 wega sigí na e okashon ei pa bira kampion. Na 2003 Santa Rosa a gana Santa Maria den final i na 2008 atrobe tabata Santa Maria ku e ekipo Santa Rosa a gana.
* * * * * *
Pa loke ta ekiponan ku mas título Royal Scorpions tin 18, Wild Cats tin 15 titulo. Santa Maria tin 11 titulo, Santa Rosa 6 titulo di kampion di Beisbòl Dòbel A. Ekipo Alpha Zelbo ku no tei mas tin 3 titulo i Blue Hawks tin un titulo. E ekipo Blue Hawks tambe a pasa pa historia. Blue Hawks a gana nan úniko título na 1970, miéntras Alpha Zelbo a bira kampion añanan 1982, 1983 i 1984. Ekiponan Groot Kwartier, Marchena Braves i Firebirds (Curacao Yankees) nunka a bira kampion di Beisbòl (Dòbel A) di Kòrsou. Kampion e último 5 añanan ta Santa Maria (2015), Wild Cats A(2016-2017), Santa Maria (2018). 2019 pa promé biaha den sigur 53 aña ku Beisbòl Dòbel A no a konosé un ekipo kampion. Esei tabata pa motibu ku e direktiva di 2018 a baha i otronan no por a logra terminá e kampionato.
* * * * *
Pa semper lo keda rekordá Wild Cats komo e ekipo ku a bira kampion di Beisbòl Dòbel A na 8 okashon sigí, di 1994 pa 2001 bou di direkshon di Renato Anasagasti. E promé titulo, na 1994 tabata bou di direkshon di Fichi Flemming. Hungadónan di e tempu ei tabata Renato Anasagasti, Hensley Josephina, Myron Wijman, Eugene Martha, Eldrin Ortega, Remick Bernadina, Adelbert Martha, Junny ‘Junny Ko’ Orcadio, Byron Kook, Rigobert Cijntje, Quincy Kook i Edric Reenis. Tin algun ku tabata tei tur e 8 añanan ei, entre otro Renato Anasagasti i Remick Bernadina. Remick Bernadina tei ainda komo coach i segun nos e tin kasi 40 aña den Wild Cats.
* * * * *
Nos tin Santa Rosa di 1986, 1987 i 1988 ku e siguiente hungadónan. Naturalmente no ta tur hungadó tabata presente tur e 3 añanan kampion i probablemente nos lo a lubidá algún. Lipo Elhage, playing manager, Shaheen Elhage (parlamentario), Michel Daou, Momon Martina, Rupert Straker, Hensley ‘Lilin’ Martinus i Stanley Palm. Segun nos Hensley Meulens a firma na 1985, pues no tabata ku e ekiponan kampion di Santa Rosa. Mas hungadó tabata Chepul Martiszoon (QEPD), Nestor Beaumont (QEPD), Pablito (Toto’ Beaumont) (QEPD), Farley Leocadia (QEPD), Otmar Petronilia, Roy Ersilia, Richenel ‘Rich’ Martina ruman di Momon i Ludwig ‘Lucho’ de Wind. Recordar es vivir. Na 2003 i 2008 Santa Rosa a bolbe bira kampion atrobe i nos lo tin e nòmbernan pronto.
* * * * *
Komparashon Wild Cats vs Santa Rosa den temporada regular. Wild Cats a terminá kampionato regular ku rekòrt di 7-5 na di tres lugá. Santa Rosa a terminá ku rekòrt di 6-6 na di kuater lugá. Santa Rosa a topa ku ekipo di Groot Kwartier ku a terminá number 5 den un wega di Wild Card. Santa Rosa a gana e wega ei ku skor di 6-2 ku nan estelar atrobe (Jordan Lucas) ganando e wega menshoná. Santa Rosa a gana Royal Scorpions number 1 den 5 wega di kampionato regular. Durante e kampionato regular Wild Cats a gana Santa Rosa 10-4 dia 29 di yüli ku tabata un djarason den Stadion Johnny Vrutaal i Santa Rosa a bira dal Wild Cats mesora bèk su siguiente dia ku mesun skor. Gedion Jakob i Risandro Pastor a kombiná pa Wild Cats den e viktoria i tabata Jerryson Beaumont ku a pèrdè. Den e wega di e siguiente dia kaminda Santa Rosa a gana, tabata Siamani Boekhoudt ku a sali picher ganadó den relevo pa Jordan Lucas. Pa Wild Cats tabata Sidney Antonia ku a pèrdè. Den e wega ei a picha Ruwensley Bonifacia i Klevert Martina. Te otro siman ku Poder di Dios.
