Fanátikonan di Deporte Korsou, bon dia i felis siman. Fin di siman pasa tabata kayente den Liga 50 i Beisbòl Veterano kaminda sorpresanan a kai. Den Liga 50 ekipo Jaws a kibra invikto di Ban Serio ganando ku skor di 11 pa 7. Ku e viktoria di Jaws riba Ban Serio no tin ekipo invikto mas den Liga 50. Doño i general manager no tabata presente i e siman benidero Jerry Booi mes lo tei pa pone ‘orde op zaken’. Promé ku e wega di djasabra ekipo Ban Serio tabatin rekòrt di 6-0 i awor nan a bai 6-1. Lions ku tabata 6-1 a bai 7-1 ku un viktoria impreshonante riba ekipo Marlins. Lions a gana Marlins ku skor di 1-0 djasabra na Van Engelen Ballpark ku tremendo picheo di Edison Sambo. Lions ta number 1, nan so pa loke ta e standing di Liga 50 Sòftbòl. By the way e wikènt aki tin wega di Liga Amstel so i no tin wega di Liga 50 na Van Engelen Ballpark.
* * * * *
Djasabra awor Lions mester a topa ku Catpower ku no tin viktoria den e kampionato aktual. Catpower tin 0- ganá i 6 pèrdí i ta úniko ekipo ku no tin viktoria e temporada aki den Liga 50. Dirigente i hungadónan di Catpower ta hopi kontentu ku e union den tim, apesar ku nan no a gana un wega ainda. Nan ta bisa ku e ambiente ta mihó ku nunka. Varios hungadó di klase a bai laga Catpower den 2021. Hungadónan estrea, entre otro Sor Moesquit, Fisel Pereira, Vriendjes Cicilia, Skippy Sambo, Barry van het Kruys, Spin Lourens ets. Ta 6 ‘heavyweight’ den Liga 50 e ekipo Catpower a pèrdè, pero nan a keda drei den 2021.
* * * * *
Ekipo Baranka a dal Pitufos durísimo ku skor grandi di 17 pa 2 djasabra último. Nos no risibí e resultadonan ofishal, pero ta aki aya nos a haña e resultadonan serka hungadó i dirigentenan di Liga 50. Despues di e resultadonan di wikènt pasa, Lions tin 7-1, Ban Serio 6-1, Baranka ku Kenny Hellement den gran forma tin 6-2, Flamboyan tin 5-3, Marlins 4-3, Pitufos 3-4, Jaws 2-5, Sluggers 2-6, Artemisia 1-5 i Catpower 0-6. Liga 50 kayente i den kurso di siman nos lo tin mas resultado.
* * * * *
Den Beisbòl Veterano sorpresa a kai kaminda The Brothers a gana di Santa Maria Pirates ku skor di 5 pa 4. Pichernan Barry van het Kruys i Signald M. Burnet a kombiná pa logra e viktoria. Signald ‘primu’ Burnet tabatin un tremendo relevo i no a tuma hit ni kareda, tampoko a tira base por bola. Aishel Hooi tabatin e hit ku a empuhá dos kareda pa manda The Brothers ariba den último inning i tabatin un hugada sensashonal den short pa e último out pa terminá e partido. Den otro weganan di wikènt den Beisbòl Veterano, Jandoret a nòkout Otrabanda 13-0, Isla a dal Azucar 10-3. Djadumingu mainta Bulldogs a nòkout Marlins 10-0, Marchena a derotá Yesterday 9 pa 1 i Quality a nòkout Vosama 12-0.
* * * * *
Wikènt benidero ta kandela tin na Tio Daou Ballpark, kaminda grandinan lo topa ku otro. Ya nos a anunsiá e wikènt benidero den nos kolumna. Djasabra 1’or Santa Rosa (5-2) lo topa ku Bulldogs (5-3). Djadumingu 1’or Quality Stars (7-2) lo dal den Jandoret Raiders (7-1) i pa 3.30’or ekipo Isla Crackers (9-0) lo topa ku Santa Maria Pirates (7-1). Wikènt kayente i ta Beisbòl Veterano mes tin e bar na Tio Daou Ballpark. Ta bon pa fanátikonan tene kuenta ku e weganan di e wikènt aki ta na Tio Daou Ballpark.
* * * * *
Ban pa Beisbòl Dòbel A. Djasabra ekipo Santa Maria a kue un bon ventaha den komienso di e wega i wanta esaki te final, pa gana Santa Rosa ku skor 9 pa 8. Santa Maria a kibra e racha di 6 wega sigí ganá di Santa Rosa. Djadumingu mèrdia bai kue atardi tabatin sorpresa grandi den Stadion Johnny Vrutaal na momentu ku Firebirds a sorprendé Wild Cats ganando ku skor di 7 pa 3. Terrence Garcia i Ceddeon Languth a kombiná pa e viktoria di Firebirds. John Michael Halley i Shurensley Daantji a picha pa Wild Cats.
