Fanátikonan di Deporte Kòrsou, bondia. Nos tei atrobe kargá ku informashon di Beisbòl i Sòftbòl. Ketu bai den lockdown i pa kolmo informashonnan no ta drentando riba kambionan den Beisbòl i Sòftbòl. Den mei lo mester tabatin Kopanan ABC riba tur nivel 20+, 40+ i 50+. Ya tin di e nivelnan aki ku a organisá e kopa ABCnan den e di dos mitar di aña. Manera ta bayendo ku bakuna chèns ta grandi ku den yüli liganan por start. Hopi eksperto riba tereno di salubridat públiko, ekonomía i turismo ta pensa ku pa yüni mes tur kos ta klá pa nos bai pa normal nobo.
* * * * *
Awe nos lo bai bèk den algún Kopa ABC. Na 2017 tabatin ABC na Sint Maarten kaminda Swift a bira kampion. Na Sint Maarten e ambiente ta otro naturalmente. Segun nos ta promé òf e di dos Kopa ABC ku a tuma lugá na Sint Maarten, esta na aña 2017. Den final di Kopa ABC&S, Swift a bolbe gana Redskins i bira kampion ABC&S. Swift a gana Redskins ku skor di 13 pa 7 ku tremendo picheo di e picher Venesolano Emilio Velarde. Redskins a gana e ekipo den semi-final ku skor di 8 pa 1. Den e wega final Swift tabata pèrdí den bòm di e di 4 inning. Nan ta rèli i bòltu e skor hasi 7 pa 4 i después 13 pa 4. Emilio Velarde a remplasá Rafa Dominicano pa sigurá e wega ku a bin terminá 13 pa 7.
* * * * *
Na Kòrsou den Kopa Classico ABC 40+ Baranka a gana Kibaima di Aruba pa bira kampion Classico ABC 40+ ku a tuma lugá na Suvek Ballpark. Kibaima a lucha hopi, pero a keda kòrtiku. Baranka a presentá ku un Dream Team ku hungadónan manera Johnny Balentina, Ramiro Balentina, Mayron Wijman, Kelvin Winklaar, Willy Reinita, Rigobert Cijntje i otronan. Den gran forma Baranka na 2017 na Suvek Ballpark, pero na 2018 na Aruba, Baranka no a klasifiká. Nos a splika siman pasá ku ta ekipo Quisqueya di Aruba a bira kampion.
* * * * *
Ban Serio kampion Kopa ABC&S 50+ pa di dos aña siguí na 2018. Ban Serio a gana Surprise ku skor 10 pa 7 i bira kampion di Torneo Kopa ABC&S 50+ ku a tuma lugá na Pos Chikitu. Ban Serio a gana Astros i Surprise a dal Marlins den semi-final. Norman ‘Nonnie’ De Roon ku a drenta Ban Serio na 2018 tabata den gran forma durante di e weganan i a bira MVP di e torneo. Despues di wega tabatin entrega di premio i animashon musikal bibu na Stadion Pos Chikitu na Aruba. Ban Serio a bira kampion ABC na 2017 na Kòrsou.
* * * * *
Den Beisbòl Veterano ekipo Quality Stars ta sigi move den silensio. Nan ta tras di Ramiro Balentina ku no ta parse di ta bai kome riba e oferta di Quality Stars. Nos a trata di haña konfirmashon serka Ramiro Balentina, pero enbano. Jandoret Raiders ku a sali supkampion, probablemente lo no pèrdè masha hungadó. Isla Crackers si lo bini fuerte ku varios hungadó manera entre otro Verney Jansen i algún grandi mas na kaminda. Bulldogs ta e ekipo ku a pèrdè mas tantu hungadó klave. Ta trata di un tersera base, tres outfielder, picher ets.
* * * * *
Pa loke ta trata Weganan di Reino di Beisbòl Veterano, ekipo Santa Maria a bira kampion 2017 na Aruba. Na 2018 ekipo Jandoret Raiders a bira kampion na Kòrsou. 2019 tabata e ekipo Spuiters ku a bira kampion na Aruba. 2020 e torneo mester a bai Hulanda, pero a keda suspendé debí na Covid. Segun nos nunka tabata sigur ku Wega di Reino lo a sigi na Hulanda. E ekipo di Hulanda, Curacao Legends no tabata masha kontentu ku tur biaha nan mester bini Kòrsou òf Aruba pa e torneo.
* * * * *
Ekiponan ku a partisipá na e torneo di Reino na 2017 tabata Marlboro i Leftovers di Aruba, Jandoret Raiders i Santa Maria di Kòrsou ku Curacao Legends di Hulanda. Despues ku durante promé 3 dianan weganan a tuma lugá, djadumingu a toka turno na e 2 ekiponan ku a klasifiká pa final enfrentá otro. Ta trata aki di Santa Maria ku a klasifiká number 1 ku 3 wega ganá i Jandoret Raiders ku a klasifiká number 2 ku 2 ganá i 1 pèrdí. Santa Maria a titulá kampion ku un viktoria di 6 pa 1 riba Jandoret Raiders. Te otro okashon.
