Fanátikonan di Deporte Kòrsou, bontardi i felis siman. Fin di siman atrobe kargá ku aktividat di deporte espeshalmente Beisbòl i Sòftbòl Slowpitch. Djabièrnè e ekipo di Santa Rosa a bira kampion di Beisbòl Hubenil ganando di Wild Cats ku skor di 9 pa 2. Wild Cats tabata dilanti den e seri 1-0, pero Santa Rosa a gana djaweps último i depues djabièrnè pa bira kampion di Hubenil. Santa Rosa te ainda ta kampion den Dòbel A i awor kampion den Hubenil tambe.
* * * * *
Beisbòl Veterano a sigi ku e último wikènt di buelta regular. Djasabra sorpresa a kai kaminda Yesterday a gana di Santa Maria. Mester bisa ku gana òf pèrdè, for di e siman promé Santa Maria a sigurá e di 2 lugá riba e standing final ku e viktoria kontra di Santa Rosa. Djadumingu weganan di Liga 50 a sigi normal. Na momentu ku e kampionato kompletu di Liga 40 terminá, lo sigi ku weganan di Liga 50 pa hunga play-off di Liga 50 i terminá Beisbòl Veterano pa 2021.
* * * * *
Curacao Legends ekipo di peloteronan veterano (40+) di Hulanda lo ta na Kòrsou pa fin di òktober. Curacao Legends lo hunga kontra Bulldogs i Santa Rosa durante nan bishita na Kòrsou. Parse ku nan ke hunga kontra ekipo ku ta trese bòshi fanátiko pa mira nan den akshon manera tabata e kaso na 2018. Na 2017 tabata kampionato di Reino na Aruba kaminda Santa Maria a bira kampion. Na 2018 e ekipo Jandoret a gana Curacao Legends den final pa bira kampion di Reino. Na 2019 un selekshon di Aruba a bira kampion. Na 2020 i na 2021 no tabatin kampionato di Reino debí na Covid i mas sirkunstansianan. Nos a bisa na hopi okashon ku mester plania e torneonan aki 2 aña adelantá.(kada 2 of 3 aña).
* * * * *
Den Liga 50 na Van Engelen Balpark, ekipo Pitufos a gana di Flamboyan ku skor di 11 pa 3. Wega ku Pitufos a protestá despues ku nan a pèrdè e wega 11 pa 5. E wega a bai bèk kaminda Pitufos tabata dllanti 5 pa 3 i finalmente a bin gana 11 pa 3. Pitufos a protestá e regla kaminda koredó na tersera por nota solamente riba bataso. Flamboyan a gana e wega 11 pa 5, pero direktiva a bòltu e desishon i manda e wega bèk nan e inning ku e skor 5 pa 3 manera ariba menshoná. E desishon no a kai niun tiki den bon tera serka Flamboyan ku a manda un protesta adén, pero e protesta no a prosperá.
* * * * *
Interesante e di dos buelta di Liga 50, kaminda ekiponan lo bai hunga 4 wega mas pa despues bai play-off. Ekiponan bon pará ta Lions 8-1, Ban Serio i Baranka 9-2. Pitufos a terminá 6-3, Marlins 5-4, Flamboyan 5-4, Jaws 3-6, Mon Repos 2-7, Artemisia 2-7, Catpower 0-9. Den dianan benidero nos tin repartishon di pul. Ekiponan Lions, Ban Serio i Baranka ta hopi bon pará pa loke ta klasifikashon pa play-off.
* * * * *
Play-off di Liga di Nos Tur ta start e wikènt aki na Frank Curiel Ballpark. Ekiponan Chilling, Un Kara, Join Me i Sin Stress. Ekiponan Curacao Sweethearts i Shining Stars no a logra klasifiká. Standing final ta Chilling (8-2), Un Kara (7-3), Join Me (5-5), Sin Stress (5-5), Curacao Sweethearts (3-7), Shining Stars (2-8). Play-off ta start djabièrnè awor na Frank Curiel Ballpark ku wega entre Join Me i Sin Stress pa 8’or pm, wega entre number 3 i 4. Djasabra ta Chilling vs Un Kara, number 1 vs number 2.
* * * * *
Nos a risibí algun detaye di lidernan tambe pa loke ta trata Liga di Nos Tur. Lider den bateo ta Nathaly Lourens ku avg. 704 produkto di 19 hit den 27 turno. Carlientje Cleopa ta lider den wega ganá ku rekòrt di 5-0. Isonette Polonius otro hungadó di Un Kara ta lider den homerun di e liga. Nathaly Lourens ta lider den RBI ku 17 RBI den 10 wega. Churmelijn Eduarda picher di ekipo Chilling tin un ERA 1.05. Jeanderica Martina di Curacao Sweethearts tin 10 ponche tirá komo lider. Keda pendiente pa mas promoshon pa play-off di Liga di Nos Tur.
* * * * *
Play-off di Beisbòl Dòbel A a start ku viktoria di Wild Cats ku skor di 12 pa 9 riba Santa Maria. Djadumingu a sigi kayente ku e promé wega entre Royal Scorpions i Santa Rosa Indians. Nos a traha e kolumna promé ku e weganan entre Royal Scorpions i Santa Rosa. Play-off semifinal entre mesun ekiponan di temporada 2020. Te mayan ku Dios ké.
