Lesadónan di Deporte Kòrsou, bondia. Nos tei atrobe ku hopi informashon di Sòftbòl Slowpitch i Beisbòl Veterano. Espeshalmente riba e dos finalnan di 50+ ku tin e wikènt aki. Djasabra 4 di desèmber tin e wega finalisimo di Sòftbòl Liga 50 entre ekipo Baranka i Pitufos. Nos lo tin un kampion nobo den Liga 50, despues ku ekipo Ban Serio a dominá e último añanan den e kategoria aki. Ban Serio tabata kampion 2017, 2018 i 2019, miéntras ku na 2020 no a logra finalisá e kampionato. Djadumingu tin final di Beisbòl Veterano kaiminda Jandoret Raiders super kampion di Beisbòl Veterano 50+ lo topa ku Yesterday. Jandoret Raiders a bira kampion den Beisbòl Veterano 50+ 2017, 2019 i 2020. Nos ta bai chèk si tabatin Beisbòl 50+ na 2018.
* * * * *
E seri entre Baranka i Pitufos a empatá djadumingu último despues ku Pitufos a bini duru bèk i empatá e seri. Djasabra 27 di novèmber Baranka a gana e promé wega fásil 18 pa 7 pa medio di nòkout i Pitufos a dal bèk duru ku nòkout den wega number 2 di e seri final. Pitufos a gana ku skor di 14 pa 1 den wega number 2 di e seri djadumingu 28 di novèmber. Baranka a bati 6 homerun den e wega number 1 i Pitufos tabatin un homerun di Jurgen Kronstadt. 20 hit Baranka a bati den promé wega i Pitufos 11. Un fiesta di bataso pa e fanátikonan ku a bai Van Engelen Ballpark djasabra. Baranka a usa solamente un picher (Kenny Hellement) den wega number 1 i Pitufos a usa 5 picher. Johan Ciciclia (1.1 inning), Sidney Lourens (1.0), Sharlon Hanst (0.2) Carlos Madera (0.1) i Naai Hooi (0.2). Naai Hooi a tuma solamente un hit i no a tuma kareda den e wega di djasabra último.
* * * * *
Djadumingu manera nos a menshoná ariba, kosnan a bòltu formal. Pitufos a usa solamente un picher ku ta Johan Cicilia i Baranka a usa Kenny Hellement i Gino Valeriaan. Kenny Hellement a tira 4 inning i tuma 10 hit i 9 kareda i tira un kantidat haltu di 7 base por bola. Gino a tuma 5 kareda. Johan ‘Janchi’ Cicilia a tuma 1 kareda riba solamente 3 hit den 5 inning di trabou. Pitufos a manda e veteranísimo Sidney de Windt bai kècha. Bibi Gonet ku a hunga wega number 2 komo segunda base a bati di 3-2 ku un homerun (grandslam) pa kaba e wega pa nòkout den bòm di e di 5 inning djadumingu. Djasabra Bibi Gonet no a mira akshon. Nos a tuma nota di Song Sofia un dje grandinan di tur tempu den dugout di Pitufos. Song Sofia a risibí un turno djadumingu i a bai di 1-0. E úniko kareda di djadumingu tabata riba homerun di Sedeney ‘Spin’ Lourens.
* * * * *
Edmar Cornelia resio batiadó slengu di Baranka a risibi dos base por bola djadumingu i unu djasabra. Práktikamente tur batiadó a faya por lo ménos un turno i no tin niun batiadó di tur i tur den tur dos wega. Varios batiadó ku 3 i 4 hit den dos wega. En todo kaso kandela ta bai tin djasabra awor kaminda Baranka lo habri ku Kenny Hellement i PItufos ku Janchi Cicilia. Managernan ya a anunsiá e dos pichernan aki. Kenny Hellement ta poko leshoná i lo sosegá bon den siman pa presentá fuerte. Kenny su ERA tabata 4.00 promé ku e wega di djadumingu i awor ta 4.50. Johan Cicilia su ERA ta 7.97. Pitufos tin Naai ‘Graterol’ Hooi den bullpen i probablemente lo tira 2 pa 3 inning djasabra awor. Naai Hooi a tira kasi 9 inning durante henter e temporada aki i tin un ERA 5.65.
* * * * *
Ban pa play-of final di Beisbòl Veterano lo ku hunga un wega so djadumingu awor pa 2.30’or na Vi Jansen Ballpark. Jandoret tin 8 wega ganá i 1 pèrdi. Yesterday a terminá ku rekòrt di 5-4. Jandoret Raiders a gana Yesterday na dos okashon. 8 pa 2 dia 26 di sèptèmber i 3-2 dia 14 di novèmber. Jandoret a gana Vosama 8-0 den semi-final i ekipo Yesterday a derotá Sigi Hunga 7-4. Djabièrnè nos tin mas detaye di e play-off aki. Te djabièrnè ku Poder di Dios.
