Fanátikonan di Deporte Kòrsou felis atardi i felis aña un biaha mas Nos tei den 2022 ku informashon apart i úniko manera semper ora ta trata di Beisbòl i Sòftbòl. Nos lo sigi ku informashon varia di e deportenan ariba menshoná.. Den pitu di kambio di aña i despues riba dianan 1 i 2 nos a risibí algún informashon. By the way, saludo pa Hensley Meulens nos promé Big Leaguer. Djabièrnè, Bispu di Aña Nobo nos a pasa un ratu serka Hensley ‘Bam Bam’ Meulens na Bam Bam Tech Sports Zone. Tabata un eksperensia úniko i den simannan benidero nos lo tin mas di Bam Bam Tech Sports Zone.
* * * * *
Ekiponan Isla Crackers tabatin moveshonnan pa buska hungadó nobo den dianan di fiesta. E ekipo sup kampion di Kòrsou no a para ketu i a sigi move. Tin un grandi di Beisbòl Veterano na kaminda pa e ekipo Isla Crackers. Un hungadó di utilidat i tremendo batiadó. The Brothers a sigi move normal i ya tin papiá ku e ekipo ta rumbo pa play-off di kampionato 2022. No ta konosí ainda kon e formato di e kampionato di Beisbòl Veterano 2022 lo ta. E aña aki tambe lo hunga tantu den Liga 40 komo Liga 50 di Beisbòl Veterano. Tur ekipo ta mustra stabil. Den 2021 un wega a terminá pa forfeit ku tabata Marlins den un wega kontra Santa Maria Pirates den ougùstùs 2021. Marlins a logra bini bèk kompletu i a logra gana dos wega i pèrdè 10 den e kampionato den sótano empatá ku Otrabanda.
* * * * *
Den dianan ku a pasa tabatin rumor ku Siamani Boekhoudt a pasa pa Wild Cats. Esaki ta debí ku Siamani a saka un pòtrèt huntu ku Kenley Jansen, Fredje Gomez, Archie Jansen i Darren Da Costa Gomez. Hendenan sa bisa ku no tin huma sin kandela, pero parse ku tabata dia Siamani a hasi aña i ela saka un pòtrèt ku e grupo. Un fuente di Santa Rosa a bisa nos ku Mani Boekhoudt no a bai niun kaminda i elo keda ku Santa Rosa Indians ku tin plan serio e aña aki. Santa Rosa a logra haña Calten Daal di Wild Cats, Shair La Crus di Firebirds, probablemente Terrence Goeloe kècher di Royal Scorpions. Varios kambio òf moveshon entre Royal Scorpions i Santa Rosa. Nos a sera aña kayente ku e kambio i moveshonnan den Beisbòl den edishon di dia 31 di desèmber.
* * * * *
Ultimo simannan nos tin bon kontakto ku Edsel Wilson di ekipo Danger. Edsel Wilson ta biba na Belgie último añanan despues di varios aña na Hulanda. Danger a start na Liga Divi Divi serka Donata i Doei Fullinck. Di einan e ekipo Dangers a pasa pa hunga na tereno di Frank Curiel ku awor a bira Frank Curiel Ballpark. Despues ku a lanta Liga Trai Seru, Danger a hunga algun aña pa despues Edsel bai Hulanda na 2000 i na 2002 lanta e tim bai partisipá den Nederlands Softball Bond. A kuminsá den 5de klasse, bai 3 de klasse i ora a promové mester a bai Hoofdklasse bou di otro nòmber ku ta Danger Banda di Kas. Despues Danger a bira ekipo 40+ na 2018 i aworaki ta rumbo pa hunga 50+ so na Hulanda. Danger ta Edsel i Edsel ta Danger. Nos lo bini ku e historia mas largu i mas detaye despues.
* * * * *
Flyer di Torneo Wim Felicia ya ta riba merkado i invitashonnan ta pendiente pa sali. E torneo lo tuma lugá dianan 1, 2 i 3 di yüli na Kòrsou. Ekiponan di Aruba, Boneiru i Kòrsou lo kompetí den e liganan 40, 50 i 60. Den 2022 Wim ta selebrando 47 aña tirando Slowpitch na Kòrsou i rònt Dutch Antilles, Hulanda i den region. Wim ta pichando aworaki solamente den Liga 60+ ku ekipo Nos Tambe Por i ta e picher ku a gana mas wega di tur tempu den Sòftbòl Slowpitch. Nos tur ta pendiente di desishonnan di Gobièrnu pa organisashonnan por ranka sali ku e torneonan tradishonal. Organisadónan di Torneo FABB a saka un komunikado djarason 5 di yanüari 2022 ku e torneo a keda suspendé atrobe manera tabata e kaso na yanüari 2021. Nos ta keda te aki.
