Fanátikonan di Deporte Kòrsou. Nos tabatin un fin di siman kargá ku deporte atrobe. Hopi Beisbòl i hopi Sòftbòl Slowpitch na Kòrsou. Den Beisbòl Veterano skornan grandi a kai den wikènt durante weganan na Tio Daou Ballpark. No ta konosí ku ta start ku weganan di Wild Card dia 2 di òktober òf ta hunga e weganan ku falta pa loke ta trata e kampionato regular. Ekiponan Bulldogs, Quality, Marlins a hunga tur nan wega for di djasabra. Jandoret, Isla, The Brothers, lo yega e kantidat di weganan ku ta 19 djadumingu pasá.
* * * * *
Djasabra Bulldogs ku ya a klasifiká a dal Quality Stars durisimo ku skor di 14 pa 2. Tantu Bulldogs komo Quality Stars a terminá e kampionato regular ku rekòrt di 8-4. Bulldogs lo keda komo number 4, miéntras Quality lo bai number 5. Quality lo hunga e promé wega di Wild Card kontra di Santa Rosa ku a terminá number 6. Ganadó di 5 vs 6 lo topa Bulldogs. Play-off di Beisbòl Veterano lo ta interesantísimo atrobe. Santa Rosa falta un wega ainda kontra di Otrabanda. Djasabra awor tin 3 wega. Otrabanda- Santa Rosa, Santa Maria vs Yesterday i Vosama kontra di Marchena.
* * * * *
Den Liga 50 Baranka a sorprendé ekipo Ban Serio a bai na di dos lugá. Ku otro palabra, Baranka a empatá ku Ban Serio na di dos lugá. Na promé lugá ta ekipo Lions ku tin 7 ganá i 1 pèrdí. Tin algún wega ku mester tuma lugá, pa despues start ku e di dos buelta, kaminda lo hinka e ekiponan den dos pul di 5, ké mèn tur ekipo lo bai hunga 4 wega mas. Ekiponan Ban Serio, Baranka i Lions ta den posishon sólido pa klasiifiká. E klasifikashon pa loke ta trata puesto 4 lo bai bira un lucha tenás entre ekiponan Flamboyan, Marlins i PItufos. Standing kompletu despues di weganan di wikènt ta Lions 7-1, Baranka 7-2, Ban Serio 7-2, Flamboyan 6-3, Marlins 5-4, Pitufos 5-4. Jaws 3-6, Mon Repos Sluggers 2-7, Artemisia 1-7, Catpower 0-7. Tene kuenta ku mester sigi e wega entre Flamboyan i PItufos.
* * * * *
Liga Amstel a sigi ku 4 wega djasabra na Van Engelen Ballpark. Den e promé wega Cicoza a gana Terrepower ku skor di 16-11. Terrepower a bati 5 homerun kontra 2 homerun so di Cicoza. Einan nos ta mira ku no ta batimentu di homerun so ta gana wega. Bo mester drei komo ekipo i picheo, defensa, korementu di base tambe mester ta OK pa un ekipo por sali viktorioso. Raylison Gijsbertha den tremendo relevo pa Cicoza a gana e wega i Gerson Adamus a bati di 3-3. Edmar ‘Boy Motor’ Cornelia 54+ ainda ta kompetí den e hóbennan i a bai di 3-3. Gerson Adamus a konektá un homerun pa Cicoza. Tabata e promé wega di Gerson Adamus pa Cicoza den 2021. Un gran refuerso i èks mundialista di Little League na 2004 huntu ku Jonathan Schoop i Jurickson Profar.
* * * * *
Den otro weganan di Liga Amstel, Gamers a gana Sugar ku skor di 10 pa 8 ku homerun di Kevin Boekhoudt. Ekipo Sugar kargá ku Latino a kai na 4-6, miéntras Gamers tin 6-4. Bombers a dal X-Treme 12 pa 10 den un wega pèrtá. Bombers a usa dos picher velos ku ta Alexander Rodriguez i Julius Veeris i ekipo X-Treme a faha bon, pero tòg keda kòrtiku. Bombers ta den kabes di Liga Amstel ku rekòrt di 8-2. Den e último wega di Liga Amstel di djasabra, Terremoto ku bon picheo di Biggy Pereira i Gideon Noor a gana Thrillers ku skor di 17-14. Thrillers a skor 6 kareda den nan último chèns, pero keda kòrtiku.
* * * * *
Standing di Liga Amstel despues ku tur ekipo a hunga 10 wega ta lo sigiente. Bombers 8-2, Cicoza 7-3, Gomers 6-4, Thrillers 6-4, Sugar 6-4, X-Treme 6-4, Terremoto 3-7 i Terrepower 2-8. Liga Amstel ta sigi djasabra awor ku 4 wega na van Engelen Ballpark. Play-off di Liga di Nos Tur ta pendiente pa start mas o ménos aki dos siman den Frank Curiel Ballpark. Te ku weganan di wikènt pasa e standing ta lo sigiente. Chilling 8-2, Un Kara 6-2, Join Me 5-4, Sin Stress 4-5, Curacao Sweetheart 3-7 i Shining Stars 2-8. Den Beisbòl Dòbel A Marchena Stars ku picheo di entre otro Roy Philips a sorprendé Wild Cats ganando 6-5. Roy no tabata e picher ganadó, pero si e picher habridó di e wega. Richard Moesker èks Wild Cats a gana. Roy a tira 4 inning i tuma 4 kareda. E picher ku mas edat a habri un wega di Dòbel A. Segun nos, Roy Philips tin 57 aña.
