Informashon di Futbòl lokal Dick Advocaat presente i standingnan internashonal
WILLEMSTAD- Awe nos tin informashon di futbòl lokal, riba tereno di selekshon, Dick Advocaat presente i ela duna informashon den konferensia di Prensa djasabra 27 di yanüari 2024. Tambe nos tin resultadonan lokal i standingnan internashonal. Nos tin tambe komentario di Eldon ‘Peppi’ Sulvaran.
KÒRSOU SU KONTRINKANTENAN PA E SEGUNDO BUÈLTA DI KUALIFIKASHON PA MUNDIAL 2026 TA KONOSÍ!
Resientemente CONCACAF a tene su sorteo pa e segundo buèlta di e partidonan di kualifikashon pa Mundial di FIFA 2026.
Un total di 30 pais a wòrdu repartí den 6 grupo di 5 pais di kual Kòrsou ta forma parti di grupo C huntu ku Haiti, St. Lucia, Barbados i nos ‘hermana isla’ Aruba.
Lo tin un total di 4 partido, 2 na kas i 2 afó, ku ta inisiá na yüni 2024 pa despues kontinuá ku demas partidonan otro aña.
E 2 paisnan ku terminá na promé ku segundo puesto ta klasifiká pa e siguiente buèlta.
Preparashonnan ta bai kuminsá pa nos selekshon nashonal su kompromispnan pa e partidonan di kualifikashon pa Mundial di FIFA 2026.
Keda pendiente pa mas informashon...
DICK ADVOCAAT I SU STAF TA NA KÒRSOU PA SERA KONOSÍ KU
PUEBLO DI KÒRSOU!
Djabièrnè den oranan di atardi sr. Dick Advocaat a yega Kòrsou riba buelo di KLM i mas anochi e demas miembronan di su delegashon a yega riba buelo di Corendon.
Djamars den transkurso di dia e direktor tékniko di nos selekshon, sr. Khalid Sinouh a yega Kòrsou i ta preparando pa nan introdukshon ofisial na tantu e miembronan afiliá na FFK i tambe e miembronan di prensa durante 2 aktividat ku lo tuma lugá dia 26 di yanuari 2024 na Corendon.
Manera ya nos a anunsiá den nos komunikado di 15 di yanüari último, djasabra awor FFK lo tene un konferensia di prensa pa introdusí e direktor tékniko sr. Khalid Sinouh, e entrenadó sr. Dick Advocaat i e demas miembronan di e kuerpo tékniko ku lo guia nos selekshon nashonal maskulino durante e trayektoria pa kualifikashon pa Mundial di FIFA 2026.
Athunto por tuma nota di algun imáhen di e yegada di sr. Dick Advocaat den kompania di miembronan di direktiva i personal di FFK ku a bai risibi’é na aeropuerto.
Komentario di analista di Futbòl Pepi Sulvaran
E DIOSNAN TA KU ‘PANTERA NEGRA’
Ganga ganga
Di tur e paisnan ku a partisipá na e sorteo pre-mundial di CONCACAF, nos a sali mas mihó ku tur otro. Riba papel e promé 9 puntonan ta sigurá. Di e seis ekiponan mas fuerte ku nos, ku tabata den potjie 1, nos di pòchi 2 a saka Haiti, ku ta esun di mas débil, rankia na number 89, un puesto mas haltu ku nos riba lista di FIFA. E promé fase ku lo wordu hunga na juni 2024 i juni 2025 ta mustra un ganga, estilo di ‘esta barato dame dos’. Nos promé wega e aña aki lo ta kontra Barbados (rankia 178) den nos kueba di Panter na Brievengat. Después di esei den mes luna, nos lo enfrentá nos rumannan di Aruba (rankiá 193), den nan kas, si nan stadion ta kumpli ku eksigensia internashonal. Un bon oportunidat pa nos baha riba e lugá.
E di tres wega ta otro aña, promé kontra St. Lucia (rankia 167) den Ergilio Hato i nos ta kaba kontra Haiti den nan kas. E lastu aki no ta probabel. E siman ku a pasa, Haiti a pidi komunidat internashonal pa yuda saka nan pais for di e fièrnu ku nan ta aden, ku hopi matamentu, sekuestro, sakeo etsétera. Esei kemen, ku probablamente nos lo no enfrentá nan den ‘Silvio Cator’ ku nan fanatikada ferviente, kaminda ta difisil pa kontrinkantenan, pero pafó di nan kas, sea na Miami of Trinidad kaminda tambe nan sa hunga. Esaki por ta un bentaha.
Un pia den buelta final
Tur kos ta indiká ku ‘Pantera Negra’ ya kaba a mete dos pata den e buelta final ku ta e antesala di bèrdat pa mundial 2026 di e anfitrionnan Canada, Merka i Mexico. Paso si ta bon, riba papel, ora nos enfrentá Haiti, ya nos lo tin 9 punto i un di e dos puestonan pa pasa pa e lastu buelta di CONCACAF. Pasobra e dos mihó ekipo di kada un di e seis gruponan den e promé ronda, lo kompletá 12 ekipo ku lo wòrdu partí den 3 grupo di 4. Esakinan lo hunga otro aña di sèptèmber pa novèmber 2025 i e paisnan ku sali promé den e 3 gruponan di 4 lo klasifiká dirèkt pa mundial. E ora ei ta sobra solamente un puesto via di e kaminda largu di play-off pa CONCACAF.
Otro aña si ta kos serio
Ke men apesar di tur problema den FFK i apesar ku nos tin un kuerpo tekniko konsistiendo den su gran mayoria di hendenan di edat hopi avansá, pasa e promé buelta di pre-mundial no mester ta un problema, hasta si no bin mas hungadó aserka. Otro aña si e kos lo ta mas serio i mester fortifiká tantu e kuerpo tékniko, sea parsial of kompletu i sigur mester di mas hungadó. Paso e kontrinkantenan den e grupo di 12 lo ta muchu mas serio ku den e promé buelta. Den nan lo tin yen pais mundialista, manera Jamaica, Costa Rica, Honduras, El Salvador, Panama, Trinidad, El Salvador i Haiti mes. Aparte di esakinan, Surnam tambe ta bin ku un trabuko. Meskos ku nos, ta wòrdu spera ku nan tur lo sobrebibí ku nan dede den nan nanishi e promé ronda aki.
Mester di mas hungadó
Pa por enfrentá un òf mas di e paisnan den e ronda final pa un puesto direkto, mester di mas hungadó i sigur no hungadó ku ta hunga riba di 3 nivel den Serie C-B na Italia, manera a anunsiá después ku e kuerpo tékniko nobo, ku sorprendentemente ta inkluí un agente di hungadó den e parti tékniko, lokual riba su mes kaba ta algu straño, a anunsiá poko dia pasá. Jamaica por ehèmpel, ku ta esun mas fuerte di e paisnan ku tin ku hunga premundial di CONCACAF, ta bin ku por lo menos 6 hungadó di Liga Premier di Inglatera. Di tres nivel na Italia ta un poko mas abou ku di dos nivel na Ulanda. Si nos no logra haña hungadónan manera Bazoer, Obispo, St. Jago, Chong, Robertha i otronan ku ta hunga riba e nivel máksimo nos no ta bai yega. Esaki tambe, si entre otro Room, Bacunanan, Gaari, Roemeratoe, Floranus , Gorré, Zivkovic i Locadia lo ta dispuesto na sigui hunga bou di e kambio di mando tékniko aki, ku ta enserá agente di hungadó. Nos no sa esei, awor ku un gran parti di e grupo aki, hasta por eskrito a duna di konosé ku ta bou di Dean Gorré nan ke hunga. Tur esaki ta di warda wak. Laga nos spera, ku nan tur lo ta dispuesto pa bin huntu ku e vetaranonan ku por yuda nos te ku otro aña, manera Anita ku Cuco Martina, di kual e lastu aki hasta komo kapitan, meskos ku Room ya pa basta día kaba a pone nos selekshon un banda, pa aparentemente mal kontentu. Asina so nos tin un chèns pa presentá na e fièsta di mas grandi na mundo i mesora tambe komo e país di mas chikitu ku a alkansá baile final di e deporte Rey. Ta di ban wak.
%20copy.jpg)
