Lesadónan di Deporte Kòrsou, bontardi. Djaluna 11 di yanüari tabata un dia krusial kaminda gobièrnu a anunsiá adpatashon di e medidanan tumá na komienso di desèmber. Beisbòl Veterano ta pendiente pa terminá kampionato di 2020 fin di luna. Liga di Nos Tur lo bai tene un reunión pa wak si ta kaba termporada 2020 kaminda ya e ekipo Un Kara tabata den final. Direktiva di Liga 50 tabatin un reunión e siman aki pa wak kiko lo bai pasa. Ku ta sigi kampionato 2020 ku tabata falta algún wega pa terminá buelta number 1 òf ta start di nobo.
* * * * *
Dr. Jerry Booi presidente di Liga 50 a yama e reunión. E reunion a tuma luga dia 11 di yanüari. Den dianan benidero nos lo tin mas detaye. Jerry no tabata niun tiki kontentu kon direktiva a atendé kuné durante 2020. Jerry: “Tin sierto miembronan den direktiva ta gewon kontra tur loke ami bini kuné komo proposishon. Chèns ta grandi ku mi lo bula’fo i sigi atendé ku mi tim i laga nan forma e direktiva. Un presidente mester tin konfiansa di su direktiva. Tin ku ta kritiká asta un moveshon di Trai Seru pa Van Engelen Ballpark kaminda ku e liga a bai hopi dilanti. Sigur 3 pa 4 biaha mas entrada ku tabata tin na Trai Seru.” Nos ta keda pendiente pa desaroyonan ku tin den Liga 50 di Sòftbòl.
* * * * *
Torneo 60+ stail di bario pa bario tambe ta pendiente. Durante añanan e torneo organisá pa Rudy Brunken, motor tras di lantamentu di Liganan 40, 50, 60, tabata eksitoso. Esnan di 60+ ta mas vulnerabel pa Covid-19, pero mester bisa ku ta úniko liga den Sòftbòl Slowpitch i Sòftbòl Veterano ku a terminá eksitosamente den 2020. E torneo a yega di hunga na Zapateer, Montaña, Frank Curiel Ballpark i último añanan hopi aktivo na Aishel Hooi Ballpark na Rio Magdalena, kaminda famianan ta sigi pa playanan na Banda Bou despues di e weganan.
* * * * *
The Greatest tambe ta pendiente pa un Habri Aña ku su miembronan. Aña pasá tabatin un tremendo Habri Aña. The Greatest, ku ta e organisashon di umpire i skorernan di Sòftbòl, den pasado a bishitá varios pais, entre otro Brasil, Panama, Colombia, Costa Rica ets. E organisashon a pèrdè un grandi den luna di desèmber ku ta Kenneth ‘Kenchi’ Ortega (QEPD), hòmber kumplidó. Nòmber di Kenchi a keda zona ketu bai den hendenan di Slowpitch, 40 i 50, den arbitrahe (The Greatest) i den su koleganan i ekiponan di MCB. The Greatest ta pendiente pa traha den torneonan ku ta na kaminda. Manera ta konosí Torneo The Greatest mes no ta sigi. Organisadónan di Torneo Amstel Bright ta pendiente di desishon di gobièrnu den kuadro di medidanan di Covid-19.
* * * * *
Dor ku kampionatonan di Liga 50, Liga di Nos Tur i Beisbòl Veterano no a terminá, no por a tende di e kambionan manera ta normalmente. Segun un fuente di nos, Raymond Soerka di ekipo Marchena Stars ta agente liber. Tremendo picher/kètcher ku a sali kampion picher na sigur 5 okashon den Beisbòl Veterano. Ray Soerka a hunga den 2019 i 2020 den ekipo Marchena sin ku e ekipo a logra klasifiká. Den pasado Ray Soerka a bira kampion ku Jandoret i klasifiká ekipo Santa Maria pa play-off. Santa Maria Pirates pa medio di nan magnate a logra kue dos outfielder for di ekiponan ku a klasifiká pa play-off. Un di e outfieldernan ei ta un gran picher tambe. Keda pendiente pa mas detaye kayente den dianan benidero.
* * * * *
Saludo pa sr. Felip Guanipa di ekipo Curacao Sweetheart, ku den 2021 si lo debutá den Liga di Nos Tur. Den Liga di Nos Tur ekipo Un Kara a klasifiká invikto pa final i ta wardando kiko ta bai pasa den 2021. Skibiendo di invikto, ekipo Nos Tambe Por a kaba kampionato 2020 di Liga 60 invikto. Mester bisa si ku nan a gana mas o ménos 10 wega. Den historia, ekipo Catpower tambe a bira kampion invikto den Liga Trai Seru aña 1995 i despues den Liga 40 na 2006.
Nos ta keda te aki.
