Fanátikonan di Deporte Korsou bon dia. Nos tei atrobe ku hopi informashon di Beisbòl i Sòftbòl Slowpitch. Rhiëncy Imperator a pasa ofishalmente pa Groot Kwartier Stars. E versatil shorstop/infielder ta spera un gran aña den 2021. Rhiëncy Imperator tin 37 aña i tin algun aña mas bon den Beisbòl Dòbel A pa despues pasa pa Beisbòl Veterano. Groot Kwartier ta a la karga den 2021 ku vários hungadó nobo manera nos a menshoná siman pasa den e kolumna aki. Rhiëncy Imperator, Gedeon Sambo, Madison Ortega i Marlison Brunken ta esnan mas konosí ku a djòin Groot Kwartier Stars riba nivel Dòbel A.
• * * * * * *
Direktiva di Beisbòl Veterano (BEVEKO) a yama ekiponan pa un reunion general ku lo tuma lugá djaweps 11 di febrüari di 7 pa 9 di anochi na NAPB. Den e reunion nan lo eligí miembronan nobo pa direktiva pa 2021. Direktiva di BEVEKO ta partisipá tambe ku e wega final entre Jandoret Raiders i Quality Stars lo ta dia 7 di febrüari 2021 den Stadion Johnny Vrutaal, sin fanátiko. Direktiva di Beisbòl Veterano ta presidí pa Ruisandro Cijntje ku Roderick Sambo komo vise-presidente. Nadilusca Sambo ta sekretario general i Vanesca Laker ta tesorero. Gilbert Denisia ta direktor di kampionato. Ruisandro Cijntje ta baha i ta bai pa un otro reto den politika ku Partido Nashonal.
• * * * * *
Weganan di Minor i Little di Liga Pabou a start na Jandoret Ballpark i Frank Curiel Ballpark. Nos ta tratando na haña resultadonan tantu di Liga Pariba komo Liga Pabou. Pronto lo tin mas detaye di play-off i torneonan regional. Naturalmente ta dependé di desaroyonan di Covid-19 na Kòrsou pa wak kon ta bai sigi den lunanan benidero. Kampionato Minor/Little League a start teniendo kuenta ku medidanan di Covid-19. Junior/Senior, Torneo Kenley Jansen ta start e wikènt aki.
* * * * *
Djamars 2 di febrüari nos amigu Jay Jay di Quisqueya a manda bisa nos ku e ekipo tin 30 aña di eksistensia. E ekipo a keda fundá na aña 1990. Nos ta kòrda Quisqueya pa hopi tempu den Liga Van Engelen. Otro ekiponan tabata bula mesora riba e hungadónan bon Dominikano di e ekipo Quisqueya. Nos ta kòrda un hungadó ku yama Domingo Seminiel ku a sali kampion bate i mesora ekipo Marlins a bai ku e hungadó aki for di ekipo Quisqueya. Quisqueya a partisipá na Liga van Engelen 2019 i klasifiká pa play-off pero a pèrdè dos wega sigi Diamond Miners. Quisqueya tin hungadónan manera Nisandro Cleofa, Osea Anastacia, Christopher Felicia, Rylan Reina i e otronan tur ta Latino. Na 2020 no tabatin kampionato di Liga van Engelen debí na Covid-19.
• * * * * *
Saludo pa Irving ‘Skippy’ Sambo eks estrea di Beisbòl Little League. Skippy a subi ku Santa Maria Pirates i despues a hunga den entre otro Curacao Marlins. Na aña 2000 tabatin un wega di Strea i Skippy a gana e homerun Derby. Irving 'Skippy' Sambo a konektá 4 homerun i bira e kampion Homerun Derby. Skippy tabata hunga e tempu ei den ekipo Curacao Marlins. Curacao Marlins a bari den premio pa loke ta trata e wega di Tur Strea. Debí ku Luigino Coffie tambe di Curacao Marlins tabata e picher ganadó i mihó batiadó (di 2-2) pa Pariba gana Pabou ku skor di 5-4 den luna di yüli 2000.
• * * * * * *
Vários kambio grandi na kaminda den Beisbòl Veterano. Un dje hungadónan mas buska ta Kelvin Winklaar ku a hunga e último 7 añanan ku Bulldogs. Kelvin Winklaar nos ta kòrda a start den Beisbòl Veterano ku e ekipo di Groot Kwartier ku no ta eksistí mas den Beisbòl Veterano. Kelvin Winklaar a karga Bulldogs e último añanan. Parse ku Kelvin Winklaar lo no keda den Bulldogs i ta agente liber. Dos tim takiyero kasi profeshonal den Beisbòl Veterano ta loko tras di e hungadó aki. Kelvin Winklaar ta un dje hungadónan ku mas poder den Beisbòl Veterano i na dos okashon a sali lider di homerun.
• * * * * * *
E tim ku ta mas aktivo despues di temporada 2020 ta Santa Maria Pirates ku tabata kampion na 2019. Na 2020 a ekipo no a logra yega semi-final i a keda kòrtiku despues di e round robbin di 6 ekipo. Marchena Stars tambe ta moviendo bon i Santa Rosa Memories tambe lo risibí algun hungadó. Bulldogs ta bezig ku reorganisashon total. Despues di e final entre Jandoret Raiders i Quality nos lo lòs vários nòmber di hungadó ku a keda di bai pa otro ekipo.
