Lesadónan di Deporte Korsou, saludo. Nos tei atrobe pendiente pa un siman trankil ku
nada nada di deporte. Awor nos ta pendiente pa wak kiko lo bai tin despues ku pueblo di Kòrsou
kuminsá risibí e vakuna. E dianan aki nos lo bai bèk den tempu, tempu bon di Slowpitch i Beisbòl
Veterano. E dianan aki nos a pasa riba algún pòtrèt di Sòftbòl Slowpitch den añanan 2000 bin ariba.
Varios pòtrèt di Kopa ABC&S di 2003 kaminda ekipo Baranka a bira kampion. Na e okashon ei nan a gana Carpatula den final. Na 2002 Carpatula tabata kampion ganando di ekipo Baranka den final. Na 2003 e Kopa ABC tabata na Boneiru i na 2002 tabata na Kòrsou.
* * * * *
E tempu ei ainda Kopanan ABC&S tabata tuma lugá alrededor di Aña di la Reina ku e tempu ei tabata riba 30 di aprel. Tabata kombiná e dianan liber di 30 di aprel ku 1 di mei pa organisá e gran evento aki. Na 2003 tabata kombiná ku Dia di Rincon na Boneiru. E tempu ei ku Air ALM bo mester ta
tempran pa haña lugá riba buelo i lugá pa keda na Boneiru. Ekiponan La Sonrisa nan aki tabata
kompetí pa Boneiru. Ekipo Royal Power, Happy Brothers, Calabas ets pa Aruba. Ekipo
Windward Island Bank Lions a kompetí pa promé biaha den e Kopa ABC na Boneiru 2003 i e
torneo a bira Kopa ABC&S. Ekipo Marlins, e tempu ei di Jerry Booi, tambe tabata presente na
Boneiru huntu ku Swift i Terremoto naturalmente. Terremoto ta e promé kampion di Kopa ABC
na 1984 i despues nunka mas ekipo di Terremoto no a bira kampion.
* * * * *
Swift a bira kampion pa promé biaha na 1995, despues na 2005. Di 2005 pa 2019 Swift a bira
kampion na 10 okashon den 14 partisipashon. Swift ta dominá den Kopa ABC&S den último
añanan ku un tremendo preparashon i bon reforsá. Laga nos ban pa detayenan di Kopa
ABC&S pa 2021. Akinan tin un diferensia di opinion, debí ku un grupo ta haña ku no ta
responsabel pa organisá Kopa ABC&S pa 2021. E otro grupo ta pensa ku mester por na 2021.
Tur kos ta dependé di kon ta bai ku vakuna i desaroyonan den kuadro di Covid-19. Ekiponan
Swift i Terremoto ta enkargá ku organisashon di Kopa ABC&S pa loke ta Kòrsou.
* * * * *
Bèk den tempu. Nos a dal den un pòtrèt di Curacao Yankees ku Oscar Bolivar na kabes.
Hungadónan manera Wendell Elisabeth, Axel Levenstone, Quincy Kook, Rylan Capella, Hubert
Perozo, Pong Pong Plantijn, Jefferdion Polonius.ets. Segun nos pòtrèt di aña 2002, 2003. Ekipo
Curacao Yankees na 2018 a bira Firebirds ku Hensley Josephina èks Curacao Yankees/Wild
Cats komo e promé manager di Firebirds. Ekipo Firebirds bou di maneho general di Jason Jones i
ku Ghionelo Jansen komo manager a hasi vários kambio i nan ta konvensí ku nan lo por
penetrá den e promé 4 nan di Beisbòl Dòbel A.
* * * * *
Pasando den nos file i pòtrètnan nos a dal den diferente hungadó, dirigente i ekiponan. Ekiponan Armendares, Padres, Buena Vista Power, Bou di Palu, Pepina, Warwaru (Hulanda), Baranka di Liga van Engelen. Hungadónan Frank Danies ku unifòrm di Aruba Bank, Gino Valeriaan pichando pa Baranka den ABC 2003. Gilford Schmidt di Dalpega, Mayron Martinus ku unifòrm di Diamond Backs, Gregory Martijn di Marlins, Gregory Lourens ku ekipo Padres Sahart. Gregory Zimmerman den ekipo Uniko, Gregory Reina di Baranka, Pooy Flannegin di Happy Brothers., Happy Time ku Geronimo Daflaar, Johnny Martina (QEPD), Elton de Castro i Giovanni Atalita, Hensley Josephina den unifòrm di Swift. Hensley Wanga di Sahart Padres. Mas hungadó aki Hildo Bernadina ku unfòrm di MCB durante torneonan entre bankonan na komienso di 2000.
* * * * *
Sherman ‘Cai’ Leonora den hugada spektakular komo segunda base di Marlins den un tremendo pivot pa primera kontra di Swift den Kopa ABC na Boneiru. Jenny Paulina komo coach/skorer den unifòrm di Douane fin di añanan 90, Isolda Anasagasti mama di Renato Anasagasti komo skorer di Intergubernamental añanan 2000. Ekipo Isla Rangers ku Baba Hatona, Jay Jay i Jonis ku tabata presidente di Liga Un i Tur, Jajo Hollander den unifòrm di Bombers despues den unifòrm di Jandoret Raiders. Jay Jay Martina ku ekipo di Baranka den añanan 90 na Suvek Ballpark. Jo-Andy ‘Enchi’ Balentina hopi hóben pichando pa Buena Vista Power, komo hungadó di Hubenil Senior League, pero pichando den Torneo Baranka. Nos ta keda te aki pa awe. Keda pendiente pa mas.
