Lesadónan di Deporte Kòrsou, bondia. Nos tei atrobe i ta sigi ku e resumen di Sòftbòl Slowpitch i Beisbòl Veterano. Awe nos ta bai bèk den resultadonan final di Torneo Amstel Bright ku tabata eksitoso atrobe. Torneo Amstel Bright a terminá net na momentu ku a kuminsá tuma medidanan di Covid na Kòrsou. Torneo Amstel Bright a start 15 di mart 2020 i su djaluna a kuminsá tuma medida ku seramentu di skol ets. Torneo Amstel Bright a terminá den gran forma ku Van Engelen Ballpark kargá ku públiko.  Despues tabata ayo i ta te den yüni algun liga a kuminsá move.

* * * * *

Nos a yama algun fuente di e liganan ku tabatin weganan ku a tuma lugá aña pasá. Di Liga di Nos Tur nos a tende ku no ta sigur ku lo sigi e kampionato di 2020 den 2021. Mester bisa ku Liga di Nos Tur ta e liga ku a yega mas leu, debí ku ya tabatin ekipo Un Kara den final i gran faborito pa bira kampion. Ekipo Un Kara tabata realmente un dream team den Liga di Nos Tur. Reunion lo pone pa wak si ta kaba e kampionato di 2020 den 2021 òf lo kuminsa kompletamente di nobo.  Nos a risibí informashon di Liga 50 tambe.  Parse ku dr. Jerry Booi lo bai baha komo presidente, debí ku e no ta risibí koperashon di miembronan di e liga durante reunionnan.

* * * * *

Jerry Booi a hasi un tremendo trabou moviendo di Trai Seru pa Van Engelen,  kaminda entradanan di bar a bira kasi 4 pa 5 biaha mas tantu. Na momentu di entrega di relato di kampionato 2020, tur hende lo ripará e adelanto ku tabatin den Liga 50. Liga Amstel tambe ta sumamentu kontentu ku Liga 50 a djoin i asina trese bida den Liga Amstel djasabra na Van Engelen Ballpark. Varios ekipo ku a sostené Jerry lo trata na konvensé dr. Booi pa keda por lo ménos un aña mas.

* * * * *

Nos a tuma kontakto ku Sergio Leon ku ta presidente di Liga Amstel. Sergio a bisa nos bai puntra Gobièrnu kiko ta bai pasa otro aña. Liga Van Engelen no a logra start te pa terminá den 2020. A resultá ku no tabata mal idea si, debi ku no ta masha liga a logra terminá. Ta solamente Liga 60 a terminá i Beisbòl Veterano un òf algún inning pa terminá. Liga 40 tabata manera mal pegá promé ku asuntu di Covid dal adén. Beisbòl Veterano tin Liga 40 wantá, pero tòg mester bisa ku Liga 40 no por stroba Beisbòl Veterano, debí ku e fechanan ta leu. Liga 40 ta move den siman riba djamars i djaweps. Beisbòl Veterano ta djasabra i djadumingu. Pero e hungadónan por keda kansá di Beisbòl i no por yega den siman.

* * * * *

Informashonnan di Beisbòl Dòbel A a wanta un ratu. Nos no a tende nada masha dia. Nos amigu Madison Ortega a pasa di Firebirds pa Groot Kwartier Stars. Madison Ortega ku ta un bon kètcher manera su tata Eldrin Ortega, a  partisipá den 8 wega i bati pa averahe di .273, ku ta un bon averahe pa un kètcher. Ta trata di un hungadó ku lo move mihó si e haña mas playing time i hunga regular. Firebirds a haña varios hungadó i nan ta move bon. Jourmich  De Hooi yu di Michael Windster a bira manager di Firebirds Hubenil.  E ekipo a haña Aldrich Isenia, Shair Lacrus, Shedion Lacrus, Arguentley Bonifacia, Nathanael Macaya, Sorick Liberia i varios mas. Nan a firma hungadónan ku tabata tei kaba manera Cedeon Langguth i e estrea di Aruba, Norangelo Jacobus ku a destaká den Sòftbòl Fastpitch den fase final.

* * * * *

Ekipo Firebirds tin tur kos pa penetrá den e 4-nan temporada benidero. Ta algún hungadó di kaliber nan a haña pa bai gera. E ekipo ta dirigí pa general manager Jason Leonora i manager Ghionelo Jansen.  Nan a kuminsá move kaba den luna di novèmber, pa nan por tin bon kondishon ora Beisbòl start bèk den 2021. Firebirds a move mas tantu ku tur ekipo den e offseason aki. Parse ku tin algún ekipo ta tirando riba nan kuarto bate ku ta Ludwin Obispo. Nos ta keda te aki pa awe.

‍