Fanátikonan di Deporte Kòrsou bontardi. Nos tei atrobe ku informashon di Beisbòl lokal i algu di Hulanda. Aya na Hulanda tin un komishon trahando duru pa bini ku Beisbòl Veterano 40+ aya na Hulanda tambe. E komishon a drenta den kontakto ku algun hende klave envolví den Beisbòl Veterano na Kòrsou pa nan start nan kampionato medio yüni aya i mas den fin di 2021 bini Kòrsou pa algun enkuentro. E gran konosedó i fanátiko di Beisbòl sr. Datchenko Willems ta un dje grandinan tras di e organisashon. Ta bastante èks hungadó Yu di Kòrsou i di Aruba tin na Hulanda ku ya a subi 40 aña.  For di 2016 a start ku enkuentronan entre Hulanda, Kòrsou i Aruba pa loke ta trata Beisbòl Veterano di Reino i e proyekto a bira un éksito rotundo.

‍

* * * * *

Loke a pone ku e Torneo di Reino a wanta un ratu ta ku ekiponan di Kòrsou i Aruba no tabata hasi nan esfuerso pa nan tambe yega Hulanda.  Hulanda a bini Kòrsou òf Aruba for di 2016 te ku 2019, ké mèn 4 aña sigí i Kòrsou/Aruba no a logra yega Hulanda. Nos a bisa na vários okashon ku mester pone e fecha pa hunga na Hulanda por lo ménos 2 aña promé, pa ekiponan di Kòrsou òf un selekshon di Kòrsou por yega.  Ta bon pa pone for di aworaki ku na 2022 lo tin Weganan di Reino di Beisbòl na Hulanda pa e hendenan kuminsa pensa pa spar pa yega. Kòrda ku no ta selekshon di Beisbòl/Sòftbòl organisá riba nivel kompetitivo, kaminda gobièrnu i komersio ta paga. Ta keda na kada ken pa paga nan plaka pa por hasi e biahe.

* * * * *

En todo kaso Beisbòl Veterano ta sigi krese aki na Kòrsou i na Aruba tambe Beisbòl Veterano ta haña mas hende/fánatiko ku e otro nivelnan di Beisbòl. Na 2020 tabatin masha hopi fanátiko na Beisbòl Dòbel A pa mira e gainan profeshonal i esnan di College den akshon. Ta masha hopi sèn mes a lora den Beisbòl Dòbel A den 2020. Ban wak si despues di Covid-19 nos lo keda haña mesun kantidat di fanátiko manera tabata e kaso den 2020. Lástima un biaha mas ku fanátiko no por a drenta pa mira e weganan di semi-final i final, pa asina nos yega na un kantidat ku no ta rekòrt pero ku masha tempu no tabatin tantu fanátiko asina. Tur dos seri sem-final a bai kompletu i e seri final tambe a bai kompletu. Ku otro palabra 5+5+7=17 wega di play-off ta algu ku nos no a mira masha tempu den Beisbòl lokal.

* * * * *

Blackout a bati nos siman pasa.  Saludo pa nos amigunan di Aqualectra/Lions di Liga 50. E mucha hòmbernan ei ta trahando duru e dianan ku a pasa. Sherfrank Elvilia, Raimy Pastor, Nelly Jakoba, Dennis D’Arnault, Jurgen Lichtenberg,  Herbert Lucas, Gregory Pijpers, Ernesto Priest, Raichel Leito. Pijpers i Leito ta dos dje estelarnan di Aqualectra ku mester tene kuenta kuné. Ta dos grandi di Aqualectra i tur wega nan mester t’adén. Saludo pa Darick Jonis tambe ku ta tur tur tras di e tim di Aqualectra Liga 50 Sòftbòl.

* * * * *

Aqualectra tabata na di 6 lugá na momentu ku a stòp kampionato di Liga 50 den luna di sèptèmber 2020. Parse ku lo bai hunga e kampionato kompletamente di nobo den 2021. Anke tin algun vershon ku lo sigi e kampionato 2020 di un forma relámpago, pa despues start ku kampionato 2021. Liga 50 tabata den su mihó forma despues ku a sali for di Chirino Ballpark i move pa Van Engelen Ballpark den 2020. E kombinashon di Liga 50 ku Liga Amstel a bira un kos serio i e parke tabata kan kan di fanátiko tur djasabra. Esei mes a pone ku Liga 50 i Liga Amstel tabata e proménan ku a para kampionato manera e di dos ola di Covid-19 a dal adén.

* * * * *

Bèk pa Beisbòl, mester bisa ku rumor di kambionan den Beisbòl Dòbel A a wanta un tiki. Selekshon di Dòbel A a train djamars ku basta bon asistensia na training. Den futuro ta bon pa traha riba un selekshon di Klase A i hunga sikiera kontra Aruba. Selekshon Hubenil tambe mester kuminsá move bèk despues ku Little League a stòp ku e kategoría Big League 17/18 aña.