Lesadònan di Deporte Kòrsou, bon dia i felis siman. Awe nos ta sigi ku e resumen di loke a pasa den Sòftbòl Slowpitch i Beisbòl Veterano. Nos a resumí e dos torneonan ku a logra saka kampion den 2020. Ta trata aki torneonan Survivors i Amstel Bright.  Ta torneonan kaminda ekiponan di diferente liga por partisipá. Solamente Liga 60 a terminá ku un kampion ku ta ekipo Nos tambe Por. Beisbòl Veterano tabata falta 3 out pa terminá i e resultado ta konosí. 2021 Beisbòl Veterano lo konosé un kampion. Awe nos tin resumen di Liga 50 i Liga Amstel ku tabata den gran forma mes mes den 2020. Lástimamente ku no por a kaba e kampionatonan ei.

* * * * *

2020 riba insistensia di algún dirigente klave di Liga 50 huntu ku Jerry Booi komo presidente, a move di Cirilo Chirino Ballpark pa Van Engelen Ballpark loke a resultá un éksito rotundo pa 50+. Benta a bira 3 pa 4 biaha mas tantu i e ‘joint venture’ entre Liga 50 i Liga Amstel. Liga Amstel a dòbel nan asistensia di 2018 i 2019. Van Engelen Ballpark a bira un kos serio djasabra i no tabatin lugá di parker riba e dianan menshoná na momentu ku tin Liga Amstel i Liga 50 pareu. Den e resumen nos tin e standing kaminda ekipo Ban Serio a terminá number 1 di buelta regular i tabata rumbo pa otro título den Liga 50. Ban Serio ta kampion di añanan 2017, 2018 i 2019. 2016 tabata ekipo Marlins ku a bira kampion i 2015 ekipo Pitufos. 2013 i 2014 tambe tabata ekipo Ban Serio.

* * * * *

2012, 2011 i 2010 ekipo Sharks tabata kampion. Ta mesún hungadónan ku a move for di Jaws pa lanta Sharks, despues Sharks a move for di Sharks bira Ban Serio. Ata algún hungadٌó ku a bira kampion den Sharks kontra di Marlins na 2012. Na 2013 Ban Serio a drenta Liga 50, ké mèn Ban Serio tin  5 titulo di Liga 50 di 2013 pa 2019.  Algún hungadó di Sharks na 2012 tabata Sherman Salsbach, Choncho Mari, Caluf Jansen (QEPD), Beer Adelina,  Michael Philips,  Randall Stroop, Fety Curie, Abelino Julia, Wim Felicia, Kid Boca Chica,  Lesley Conradus, Eric Liberia, Floranus i Kirchner.

* * * * *

Marlins tabatin den nan filananan 8 aña pasá Boshi Gerard, Rignald Hariquez, Lincoln Echobardo,  Albert de Las Chiquez, Siegfried Lopez, Angua Isaacs, Gensley Balborda,  Ellery Martina, Scharbaai, Ji Li (ruman di Lionel Li), Randy Bernardus (QEPD), Isaac Francees. Raymond Faries ets.  Dushi bai bèk den historia ratu ratu den tur liga. Nos tin hopi detaye mes den Sòftbòl Slowpitch pa sigur mas ku 20 aña dokumentá. Promé ku esei tambe nos tin, pero no ku detaye manera e último 20 añanan.  Ekipo Flamboyan/Tigers ku lo bira Tigers den 2021 tabata e aña aki Serio tras di Ban Serio na di dos lugá ku rekòrt di 5-3 empatá ku Jaws i Marlins. Despues ta sigi Pitufos ku 4-3. Si play-off lo a start na e punto ei, ekiponan Ban Serio, Jaws, Marlins i Pitufos lo a klasifiká. Ekipo Artemisia bou di direkshon di Hensley Josephina tabata serio ku 3-3 promé ku e kampionato a keda wantá debí na Covid-19.

* * * * *

Tin algún moveshon fèrfelu ta tumando lugá den Liga 50. Parse ku tin dos ekipo na kaminda i un ekipo ta direkshon di wanta un ratu den e liga menshoná. Hopi chèns ku lo bai tin joint venture tambe. Pa kampionato 2019 dos ekipo di dos persona hopi konosí a solisitá for di 2018 pa drenta i start na 2019, pero a wanta nan durante reunión general. Parse ku aworaki si ta bai tin espasio pa dos ekipo mas, segun nos fuente.  Denley Marten tabata pendiente pa bini ku un ekipo i e fuente no por a bisa nos ken ta tras di e otro ekipo. Parse ku e dirigente ei tabata eksitoso tantu den Sòftbòl komo Beisbòl.
* * * * *

Liga Amstel tambe lo bai krese na interes mirando e entusiasmo entre ekiponan i fanatiko. Liga van Engelen i Liga 40 ta pendiente pa wak kiko e ekiponan ta bai hasi. Un tempu Liga Amtel tabatin 13 ekipo segun nos bou di direkshon di Pim Fangman. By the way, Bombers a bini bèk den 2020 despues ku nan no a partisipá den Liga Amstel i tabata invikto ku rekòrt di 7-0.   E siman aki nos a risibi e tristu notisia ku Kenneth ‘Kenchi’ Ortega, picher di Baranka/Sharks den Liga 50 i Bombers den Liga Amstel, den MCB Soshal, eks bewaker di MCB  a fayese repentinamente djadumingu, 29 di novèmber. Kondolensia i forsa na famia i amigunan.