Lesadónan di Deporte Kòrsou, bon dia i felis siman. Nos tei atrobe ku informashon di Sòftbòl Slowpitch i Beisbòl Veterano. Un palu di awa a kai djasabra anochi i pone ku e wega entre Sin Stress i Join Me no por a terminá segun informashon ku nos tin riba Game Changer. Ekipo Un Kara ku nan ‘dream team’ si a klasifiká pa final, ganando e fuerte ekipo Chilling na dos okashon den wikènt. Djabièrnè Un Kara a dal Chilling 13-1 i djasabra atrobe ku mesun skor 13-1. Un Kara dirigí pa Pepi Martis i Gerald Mathilda ta sólido i faborito pa bira kampion di Liga di Nos Tur. Nan a pasa pa final pendiente desaroyo di e otro serinan. By the way, Siegfried ‘Pepi’ Martis alias Jug Norris, a bati di 2-2 pa su ekipo Catpower di Liga 50 kontra di Flamboyan. Catpower a pèrdè pèrtá ku skor di 5-3 kontra di Flamboyan.

* * * * *  

Situashon ta pèrtá mes mes den Sòftbòl 50+, despues ku algún sorpresa a kai atrobe djasabra na Van Engelen Ballpark. Ekipo  Lions a dal Jaws ku tabata den kabes di Liga 50. Lions a probechá di algún eror di Jaws pa gana e wega ku skor di 7-4. Den di 4 inning Lions anotá 6 kareda ku tabata klave den e wega. Ekipo Ban Serio a  bai na promé lugá ku nan rekòrt di 5-2. Den luna di ougùstùs Ban Serio a pèrdè dos wega sigí kontra respektivamente Marlins i Flamboyan Tigers, pa despues bini bèk serio pa gana 3 wega sigí. Dado momentu Ban Serio tabatin rekòrt di 2-2, despues di 4 wega hungá. By the way, ekipo Marlins tabatin barwacht djasabra último na Van Engelen Ballpark. Marlinsnan tabata papia tokante kosnan ku e ekipo ta pasando adén e aña aki.

* * * * *

Promé punto ta ku Marlins a protestá un wega i gana, pero despues ta resultá ku nan a pèrdè e protesta debí ku Marlins no a paga e 100 florin. Pero esei ta despues di kasi dos luna ku Marlins a haña un karta ku nan a pèrdè e protesta. E wega tabata wega di dia 11 di yüli 2020, kaminda Marlins a protestá desishon di umpire ku a kanta un hungadó ilegal i dekretá out. A resultá despues ku e umpire a aktua robes i Marlins arisibí notifikashon ofishalmente ku nan a gana e protesta. Awor ta resultá ku Marlins no a paga 100 florin. Awèl mes,ter a bisa Marlins for di dia ku nan a hasi e protesta ku nan mester paga 100 florin. Un miembro òf mas miembro di direktiva a preferá di bai bisa Catpower pa manda kontra protesta ku Marlins no a paga 100 florin, enbes di bisa Marlins pa paga e 100 florin. Un tiki ‘scaramouche’ den direktiva pa e manera ku e kosnan a bai, pero ya ...... no tin moda di hasi.

* * * * *

Otro punto ku Marlins a papia di dje ta e skèdjel nobo ku a sali, kaminda tin poné ku riba e último fecha di kampionato regular ku ta dia 19 di sèptèmber 2020, a laga dos lugá habrí pa yena weganan ku  a keda suspendé. Direktiva a schuif pone weganan di dia 29 di ougùstùs p’asina e skèdjel por kana mihó i  hungadónan a plania e fecha 19 di sèptèmber segun skèdjel, pero tòg pendiente pa e weganan di 10’or i 12’or ku ta habrí. Ku otro palabra no por kambia e skèdjel di e weganan di 2’or i 4’or ku tabata poné for di komienso di kampionato. Parse ku direktor di kampionato a risibí reklamo di algún ekipo i lo bai wak e asuntu aki di nobo. Por bini kambio den skèdjel atrobe, ké mèn ekiponan di 50+ keda pendiente pa weganan di djasabra awor na Van Engelen Ballpark.

* * * * *

Nos a traha e kolumna aki promé ku e weganan di djadumingu den Beisbòl Veterano. Djasabra ekipo Marchena mester a lucha pa gana di Vosama den Tie Break Rule. Despues Jandoret a dal ekipo Azucar feros 16-0. Varios hungadó di Azucar a preferá di bai hunga ku Jaws 50+ ku a pèrdè kontra di Lions. Ayera mester tabatin varios wega kandela, entre otro Santa Rosa vs Quality i Santa Maria kontra Bulldogs. By the way, awe djamars 15 di sèptèmber den Beisbòl Dòbel A tin wega kandela di deskite entre Groot Kwartier i Santa Rosa.