Lesadónan di Deporte Kòrsou, bondia i felis wikènt. Nos ta sigi awe ku resumen di 2020 pa loke ta Sòftbòl Slowpitch i Beisbòl. Den dianan benidero nos tin e úniko liga ku a logra terminá 2020 ku ta Liga 60. Esnan mas vulnerable pa Covid-19, e 60+nan tòg a logra terminá e kampionato di 2020. Nos Tambe Por a terminá e kampionato invikto ku un rekòrt 7-0 durante temporada regular, pa despues gana dos wega di play-off i bira kampion. Overall Nos Tambe Por a terminá ku rekòrt di 9-0. Un ekipo kargá ku èks super estrea di Beisbòl ku lo bira un dinastía den Sòftbòl Slowpitch.
* * * * *
60+ so a start i terminá su kampionato. Beisbòl Veterano tabata falta un inning, Liga 50, Liga Amstel, Liga di Nos Tur a start si, pero no a sigi. 60+nan a tuma un kurashi i kita kos foi man. Bon públiko pa mira e weganan di play-off page system di Liga 60 ku a bai un wega so den tur e serinan. Normalmente e serinan promé ta bai un wega i e final so ta bai seri mihó di 3. Saludo pa Rudy Brunken, un dje grandinan den Sòftbòl Slowpitch veterano. Rudy a funda Liga 40, Liga 50, Liga 60 i ta pendiente pa funda Liga 70 tambe. Parse ku lo tin 4 tim pa hunga Liga 70. Rèspèt pa esnan riba 70+ ku ainda ta move. Angel Ramirez, picher tata di dr. Angelo Ramirez ainda ta move. Ela move algún wega den ekipo Curacao Super Stars den 2020 ku 86 aña.
* * * * *
Nos a bai bèk den tempu i dal den un historia kaminda lusnan a bai na Cirilo Chirino Ballpark i un ekipo a bira kampion. Na aña 2002 na Cirilo Chirino Ballpark, e ekipo di Buena Vista Power a bira kampion di e torneo dediká na Anto Leonora. Buena Vista Power di Chal Sint Jacoba tabata ganá ku skor di 10-7 di Wild Cats na momentu ku lusnan a paga riba Cirilo Chirino Ballpark. Nos ta kòrda e tempu ei ku téknikonan di Chirino Ballpark no a logra pone a lusnan funshoná i Buena Vista Power a keda komo kampion. Segun nos e wega tabata den di 4 inning. Ali Isabella (QEPD) tabata tirando pa Power.
* * * * *
Ban Pasa Bon ekipo di Pepi Martis a hunga un wega kontra di Domi na Sint Joris. E ekipo di Pepi Martis a presentá ku e sigiente line-up. Cai Leonora AS, Eddie Thielman LF, Ludwig Pietersz CF, Judsel Baranco (QEPD) 2B, Tyron de Palm 3B, Jefferdion Polonius SS, Jeffrey Martina C, Gregory Zimmerman RF, Sherdon Rombley 1B, Pepi Martis P. Tremendo alineashon e tempu ei i Domi no tabatin niun chèns. Ainda Ban Pasa Bon tabata falta Edric Reenis ku e tempu ei a bini bèk for di Salvador ku e selekshon. Esaki tabata informashon di desèmber 2002. Mester bisa si ku kasi tur aña deportenan ta move den desèmber normal te ku mas o ménos dia 20. E aña aki si dimes debi na Covid ta wanta. Beisbòl Veterano a hunga te dia 6 di desèmber. Na 2002 Run Runners di Anto Leonora a stòp di eksistí i e mesun hungadónan a pasa pa ekipo The Best. E aña ei nos tabatin Liga Koktel. Ata algún nòmber di tim i hungadó. Kampion, Ban Pasa Bon, Supkampion Domi, di tres lugá Buena Vista Power, di kuater lugá Forti. Lider di homerun Quincy Kook, Kampion bate Eddie Thielman, Kampion Picher Pepi Martis. MVP Judsel Baranco (QPED), Kampion Buelta pèrdèdó Curacao Yankees i ekipo di spònser pa Breezes, ekipo Gamers.
* * * * *
Nos a bai bèk den tempu un ratu. Parse ku lo tin masha hopi kambio mes den Beisbòl Veterano. Ekiponan ku lo hasi e kambionan ta Quality Stars, Marchena Stars, Santa Maria, Bulldogs i Vosama. Un ekipo formá pa Latinonan na Kòrsou tambe ta partisipá. Den ekipo Marlins i Vosama tin basta Latino ta move. Otro aña BEVEKO a keda di pone basta asuntu pretu riba blanku. Espeshalmente pa loke ta trata kriterianan pa bini na remarke pa kampion bate, kampion picher (sea ERA òf wega ganá), den kaso di empate den bateo òf picher kua desishon lo tuma.
* * * * *
Den dianan benidero nos lo tin resumen di e liganan ku nan kampionato a tuma lugá tambe, pero ku no a logra terminá. Liga 50 tabata serka di kaba un buelta, Liga di Nos Tur a start ku play-off, Liga Amstel tambe tabata finalisando promé buelta. Beisbòl Veterano tabata falta un inning. Nos lo bini ku mas detaye den dianan benidero.
