Interes ta grandi pa Amstel Bright Premier Cup 2025
WILLEMSTAD- Manera ya a bira un tradishon hopi ekipo di Sòftbòl Soshal, Komersial i Modified ta partisipá na Amstel Bright Premier Cup. Djamars anochi nos a papia ku Pim Fangman ku a bisa ku e interes tei i a kòrda nos ku esun ku yega promé ta bebe awa limpi. Ekiponan Soshal/Komersial a kuminsá reakshoná i esnan di Modified tambe.
Manera ta konosí kategorianan ta Liga 50, Liga 60, Liga 40, ekiponan Komersial Maskulino, Femenino i Co-Ed (Sosial Corporate i Sosial Plùs), mas ekiponan di Liga Kompetitivo, lo kompetí kontra otro den Pul di nan mes respektivo kategoria. Pim ta rekordá partisipantenan ku e premio di kada kategoria ta 1000 florin kèsh. Amstel Bright Premier Cup ta start 24 yanüari i ta dura te ku 9 di mart ku ta e djadumingu despues di Gran Marcha.
Torneo Dia di Betico Croes na Aruba
ORANJESTAD- Dianan 25 i 26 di yanüari tin un torneo organisá pa ekipo Florsheim na Aruba. Ekiponan di 50+ i 60 + lo partisipá na e torneo aki ku lo tuma lugá na tereno Flatstone. Ta trata di un torneo Spring Training pa ekiponan kuminsá move apesar ku ta temporada di karnaval. Normalmente den temporada di karnaval no tin masha moveshon di Sòftbòl Slowpitch i Komersial na Aruba. Picheo pa e torneo lo ta modified habri no sling shot. Hungadónan ku ta kumpli 60 den 2025 por partisipá na e torneo. Por tin solamente un hungadó di 59 den line-up. Si e hungadó ta kumpli 59 despues di e fecha di e torneo e no por partisipá. 50+ lo hunga segun reglamentunan di Liga Mayor di Aruba. Bar i kushina lo ta bon surtí. Ekiponan ku ta partisipá den 60 ta Boomerang, Tigers, Aruba Jrs, Surprize, Aruba Royal Stars, Glovers Int, Astros, Jany’s, Florsheim. Den 50 tin Deco’s, Old Timers, Leftovers, Survival, Surprize, Astros, Aruba Jrs i Stingers.
MAS INFORMASHON DI SÒFTBÒL I BEISBÒL
Fanátikonan di Extra Inning, bon dia i felis wikènt. E kampionato di Beisbòl Profeshonal di Kòrsou ta start dia 16 di yanüari ku partisipashon di 3 ekipo, Curacao Suns (aktual kampion), Curacao Goats i Willemstad Canons. E weganan lo sigi dia 17 di yanüari, 18 di yanüari i final ta 19 di yanüari ku ta djadumingu. Nos a mira nòmber di grandinan den Beisbòl Profeshonal riba lista, manera entre otro Jonathan Schoop, Andrelton Simmons, Didi Gregorius, Juremi Profar, Sharlon Schoop, Mairo Martinus i otro streanan di region i USA. Nos tin por ehèmpel Cody Mincey ku ta un picher Merikano ku último dos añanan ta estelar di ekiponan ku ta representá nos pais.
* * * * *
Dia 24 pa 30 di yanüari lo tin Serie de Las Americas na Nicaragua i e ekipo kampion di e torneo di Beisbòl Profeshonal di Kòrsou lo representá Korsou. Paisnan manera Argentina, Colombia, Cuba, Kòrsou, Nicaragua i Panama lo partisipá na Serie de Las Americas. Nos Pais Television enkabesá pa Gino Valeriaan i Alexander Macaja lo tei ku un staf di komentario i naradó. Serie de Las Americas ta algu nobo manera propagandanan internashonal ta bisa, pero Serie de Las Americas a kuminsá sigur for di 1961, despues a kambia nòmber bira Latin American Series i a bira Serie Del Caribe. Akinan a bin ta invitá sierto paisnan so i último aki Colombia, Cuba, Kòrsou i Nicaragua nan aki no ta risibí invitashon i a bini ku e Serie de La Americas estilo nobo.
* * * * *
Nos ta pendiente pa pòtrèt i mas detaye di selebrashon di 50 aña Azucar. Furghion Booi parse ta un piesa klave den direktiva di ekipo fundá pa Hubert ‘Ibi’ Soerka. By the way, direktiva di BEVEKO i ekiponan Santa Rosa Memories i Yesterday ta pendiente di e komishon di apelashon. Naturalmente ekiponan ku a klasifiká Quality Stars, Santa Maria Pirates i Isla Crackers ta pendiente di nan kontrinkante ku ta sea Santa Rosa i òf Yesterday. Direktiva no a tende nada ofishal ainda di e komishon di apelashon. Yesterday a protestá i pèrdè e protesta i Yesterday a apelá. Ya, tabata den luna di desèmber i BEVEKO a para e play-off pa sigi den yanüari 2025.
* * * * *
Torneo FABB lo sigi e aña aki na Van Engelen Ballpark. Wikènt pasá tabatin algun wega na Sabana Ballpark i Montab debí ku awaseru a kai den bisendario di Van Engelen i weganan no por a sigi, debí na mal estado di tereno. E torneo ta dediká na Jurickson Profar i nos lo sigi ku detayenan di komienso i karera di Jurickson Profar. Tata di Jurickson a bisa nos den un etrevista na 2002 ku Jurickson tabata fileá tremendo foi chiki ku tremendo brasa for di den Vruminga League. Na 2002 Jurickson a bai ku promé selekshon ku tabata selekshon Minor. Jurickson a bisa ku nan a bai pornada debí ku e selekshon di Liga Pabou no a bira kampion. E sigiente selekshon tabata Minor na 2023 na Puerto Rico i einan Jurickson a traha nòmber kaba.
* * * * *
Na 2004 Jurickson Profar a bira kampion Mundial di Little League ku selekshon di Kòrsou. Promé ku esei e selekshon a bira kampion di Karibe na Aruba. Den e final internashonal Jurickson a picha i gana e fuerte ekipo di Meksiko 4-0 i den final Jurickson Profar a dal homerun den promé inning pa gana ekipo West di USA pa bira kampion Mundial. Na 2005 selekshon di Pabou ku Jurickson komo un di e hungadónan ku a bai pa di dos aña sigí tabata falta tres out pa bira kampion i Kòrsou a keda den tereno riba homerun. Jurickson tin un rèkòrt ku ta difísil pa kibra, na momentu ku den kampionato di Karibe na 2002 ela poncha tur batiadó ku ela enfrentá di e ekipo di Sint Maarten. Un wega perfekto. 12 batiadó a bini i 12 batiadó a bai tur pa medio di ponche. Nos lo sigi ku mas detaye di Jurickson Profar den e dianan benidero.
* * * * *
Bèk pa Slowpitch. Ekiponan kòrda ku inskripshon pa Amstel Bright Premier Cup ta habri i lugánan ta limitá. E lema ta ku “esun ku yega promé ta bebe awa limpi”, manera Pim Fangman a pone den e komunikado. Ekiponan di 40, 50 i 60 lo partisipá na e torneo aki huntu ku e ekiponan soshal manera kustumbrá. Ganadónan di e torneo lo risibí 1000 florin. Nos ta keda te aki pa awe i te mayan ku Poder di Dios.
