Torneo dediká na Jurickson Profar
Torneo FABB den gran forma i ta pendiente pa ekiponan di Aruba
WILLEMSTAD- Torneo FABB a sigi den wikènt ku vários wega riba tereno A i B. Den kategoria Little ekipo Montanja Ariba i Trai Seru ta invikto i ta faborito pa yega final di e torneo. Montanja Ariba kampion Little di Torneo FABB 2024 a gana Marchena 4 pa 1 djasabra i Montanja Abou 11 pa 1 djadumingu. Trai Seru ku tin rekòrt di 3-0 a gana Brievengat 22-2 djasabra último.
Pa loke ta trata kategoria Minor, Trai Seru i Brievengat ta invikto. Trai Seru tin rekòrt di 4-0 i Brievengat tin rekòrt di 3-0. Trai Seru a gana Santa Rosa 8-4 djasabra i Tera Kora ku skor di 9-5 djadumingu. Brievengat a gana Montanja Abou 9-5 djasabra.
Ekiponan di Aruba lo yega djarason i djaweps benidero. Djaweps e ekiponan di hermana Isla Aruba lo ta den akshon. Ta trata aki di ekiponan Rincones i Team Bossje. E torneo ta dediká na Jurickson Profar, hungadó estrea den MLB ku 2024 tabata tremendísimo ku ekipo San Diego Padres i ta agente liber.
LITTLE
Santa Rosa 9, Montanja Abou 2
Santa Maria 3, Marchena 2
Trai Seru 22, Brievengat 2
Jandoret 8, Sint Michiel 3
Montanja Ariba 4, Marchena 1
Santa Maria 5, Santa Rosa 3
Montanja Ariba 11, Montanja Abou 1
Little A 13, Little B 4
MINOR
Santa Rosa 1, Jaguar 0
Santa Maria 9, Tera Kora 2
Brievengat 9, Montanja Abou 5
Santa Maria 6, Jaguar 4
Trai Seru 8, Santa Rosa 4
Marchena 9, Sint Michiel 3
Trai Seru 9, Tera Kora 5
Minor B, Minor A 3
Fanátikonan di Extra Inning bon dia i felis siman. Nos a drenta e siman kaminda ekiponan di Aruba lo yega pa kompetí den Torneo di Fundashon Akademia di Beisbòl Brievengat (FABB). Awe nos tin resultado di e weganan ku a tuma lugá wikènt pasá na Van Engelen Ballpark. Bon ambiente i weganan kandela. Trai Seru, Brievengat i Santa Maria ta moviendo bon den Minor. Trai Seru, Montanja Ariba i Santa Maria ta move bon den Little. Ekipo Santa Maria a pèrdè kontra Montanja Ariba den e wega inougural kandela ku a terminá ku skor di 4-3. Di einan ekipo Santa Maria no a pèrdè mas wega.
* * * * *
Djadumingu 19 di yanüari, Torneo FABB ta terminá i mesora ta start e sigiente wikènt ku e tan sperá Amstel Bright Premier Cup. E torneo tradishonal organisá pa Cicoza lo konta ku sigur mas ku 60 ekipo atrobe. Kòrda ku mester inskribí solamente via e-mail òf app serka: pim@fangman.org òf frondelyanthonia@gmail.com òf ryanisebia@gmail.com. Inskripshon ta sera 15 yanüari 2025. Na su debido tempu lo duna mas informashon tokante reglanan pa kada kategoría. Esnan ku ta lesa Extra Inning, avisá boso dirigentenan ku inskripshon ta sera e siman benidero.
* * * * *
Djaweps awor ta start ku e weganan di Curacao Professional Baseball League i ta start ku partisipashon di e tres ekiponan ku ta Curacao Suns, Willemstad Canons i Curacao Goats. Djaweps ta Curacao Suns kontra Willemstad Canons. Weganan lo sigi djabièrnè i djasabra i e gran final ta djadumingu 7’or. Ganadó di e torneo aki lo representá Kòrsou na Nicaragua. Nos Pais TV lo tin antesala tur djaluna i lo pasa tur wega di Kòrsou bibu i direkto di 24 pa 30 di yanüari. Nos mester klasifiká pa hunga semi-final dia 29 di yanüari i gana einan tambe pa yega final dia 30 di yanüari. 6 pais ta partisipá i e promé 4-nan ta klasifiká pa hunga 2 vs 3 i 1 vs 4. Dia 29 di yanüari e ganadónan di semi-final naturalmente lo bai final. Paisnan ku ta partisipá ta Argentina, Colombia, Cuba, Kòrsou, Nicaragua i Panama.
* * * * *
Nos a drenta 2025 i ta net 10 aña pasá ku 3 grandi a hunga nan último temporada den Liga Van Engelen. Na 2015 ekiponan Dalpega, Baranka i Rangers a sali for di e liga. Einan liga a kuminsá swak. A reklamá e picher di Swift e tempu ei Rafael Gonzalez ku ta tirando ilegal. E liga a drei despues vários aña kasi 8 aña mas pa despues stòp na 2024. Durante e añanan ei picheo slingshot a bira normal i den Liga Amstel tambe tur ekipo ta drei ku e picheonan (straño) ei. Nos a mira algun wega di Liga Amstel e aña aki i tin algun picher sumamentu velos ku variashon manera entre otro Emilio Velarde, Frensel Meyers Alexander Rodriguez, Biggy Pereira, Argenis Daal i otronan.
* * * * *
Dia 31 di yanüari Challenger Little League ta bèk den Sabana Ballpark, kaminda tur kos a kuminsá. E weganan lo ta di 8.30 pa 11.30 am. Challenger Little League ta e liga ofishal di Little League kaminda nos hóbennan desabilitá ta partisipá den gran forma. E liga di Kòrsou yama Aminta Sprockel Challenger Little League. Brian Goilo resientemente e keda nombrá komo presidente di e liga menshoná. Challenger Little League ta kai bou di District Administrator Urny Floran. Naturalmente ta pendiente pa kontinuá kampionato di Little League i despues play-off i serinan di Karibe i Latino. Kòrsou tin dos sede (Kampionato Karibe i Latino America) e aña aki. Nos tin Little League atrobe pa di dos aña konsekutivo i pa promé biaha den historia ku Kòrsou ta haña e sede di Little League dos aña sigí.
* * * * *
Djabièrnè nos a skibi tokante e tereno chiki na Jandoret, patras di Kaya Frater Fidelius, mihó konosí komo Velt di Jeiko òf Vèlt di Seru. Tin hende di Jandoret tabata yama e vèlt Trai Seru. E vèlt aki a drei den añanan 70 i komienso di añanan 80. Saludo pa Henny ‘Bob’ Allee, un dje grandinan ku tabatin ya kasi 40 aña tabata trèk i move den e hóbennan di e bario. Mener Eston Manuela, tata di e èks gran prospekto Dienston Manuela tambe tabata move riba e tereno menshoná. Pronto lo tin e wega amistoso tan sperá. A limpia e tereno despues di kasi ku 35 aña. Nos ta keda te aki pa awe i te mayan ku Poder di Dios.
