Issachar Perreira Bryan Biegel i Humphrey Granger pa Marchena Braves
WILLEMSTAD- Marchena Braves a logra firma algún piesa importante pa kampionato 2022. Djaluna 21 di febrüari den Bam Bam Tech Zone ekipo Marchena Braves a firma e kècher Issachar Pereira i e coach Humphrey Granger. Issachar tabata den ekipo Firebirds den Beisbòl Dòbel A despues ku ela hunga den Royal Scorpions Hubenil.
Issachar Perreira a bai Wild Cats i despues Firebirds. Ekipo Marchena lo haña mas stabilidat tras di plato. Marchena a firma mesora e tremendo coach Humphrey Granger. Un coach/ entrenadó dediká ku tin hopi aña den Beisbòl. Granger ta tremendo ku e fungo i ta konosí ku e ta hiba un tremendo training. Na komienso di añanan 80 Granger tabata bon picher ku ekipo Blue Hawks i tin mas ku 20 aña coach. Marchena Braves a anunsiá tambe ku nan a firma e èks profeshonal Bryan Biegel. Bryan Biegel a hunga último añanan den Royal Scorpions. Un tremendo picher ku gran velosidat ku na 2021 a hunga den Beisbòl Profeshonal na Italia. Ta trata aki di primu di Daytan Biegel ku na 2020 a hunga den Wild Cats. Nos tin algún detaye kòrtiku di Bryan Biegel su karera.
BRYAN BIEGEL
For di 4 aña te ku 16 aña Biegel a hunga den Trai Seru di Pre-infantil te Senior League. Despues ela firma ku Miami Marlins ku 17 aña. Na Kòrsou Bryan a hunga den Royal Scorpions i Wild Cats. Aña pasá Bryan a hunga na Italia pa e tim di Macerata Angels. Semper Biegel tabata un utility player hungando posishonnan manera tersera base, shortstop, outfieldier i picher i a firma komo outfielder ku e ekipo di Miami Marlins.
INFORMASHON DI BEISBÒL I SÒFTBÒL
Fanátikonan di Deporte Korsou, bondia . Hopi informashon di Beisbol Veterano i Sòftbòl Slowpitch. Hopi moveshon mes. Den Beisbòl Veterano ekipo Bulldogs a stòp di eksistí. Denley Marten mes a manda un mensahe pa hungadónan i splika ku e ta bai stop. E mensahe tabata duru duru riba medionan soshal djarason i djaweps. E reunión kaminda Denley Marten a partisipá un ke otro na e hungadónan tabata djamars. Niun hende no por bisa aworaki kiko ta bai pasa, debí ku algún hungadó ke keda pa e ekipo sigi drei ku otro nòmber. Den pasado ekiponan a yega di bai ku tur hungadó ku otro nòmber, pero ku aprobashon di otro ekiponan. Tin ku a bai sin aprobashon di otro ekiponan miembro di BEVEKO. Ban wak kiko ta bai pasa den e kaso aki.
* * * * *
Ekiponan a kuminsá tira bara di hak riba e hungadónan di Bulldogs. Varios ekipo interesá den e hungadónan di Bulldogs. Nos lo sigi e moveshonnan djaserka i informá nos lesadónan. Djarason tabatin reunión general di Beisbòl Veterano na Oleander. Kampionato ta bai start 2 di parel parse na Vi Jansen Ballpark òf na Tio Daou. Ekipo The Brothers manehá probablemente pa Gurtney Jansen lo tin un torneo warm-up di Beisbòl Veterano. E torneo ta planiá pa start den e di dos siman di mart i dura nèt dos siman. Lo manda invitashon pa ekiponan i esun ku inskribí mas promé lo bebe awa limpi.
* * * * *
Awe nos tin e relato kaminda ekipo Marchena Braves a firma Issachar Perreira. Marchena tin mas na kaminda i nos a tende e nòmber di Carol de Palm Jr ku a keda menshoná. Tremendo picher ku a hunga for di Minor League den organisashon di Marchena. Carol de Palm Jr a hunga Mundial di Little League na 2003 huntu ku hungadónan manera entre otro Jonathan Schoop, Kevin Moesquit, Alexander Provacia, Czenvic Rojer, Tharick Martinus, Jeandre Pereira, Rojean Cleofa, Shendley Rosario i otronan. Marchena a la karga den 2022 i nan ta mira e temporada aki mesun kos ku esun di 2018, kaminda nan a klasifiká ku hungadónan manera Risandro Pastor, Nahim Attaf, Jeandimar Ignacio, Jonathan Martijn, Quincy van Blarcum, Quinten Willems, Rylan Reina, Yannick Wilsoe, Rochendrick Alexander, Reyhane Fecunda, Railison Liberia ets.
* * * * *
Nos a risibí resultadonan di Little League na komienso di siman. Den Little League Santa Maria a gana Marchena 4-3 segun resultado ku nos a risibí. Segun dirigentenan di Marchena e wega no a kaba 4-3, pero empatá na 3. Ta di 3 biaha segun nos ku weganan di Little League entre Marchena i Santa Maria ta keda empatá. E wega di wikènt ei tabata empatá i ku base yen un hungado di Santa Maria a risibí base por bola pa terminá e wega. E hungadó parse a brua i kere ta ponche i kore bai dugout. E coach na primera a mishi ku e hungadó i mande primera pa e wega kaba. A bin protesta i e hunagdó a keda dekretá out i e wega a keda empatá. Nos a risibí serka skorer ku e wega a terminá 4-3. Bon, ta den Little League, no ta wòri ku gana i pèrdè durante kampionato, pero den play-off i torneonan klasifikatorio si. En todo kaso Little League ta sigi den gran forma wikènt benidero ku weganan for di Minor te ku Senior riba parkenan aki na Kòrsou.
* * * * *
Rekordatorio pa ekiponan inskribí pa Torneo Amstel Bright ku ta start dia 4 di mart na Van Engelen Ballpark. Den e torneo ei tin weganan di Liga 50 tambe. Torneo Amstel Bright organisá pa Cicoza ta hopi konosí pa nan premionan lukrativo di plaka kèsh. Varios ekipo di 50+ a kuminsá move pa ta mas o ménos den forma. Ekiponan di Beisbòl Veterano i Sòftbòl Femenino Veterano tambe a kuminsá move. Den Torneo Hope parse ku no tin limitashon di hungadónan di Dòbel A. Bo por alineá kuantu hungadó Dòbel A ku bo ke, basta e hungadó ta traha na e empresa. By the way, Swift tabatin un selebrashon di 50 aña tur afó na Larry’s djarason anochi. Tabatin un Santu Sakrifisio di Misa na Misa di Montaña sigí pa e resepshon tremendísimo na Larry’s, kaminda por a mira eksitonan di Swift riba pantayanan den Larry’s. Varios veteranisimo hungadó di Swift tabata presente huntu ku e hóbennan. Den dia i simannan benidero lo tin mas detaye.
