5 wega e wikènt aki na Tio Daou Ballpark
Jandoret ta gana Bulldogs 7 pa 4 den Round Robbin Beisbòl Veterano
WILLEMSTAD- Djadumingu último riba un tereno basta pisá na Vi Jansen Ballpark, Jandoret a gana Bulldogs ku skor di 7-4 i asina pasa pa number 1 di e Round Robbin ku rekòrt di 3 ganá i 1 pèrdí. Bulldogs tabata ganá 4-0 te den kabes di e di 6 inning, pero Jandoret ta kontestá ku 7 kareda den kabes di e di 6 inning pa bòltu e wega. Den bòm di e di 6 inning Bulldogs ta bai 1, 2, 3 pa Jandoret logra e viktoria. Deron Clara a tira kompletu pa Jandoret pa bira e picher ganadó. Lester Victoria tabatin un blankeo di 4 hit tirá, na momentu ku ela bandoná e wega den kabes di e di 6 inning sin out. Relevistanan Emilio Velarde, Demery Meyer i Verney ‘ruman di Kenley’ Jansen, a tira varios base por bola kombiná ku algún hit pa Bulldog kai vensí i pone nan rekòrt na 1 ganá i 3 pèrdí. Wikènt awor ta kandela tin na momentu ku tin 5 wega na Tio Daou Ballpark. Mas abou nos tin standing i e skèdjel.
NUMERITONAN
Jandoret a nota 7 kareda, dal 8 hit i kometé 2 eror. Deron Clara tabata e picher ganadó tirando henter wega. Earl Virginia a bati di 2-2. Bulldogs a nota na 4 okashon, dal 4 hit i hunga sin kometé eror. Emilio Velarde tabata e picher pèrdèdó. Kelvin Winklaar ku Ian Leito, ámbos a bati di 2-1.
STANDING
Jandoret Raiders 3-1, Santa Rosa 2-1, Quality 2-1, Isla 1-2, Santa Maria 1-2 i Bulldogs 1-3.
SKEDJEL
Djasabra 7 di novèmber
(Tio Daou Ballpark)
10.30 Jandoret Raiders – Santa Maria Pirates;
13.00 Santa Rosa Memories – Bulldogs;
15.30 Quality Stars – Isla Crackers.
Djadumingu 8 di novèmber
13.00 Santa Maria Pirates – Quality Stars;
15.30 Isla Crackers – Santa Rosa Memories.
