Jaws vs Nos Tambe Por i Jaws kontra Baranka djadumingu den Torneo Survivors
WILLEMSTAD- Torneo Survivors ta sigi kayente e wikènt aki na Van Engelen Ballpark. Kasi tur ekipo lo hunga nan último wega promé ku pasa pa semi-final i final ku lo ta dia 11 di febrüari. E wikènt aki ta kandela tin entre e veteranonan 60+ kaminda Jaws (2-0) lo topa ku Nos Tambe Por (2-0) djadumingu mainta sigí pa Jaws (50+) kontra di Baranka pa 11.45’or. Tantu Baranka komo Jaws tin rekòrt di 2 ganá i 0 pèrdí. Nos tin skèdjel di djasabra i djadumingu i algun resultado di wikènt pasá.
Skèdjel
Coca Cola 11, Fraal 8
Coca Cola a dal 18 hit i hasi 1 eror. Picher ganadó tabata Redien Martines. Edwin Thielman, veteranísimo a bati di 3-3.
Selikor 10, ADC 7
Selikor a konektá 12 hit i kometé 1 eror. Treson Clemencia tabata e picher ganadó. Lindsey Rimon a bati di 4-3.
SBAB 17, Renaissance 3
SBAB a dal 19 hit i kometé 3 eror. Jeremy Lucas tabata e picher ganadó. Swindley Lint i Rhiency Imperator a bati di 4-3.
Mon Repos Sluggers 9, All Stars 6 (50+)
Mon Repos Sluggers a konektá 11 hit i hunga sin eror. Eldert Bakker tabata e picher ganadó i Rensley Martis ku Humprey Antonia a bati di 2-2. Raimy Pastor di 1-1 ku un homerun.
Jaws 16, All Stars 6 (50+)
Jaws a bati 23 hit i hasi 4 eror. Edison Sambo a gana. Victor Caldera a bati di 4-4. Myron Wijman, Marvin Wijman, Tyron de Palm i Albert Hartog a bati un homerun.
MAS INFORMASHON DI SÒFTBÒL DI KÒRSOU
Fanátikonan di Deporte Kòrsou bon dia i felis wikènt. Nos tei atrobe kargá ku informashon di Beisbòl i Sòftbòl. Torneo Survivors ta sigi e wikènt aki na Van Engelen Ballpark ku varios wega kayente. Ta di 3 wikènt i último di e buelta regular. Pa djasabra otro siman lo tin weganan di final Djaweps a start ku Serie del Caribe kaminda ekipo di Kòrsou a enfrentá Cuba den Stadion Jorge Luis Garcia Cameiro na La Guaira. Kòrsou a laga tremendo impreshon atrás despues di e promé wega di Serie del Caribe. Nos a pèrdè ku skor di 3 pa 1 den Extra Inning, den di 10 inning. Nos tabata ganá te den 7 inning ku skor di 1-0 ku e refuerso e picher Cody Mincey tirando 7 inning tumando solamente 5 hit. Djabièrnè, 3 di febrüari nos a zona un kampanaso ganado di Meksiko 2-1.
* * * * *
Ban pa Slowpitch. Moveshonnan ta sigi den Liga 50 pa loke ta trata e kambionan. Ekipo Marlins ta basta aktivo i ta tras di un bon outfielder ku ya ta den Liga 50 i un infielder ku a kaba di kumpli 50 aña i lo djoin e aña aki. Nos a hasi menshon ku Winston Kirindongo ku lo pasa di Marlins pa Ban Serio i mesora ekipo Marlins a sali en buska di mas profundidat den outfield. Jaws ta parse fuerte atrobe den 50+ i ta rumbo pa klasifiká atrobe. E ekipo to beat ta Baranka ku tin dos título sigi. Te ku algun aña pasá ekipo Ban Serio tabata e ekipo to beat. Ban Serio tin hopi título despues di añanan 2010. Aña 2015 Pitufos a kita un título for di Ban Serio i na 2016 ekipo Marlins a bira kampion.
* * * * *
Komienso di yanüari tabatin un homenahe na Gengoe Hooi pa Fundashon Akademia di Beisbòl Brievengat Pariba. Nos a bai koba saka algun hungadó ku tabata den selekshon ku Gengoe Hooi. Tabata un tremendo tim ku hungadónan manera Charlton (Willy) i Charles van Thijs di Nutrament, Patrick Martijn tambe di nutrament. Cedric ‘Dikkie’ Valies, Eduard ‘Chapo’ van Heyningen, Michael Josephina, Wollit Martha (QEPD), Eduard ‘Gordo’ Cannister, Anthony Chirino, Eldrin Ortega, Foe Da Costa Gomez, Donato van Thijs, Agi Martis i Ronny Inecia, Gengoe Hooi tabata manager i Ronny Chirino coach.
* * * * *
Ban pa Serie Del Caribe. Darren Seferina, ku a habri na tersera pa e ekipo di Kòrsou tabatin e úniko kareda empuhá pa e ekipo di Kòrsou. Ray Didder refuerso di Aruba a bai di 5-2, Jonathan Schoop di 3-1, Sharlon ‘Wecho’ Schoop di 3-2, Andrelton Simmons di 4-1 pa e 6 hitnan di e ekipo di Kòrsou. Cuba a dal 9 hit i hasi 1 eror. Kòrsou no a kometé eror i a lusi bon. No ta kere ku nos lo gana wega sigur den e Serie Del Caribe. Pichernan ku a tira pa Kòrsou tabata Cody Mincey, Shai Martis i Wendell Floranus.
* * * * *
Dirigentenan di Amstel Bright Premier Cup a manda un rekordatorio pa ekiponan manda konfirmá nan partisipashon na e tremendo torneo aki, ku ta konosí pa kopanan bunita i premionan atraktivo. Ekipo di Sòftbòl Cicoza ta tras di e torneo aki ku ántes tabata Kopa Polar. Un dje gran organisadónan di torneo ku ta Pim Fangman ta asistí Ryan Isebia i crew pa e Amstel Bright Premier Cup bira un éksito rotundo manera ya nos a kustumbrá.
* * * * *
Nos a risibí informashon ku ekiponan Marlins, Ban Serio i Flamboyan/Tigers lo ta na Boneiru den luna di mei pa Kopa ABC 50+. Marlins dimes ta e organisadó di e torneo menshoná na Kòrsou i mester partisipá na tur e Kopa ABCnan. Ekipo Ban Serio a partisipá na hopi ABC, entre otro na Aruba na 2018 kaminda nan a bira kampion. Na 2019, 2020 i 2021 no tabatin Torneo ABC 50+ i na 2022 na Kòrsou ekipo Baranka a bira kampion ganando di Marlins den e gran final.
* * * * *
Pa fin di aprel lo tin play-off di Little League. Apertura ofishal lo ta sea dia 25 òf 26 di aprel. Kòrsou lo ta sede di e kampionato di Senior League i ta pendiente pa Intermediate League. Senior League Karibe na Kòrsou lo ta di 24 di yüni pa 3 di yüli na Kòrsou. Aruba no ta sede di Intermediate mas, ke mèn chèns ta grandi ku Kòrsou lo tuma e sede. Little League Karibe lo ta na Puerto Rico den 2023.
