Komentario di Pepi Sulvaran: "Gana dos wega na kas ruim op de boel i buska hungadó di nivel"
WILLEMSTAD - E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbol di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
Gana dos wega na kas ruim op de boel i buska hungadó di nivel.
Bou di nivel
Natural nos tur ta aliviá ku nos a gana Grenada. Esei so ta bisa tur kos. E viktoria aki no mag di siega nos pa nos realidat. ‘Pantera Negra’ su situashon no ta bon. Ta inkreíbel ku nos mester a stèns riba San Martin parti Franses, ku no ta ni aparese riba ranking di FIFA pa por yega liga A i ‘Kopa di Oro di CONCACAF den un grupo sumamente débil. Ta bon kla ku Advocaat i su grupo di amigu di edat, no por motivá ni inspirá e selekshon. E siklo aki ta esun di mas malu ku nos selekshon a yega di pasa aden. Nos a pèrdè punto ku e numbernan 164 i 173 di mundu. Paisnan di Cricket, kaminda ni fanátiko no ta bin wak wega i mester gradisí e mitar isla chiki ku ta parti di Fransia, ku nan a duna nos un man. Mas malu no por.
Mester bin kambio
Ta tempu pa kambio, tantu riba nivel di maneho komo den e selekshonadó. Advocaat ku su grupo a base di resultado so kaba no por keda. Ku nos ta kere ku poko hòmber di hopi edat lo por karga un selekshon so kaba, ta un redikules. Lagami pone asina aki. Si ta tres ansiano di hopi edat yu di Kòrsou den kareda di 80 kaba lo a pone den staff, tur hende lo a grita ku no por. Advocaat su tempu a pasa masha día i e no ta bisa e generashon nobo apsolutamente nada. No ta nada straño ku e no por haña hungadó di peso. Ku sintamentu tras di telefon app hungadó nos no ta bai yega i ta falta di respèt. Tuma un èhempel na Surnam. Surnam a lucha ku Costa Rica pa promé puesto den grupo A di Liga A. Bo sa kon? Poniendo un grupo di eks hungadó huntu ku un entrenadó ku tambe ta ex hungado pa aserka nan sanger na Europa personalmente. Un kuerpo tékniko dinamiko. Un trayekto ku por sierto ta Dean Gorré ku ta aki a start. Surnam si ta riba kaminda pa tantu ‘Kopa di Oro’ komo Mundial 2026. Si nos a kologá Remko ku rason pa pèrdè ku number 141 riba ranking, dikon nos ta laga esakinan si keda? Sèn tira afo den bari sin bòm, kaminda nos tin un entrenador ku eksperensia i dinamismo den kas ta paga kaba.
E grupo aktual no tin sufisiente nivel i profundidat
Nos no tin nada di bai buska ku e grupo aki ni na ‘Kopa di Oro’ ni den pre- mundial. E grupo falta kalidat. Ku eksepshon di Room, Brenet, Floranus, Carolina, Dos Bacuna, Comenencia, Roemeratoe, Gorré, Antonisse i Felida i Kuwas si nan dos hunga den nan ekipo, sobra no tin nada di buska riba torneo grandi. Si nos logra gana e dos weganan i klasifika pa ‘‘Kopa di Oro’, kaminda pais grandi lo bin partisipá otro aña, mester traha un delegashon a la Surnam pa bai Europa i papia ku esnan ku no tin niun chèns pa yega selekshon Hulandes. Mester kuminsá buska sentral, Bazoer, Obispo i St. Jago, ta tres defensa sentral di nivel. Sambo ku ta banki den Burnley riba di dos nivel na Inglatera, komo half mester wordu konfrontá ku su realidat. Den bolante nos ta basta bon ku dos Bacuna i Comenencia, basta Juninho pasa e bala. Komo bolante ofensivo of delantero mester konvensé Sontje Hansen, ku ta suplente den NEC i tampoko por tin ambishon pa ‘Oranje’. Tahith por hunga tantu riba hala, den bolante i komo di dos delantero. Sentro delantero tambe ta doló di kabes. Janga ta veterano, pero por bai 1 te 2 aña mas. Kastaneer ku Advocaat a trese ku 6 luna sin hunga bala i sin klup mes, no ta un opshon. Mester wak si por konbense Robertha, Zivkovic i spera ku Locadia su pia porfin lo drecha.
Mester korta aworaki den e selekshon aki
E kambio mester bin mes ora despues di e weganan di novèmber. Dean Gorré tey kaba den servisio di FFK. Si ke keda ku Franken komo su asistente tambe ta un posibilidet i pone un hende di nos, sea Zinho of Lennox. Pa desèmber mester kuminsá implementa kambio, pasobra for di otro aña yüni, kos ta bai den grandi ku weganan importante entre otro Pre-mundial i ‘Kopa di Oro’. Nos tin 6 luna e ora ei pa reorganisá. Sigui riba e ruta aktual no ta un opshon. Ta berguensa so nos lo sigui pasa.
.
