Torneo Hope ta sigi djasabra i djadumingu
FDDK ta sigi invikto den Torneo Hope 2025
WILLEMSTAD- - Ekipo di Fundashon Desaroyo Deportivo Kòrsou (FDDK) a gana dos wega mas den wikènt i ta sigi invikto den Torneo Hope 2025. Otro ekiponan ku ta destakando formal ta Brandweer, SOAB ku ta e ekiponan invikto den e kategoria Soshal. SVB/Aventa i Keyfin/ETR Cooling tin 3 ganá i 1 pèrdí.
Den kategoria COED, CMC, Keyfin, SBAB i ORCO ta invikto. Den e kategoria 40+ e situashon ta pèrtá ku solamente un ekipo invikto, ku ta ekipo SDKK/GGZ. Standing den 40+ ta SDKK/GGZ 1-0, MCB 2-2, FLOW 1-1, KPC 1-1, CRU 1-1, Aqualectra 1-2. Weganan ta sigi djasabra i djadumingu na Van Engelen Ballpark.
RESULTADONAN
SOSHAL MASKULINO
FDDK 10, Keyfin/ETR Cooling 9;
Kooyman 8, CITCO 7;
MCB 10, CGA 2;
Selikor 15, Polis/KPC 14;
Belastingdienst 16, Janssen De Jongh 8;
CITCO 4, Douane/Cpost 0;
SVB Aventa 11, Aqualectra 0;
SVB/Aventa 13, SDDK/Damen 2;
Polis 11, Janssen De Jong 1;
CGF/FGC 15, Aqualectra 2 5;
Brandweer/CAP 21, VVRP 4;
SBAB 12, ORCO/SSC 2.
COED
Onderwijs/HICC 18, Dammers Group 2;
ORCO/SSC 7, MCB 6;
RBC/JM Guru 9, Centrale Bank 1;
Keyfin 7, SOAB 6;
SOAB 9, Centrale Bank 7;
Dammers Group 5, Grant Thornton 2;
CMC/ADC 8, GGZ/De Dames 3;
MCB 14, FLOW 13 (40+);
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. Awe nos tin hopi resultado di Torneo Hope 2025 ku a tuma lugá den wikènt. Djaluna último nos a laga espasio pa pone detaye, resultado i pòtrèt di Torneo Boy Constancia ku a hunga su fecha final djadumingu 30 di yanüari. Nos tin resultadonan di Diamond Stars League ku a sigi wikènt pasá na Sam Bunting Ballpark. Ekipo Rising Phoenix kampion di temporada 2024 a keda invikto ku un viktoria relatívamente fásil riba Nos Goso.
* * * * *
Santa Maria Pirates Dòbel A ta preparando fuerte pa nan move pa Mèksiko den kuadro di e torneo Baseball Champions League America. Santa Maria Pirates a reforsá ku algun hungadó di beisbòl lokal i algun profeshonal ku a partisipá den Serie de La Americas. Parse ku e kompetensia lo ta mesun fuerte ku Serie de Las Americas ku a tuma lugá fin di yanüari 2025. Weganan ta start dia 8 di aprel i terminá djadumingu 13 di aprel. Den dianan benidero nos tin mas detaye. Wladimir ‘Coco’ Balentien hòmber ku a hunga beisbòl na vários pais den region, na USA i na Hapon lo ta manager di Santa Maria Pirates.
* * * * *
E torneo Baseball Champions League America lo tuma lugá na Alfredo Harp Helu Stadion na Meksiko, ku ta stadion di Diablos Rojos. Ekipo Fargo-Moorhead RedHawks di North Dakota (USA) tabata kampion na 2023. Lo tin representante di Meksiko, Cuba, Kòrsou, USA, Nicaragua i Puerto Rico. Mèksiko lo keda representá pa Diablos Rojos, Cuba Leñadores de Las Tunas, Santa Maria Pirates di Kòrsou, Kane Country di Cougars (Illinois, USA), Tigres de Chinandega (Nicaragua), Titanes de Florida (Puerto Rico). E 6 ekiponan a keda repartí den dos pul. E ganadónan di pul lo pasa dirèkt pa semi-final i lo tin un semi-final entre number 2 i 3 di e pulnan. Ke mèn tur ekipo ta hunga dos wega den e buelta regular i lo klasifiká. Santa Maria Pirates a kai den pul B huntu ku Cuba i Cougars di (USA). Den e otro pul tin Meksiko, Puerto Rico i Nicaragua. Final ta dia 13 di aprel. Nos ta bai wak unda, ke men kua kanal di televishon por haña e weganan mira.
* * * * *
Miéntras tantu tur detaye ta kla pa start ku Torneo Kid Boca Chica djasabra awor na Frank Curiel Ballpark. Ta di 4 torneo Kid Boca Chica ku ta hunga tur aña na Frank Curiel Ballpark. E promé torneo a keda ganá pa Pitufos na 2022, di dos tabata Los Amigos i na 2024 tabata ekipo Nos Tambe Por ku a bira kampion. Kid Boca Chica no tin mester di introdukshon den Sòftbòl Slowpitch. Kid ta fundadó di ekipo Jaws i un di e pioneronan di Sòftòl Slowpitch na Kòrsou. Jaws a kumpli 50 aña na 2023 i nan a selebrá engrande birando kampion tantu den Liga van Engelen komo Liga 60. Den Liga 50 e aña ei nan a yega te semi-final.
* * * * *
Ekipo Lions 60+ a lusi fuerte djadumingu último ganando e ekipo Los Amigos den final. Den 2025 Lions lo tin hungadónan nobo manera entre otro Fransje Lambertina, Momon Martina ets den nan filanan. E manager Wotty Phelipa a sigurá nos ku su ekipo lo bai pa kampion di Liga 60. Lions tin tremendo picheo tambe ku entre otro Gregory Martijn, Elvis Jacobus, Ramon Moreta, Heinrich Wever i Roger Felicia. Los Amigos tin tremendo ekipo riba papel i riba tur liña, pero di un manera òf otro ora di bèrdat e kos no ta pasa p’asina e ekipo bira kampion. En todo kaso e 8 ekiponan di Liga 60 lo ta repartí den dos pul i e number 1-nan ta klasifiká pa final, miéntras lo tin wega pa di 3 lugá i un wega amistoso riba e fecha final.
* * * * *
Torneo Hope ta sigi e wikènt benidero i awe si nos lo tin tur resultado di siman pasá. Den edishon di djaluna nos a pone mas atenshon riba e final di Torneo Boy Constansia ku a resultá un éksito rotundo. Bon trabou di Archie Davelaar ku su crew ku a anunsiá durante entrega di premio ku pa otro aña lo tin mas ekipo den e torneo.Nos ta keda te aki pa awe i te mayan ku Poder di Dios.
