Torneo Kid Boca Chica ta start djasabra 5 di aprel na Frank Curiel Ballpark
WILLEMSTAD – Torneo Kid Boca Chica, un torneo di ekiponan di 60+ di Sòftbòl Maskulino, ta start djasabra 5 di aprel i lo terminá djadumingu 13 di mei na Frank Curiel Ballpark. Nos a risibí un komunikado di e ekipo organisadó di Torneo Kid Boca Chica ku ta ekipo Jaws.
“ E aña aki nos organisashon SBC Jaws 60+ ta organisá e di 4 edishon di e torneo di Sòftbòl ‘Kopa Rotativo Ivan Schoobaar’. E torneo aki ta keda organisá anualmente pa por duna honor na bida na e fundadó di e diferente ekiponan di Sòftbòl bou di nòmber di Jaws, ku ta praktiká e ramo di deporte aki den kuater kategoria di edat. Pues sr. Ivan Schoobaar a fundá ekiponan bou di e nòmber di Jaws ku ta praktiká Sòftbòl den liganan di kategoria di hoben adulto, Liga 40 plus, Liga 50 plus i Liga 60 plus.
Meta di e torneo aki ta tambe pa duna oportunidat na ekiponan di Sòftbòl Liga 60+ pa ‘warm-up’ promé ku kampionato kuminsá i stimulá moveshon i kompetensia sano entre e sòftbòlistanan di mayor edat i pa estrechá e lasonan di amistat deportivo. E torneo lo tuma lugá di dianan 5, 6, 12 i 13 aprel 2025 i lo hunga den Frank Curiel Ballpark. Durante e torneo bar i kushina lo ta bon surtí.”
SKEMA
Djasabra 5 di aprel, pa 10.00 Curacao Super Stars – Jaws, 12.00 Nos Tambe Por – Los Amigos, 14.00 Nos Power – Pitufos, 16.00 Sluggers – Lions. Djadumingu 6 di aprel 10.00 Jaws – Nos Power, 12.00 Pitufos – Curacao Super Stars, 14.00 Los Amigos – Sluggers , 16.00 Lions – Nos Tambe Por.
Belastingdienst vs Keyfin i vários wega kayente den Torneo Hope e wikènt aki
WILLEMSTAD- Torneo Hope ta sigi djasabra i djadumingu na Van Engelen Ballpark. Djasabra mainta pa 10.30 lo tin wega entre Belastingdienst i Keyfin. Den e Pul aki FDDK (4-0) ta na promé lugá i Keyfin na di dos lugá ku 3-1. Belastingdienst ta na di 3 lugá ku rèkòrt di 2-2.
Otro wega kandela ta ekipo SVB/Aventa kontra ekipo Curacao Growth tantu den COED komo Soshal Maskulino djasabra atardi i anochi. Tin un wega di Soshal Femenino tambe entre CITCO i Onderwijs. Naturalmente e wikènt ta kargá ku wega di Soshal 40+ i Maskulino No Komersial. Bar i kushina ta bon surtí i o tin animashon di DJ i narashon den gran forma.
MAS INFORMASHON DI SÒFTBÒL I BEISBÒL
Lesadonan di Deporte Kòrsou, bon dia i felis wikènt. Torneo Hope ta sigi den wikènt i Torneo Kid Boca Chica ta start e wikènt aki. Torneo Hope ta na Van Engelen Ballpark riba tereno A i B i Torneo Kid Boca Chica pa veteranonan di 60+ ta na Frank Curiel Ballpark. Nos tin un komunikado di Torneo Hope ku ta terminá dia 13 di aprel, ke mèn e torneo lo dura dos siman. Awe den kolumna tambe nos tin resultado di Diamond Stars League ku a tuma lugá wikènt pasá na Sam Bunting Ballpark. Djabièrnè 4 di aprel, ekipo Treausre a dal Mas goso duru ku skor di 21-5 i Rising Phoenix a derotá the Fighters 4-1.
* * * * *
Nos a risibí up to date standing di Torneo Hope. Pa loke ta trata Soshal Maskulino tin un total di 22 ekipo repartí den 4 pul. Brandweer, FDDK, Aqualectra 1 i SBAB ta na kabes di nan pulnan i e ekiponan SVB, Keyfin, SOAB i CITCO ta na di dos lugá den nan pul. Soshal Maskulino ta e pul ku manera semper tin mas ekipo. E biaha aki e ekipo popular di Soshal Maskulino Open a preferá di keda afó di e Torneo. Den COED tin 3 pul di 5 ekipo. COED naturalmente ta Sòftbòl kaminda ta alineá mucha hòmber i mucha muhé riba tereno. CMC/ADC ta Pul A, miéntras den Pul B ekipo Keyfin/ETR Cooling ta invikto den Pul B. Den Soshal Femenino tin 4 ekipo i Onderwijs tin rèkòrt di 1-0.
* * * * *
Pa loke ta trata 40+ SDKK/GGZ ta úniko ekipo invikto, pero ku 1-0. Den Maskulino Non Komersial, The Living Legend ta úniko ekipo invikto ku 4-0 sigí pa ekipo Fridays ku tin 3-1. Nos ta pendiente pa mas informashon i e agrupashon musikal ku ta toka e wikènt aki. Bon ambiente, bon wega i hopi seramentu di amistat pa loke ta trata Torneo Hope 2025 rumbo pa bini bèk ku e parti Soshal na promé lugá i no muchu armamentu di tim pa gana. Un total di 54 ekipo den Hope den 2025. Antes tabata mas hopi, pero ku hopi ekipo Soshal Open adén i tambe e parti di COED Open.
* * * * *
The Diamond Stars League ta sigi awenochi ku dos wega na Sam Bunting Ballpark. Den e promé wega ekipo Treasure lo topa ku Mas Goso sigí pa Rising Trotters kontra di The Fighters. Djasabra 5 di aprel ta Mas Goso kontra Rising Phoenix i The Fighters vs Nos goso. Standing di The Diamond Stars League ta Rising Phoenix 4-0, Treasure New Era 3-1, Nos Goso 2-2, Mas Goso 1-3 i The fighters 0-4. Den e sigiente kolumna nos tin e numeritonan di e weganan di wikènt pasá.
* * * * *
Djabièrnè siman pasá Mas Goso a gana The Fighters 7-0 ku ta parse mas un defolt segun nos. Den otro wega Treasure a gana Nos Goso 6-0 di un manera sorprendente. Ekipo Nos Goso no sa risibí blankeo. Treasure a dal 12 hit i hasi 1 eror. Picher ganadó tabata Suyenne Otto Apostel i Tanusi Delando a bati di 2-2. Carlientje Cleopa tabata e picher pèrdèdó. Miriela Carlo bati di 1-1. Pa loke ta djasabra Rising Phoenix a gana pèrtá di Treasure 6 pa 5. Rising Phoenix a konektá 9 hit i hunga sin eror. Marie Windster a gana den relevo pa Monica Noor. Ashantely Giterson a bati di 2-2. Treasure a bati 15 hit i hasi 3 eror. Suyenne Otto – Apostel tabata e picher pèrdèdó.
* * * * *
Nos Goso a gana Mas Goso ku skor di 10-4 djasabra 29 di mart. Nos Goso a bati 8 hit i hasi 2 eror. Carlientje Cleopa tabata e picher ganadó i Natasha Marcelia a bati di 2-2. Emily Jonis di 3-2 ku un homerun. Mas Goso tabatin 8 hit i ku 6 eror. Miluska Leito tabata e picher pèrdèdó. Anthien Bomberg i Stephanie Adamus a bati di 2-2.
* * * * *
Djadumingu lo hiba Edson ‘Tan’ Christina na su último lugá di sosiegu. Tan Christina ta èks futbòlista, rèfri i ta ruman di Bebi Christina èks sòftbòlista estrea ku ainda ta aktivo den Sòftbòl Femenino Veterano. Akto di entiero ta djadumingu 6 di aprel i bishita di kondolensha ta di 1’or pa 3’or pm na El Tributo Otrabanda. Despues lo hiba e defuntu na su último lugá di sosiegu na Santana di Santa Maria. Nos ta keda te aki pa awe. Te mayan ku Poder di Dios.
