Wild Card di Liga 50 entre 4 ekipo ta start djasabra awor
WILLEMSTAD- Wild Card di Liga 50 ta start djasabra awor na Van Engelen Ballpark. Ta promé biaha den Liga 50 ku lo tin un wild card kaminda ekiponan entre number 4 i 7 lo enfrentá otro. Ekiponan Pitufos, Baranka, Flamboyan i Sluggers a klasifiká na puestonan 4, 5, 6 i 7. Ekiponan ku a klasifiká number 1, 2 i 3 ku ta Marlins, Jaws i Ban Serio lo drenta play-off dia 2 di novèmber. Weganan pa djasabra awor lo ta pa 12’or Pitufos vs Sluggers i despues 2’or Baranka vs Flamboyan. Den kolumna nos tin mas detaye i nos tin resultadonan di siman pasá djasabra.
Sluggers 8, Catpower 7
Sluggers a dal 8 hit i hasi 1 eror. Junny Marselia i Percy Gosepa a bati di 1-1. Raimy Pastor, Frensel Esclodina i Albertico Leito a bati di 2-1. Norman ‘Slobbo’ Sloop a bati di 3-2. Catpower a bati 7 hit i kometé 1 eror. Isaac Francees tabata e picher perdedó. Elmus Poulo a bati di 1-1. Isaac Francees di 3-2 i Hendrick Gabriel di 3-2.
Pitufos 4, Flamboyan 1
Pitufos a bati 7 hit i hunga sin eror. Rignald ‘Kopech’ Hooi tabata e picher ganadó. Ericson Windster a bati di 1-1. Gerald Zimmerman di 2-2. Flamboyan/Gamers a bati 3 hit i no a kometé eror. Gilbert Keller tabata e picher pèrdèdó i Gilbert Juliet a bati di 1-1. Gilbert Keller i Darren Hollander tambe a bati di 1-1.
Ban Serio 6, Baranka 2
Ban Serio a bati 11 hit i kometé 1 eror. Michelangelo Boekhoudt tabata e picher ganadó. Rigobert Cijntje a bati di 2-2, Geronimo Dalfaar di 1-1, Jair Josepha i Reinaldo Casimiri di 3-2. Jair Josepha a konektá un homerun. Baranka a konektá 7 hit i hasi 1 eror. Kenny Hellement tabata e picher pèrdèdó. Edmar Cornelia, Sedeney Lourens, Josepha, Everon, Grensley La Croes i Shendy Cras a bati di 2-1.
Jaws 15, Artemisia 6
Jaws a bati 13 hit i hasi 1 eror. Ralph Hermans tabata e picher ganadó. Anthony Leonora bati di 3-2, Manuel Rekondie di 3-2. Lesley Fer, Victor Caldera, Rudsel Wilson (60+ connection) a bati di 1-1. Amador Nita tambe a bati di 1-1.
Artemisia a bati 7 hit i kometé 3 eror. Wederfoort tabata e picher pèrdèdó. Freddy Castillo a bati di 2-2. Charles Daal a konektá un homerun.
MAS INFORMASHON DI SÒFTBÒL I BEISBÒL
Lesadónan di Deporte Kòrsou, bondia. Nos ta rumbo pa un fin di siman kaminda lo tin play-off di un wega tantu di Liga 50 komo Liga 60. Den Liga 50 djasabra tin weganan di wild card entre ekiponan 4, 5, 6 i 7 den Liga 50. Djadumingu tin play-off page system, 1 wega entre 1 vs 2 i 3 vs 4 na Frank Curiel Ballpark den Liga 60. Wikènt kayente kaminda grandinan manera Baranka i Pitufos den 50 lo por topa nan kontrinkante i kai afó. Skema di e wikènt aki den 50+ ta lo sigiente. Pa 2’or ekipo Pitufos number 4 (11-7) lo topa ku Sluggers number 7 (7-11), despues pa 4’or ekipo Baranka Sharks (10-8) number 5 lo enfrentá number 6 Flamboyan/Gamers (9-9). E serinan lo bira interesante i nos lo resumí kon e weganan a bai durante kampionato regular entre e ekiponan menshoná. Ganadónan lo topa ku otro djadumingu pa saka number 4 pa despues pa start ku play-off 1 vs 4 i 2 vs 3.
* * * * *
Djadumingu den Liga 60 ekiponan Nos Tambe Por, Jaws, Pitufos i Lions den Frank Curiel Ballpark. Nos Tambe Por (12-2) ku a terminá number 1 lo topa ku Jaws (10-4) ku ta number 2. Den e otro seri ekipo Pitufos ku a kaba number 3 (9-5) lo hunga kontra Lions number 4 (8-6). E orarionan pa loke ta e weganan aki no ta konosí. Djarason anochi tin un reunion entre ekiponan ku a klasifiká, direktiva i umpirenan i pa djabièrnè nos lo tin e skemanan. Probablemente e seri entre Pitufos vs Lions lo hunga promé i despues e wega entre Nos Tambe Por i Jaws. Weganan lo keda di skèdjel sea 1’or i 3’or òf 12’or i 2’or. 12’or i 2’or lo ta mas probabel debí ku weganan ta bai 7 inning i skuridat lo por manifestá den e wega number 2.
* * * * *
Pa loke ta Beisbòl Veterano, e wega entre Jandoret Raiders i Broncos dj djasabra último, a keda empatá despues di 6 inning. No ta konosí ku lo sigi e wega bèk òf lo hunga e wega kompletamente di nobo. Ekiponan ku ya a klasifiká ta Quality Stars 16-2, Santa Maria 16-2, Santa Rosa Memories (13-5), Isla Crackers (12-4) i Yesterday (10-8). 6 ekipo ta klasifiká i ta pendiente di e ganadó di e wega entre Broncos (8-10) i Jandoret Raiders (6-11). Jandoret mester hunga djasabra awor kontra di Marlins, miéntras Broncos falta e wega kontra Jandoret Raiders.
* * * * *
Direktiva di Beisbòl Veterano ta rekordá ekiponan ku tin debe di kontribushon i tambe debe atras di bala. Ekiponan ku debe naturalmente no por hunga play-off i esnan ku a kai for di play-off otro aña mester paga pa sigi kompetí den Beisbòl Veterano. Mester paga sino lo tin pasamentu di berguensa na momentu ku play-off start. Weganan pa e wikènt aki ta djasabra 13.00 Otrabanda – Quality Stars, 15.30 Marlins – Jandoret Raiders. Djadumingu ta Jandoret Raiders vs Otrabanda den 50+ pa 11’or, sigí pa Azucar kontra Santa Rosa pa 1’or. E último wega pa 3.30 pm lo ta Isla Crackers kontra Marlins. Lo ta wega number 100 di kampionato regular. Pa 2 di novèmber lo tin wega di Santa Maria Pirates kontra Isla Crackers, wega di dos dos buelta ku no a tuma lugá ainda.
* * * * *
Den wikènt nos a risibí e notisia, ku e gran pelotero/coach/komentarista di Beisbòl, Ibi Adelina a bai sosegá. Ibi ta tata di Donald ‘Beer’ Adelina ku ta hopi aktivo ketu bai komo coach i si tin mester hungadó di Sòftbòl Slowpitch i Beisbòl Veterano, Beer ta kla pa yuda. Ibi, na bida mener di skol, tin henter un historial komo hungadó di Beisbòl na Hulanda i na Kòrsou den e ekipo Santa Rosa Indians. Dia, ora i lugá di entiero lo keda anunsiá despues. E siman aki lo tin entiero di Dennis d’Arnault, tremendo pelotero i persona. Djaluna nos tabatin algun detaye di Dennis d’Arnault ku a bai laga nos djabièrnè siman pasá. Liga 50 i Beisbòl Veterano a tene un minut di silensio pa Dennis d’Arnault durante wikènt ku a pasa.
* * * * *
E dianan aki tur hende ta prepará kanselá sitanan òf keda sin traha sita mes, debí ku World Series ta bai start entre New York Yankees i Los Angeles Dodgers djabièrnè awor. Ora bo tende e preisnan di entrada pa wak wega den Dodgers Stadium, bo kurpa ta kue rel. Na Yankee Stadium lo ta pio. E preisnan mas barata ta 1.100 dollar i esnan mas karu 60.000 dollar (pa Luxury Executive Suites). Inkreibel. Te djabièrnè ku Poder di Dios.
