J'dah Girigorie deportista di aña 2022 ganadó premio Beto Adriana
WILLEMSTAD – E super prospekto picher di sòftbòl J’dah Girigorie a gana e premio deportista di aña 2022. J’dah Girigori a sali Deportista Femenino Senior di 2022 i na final a bira e ‘overall winner’ ganando e premio Beto Adriana komo e mihó deportista di 2022. Tabata un gran anochi di honor tremendo organisá pa Federashon deporte i Olimpiko di Kòrsou(FDOK).
Un publiko grandísimo tabata presente na WTC pa disfrutá di e tremendisimo programa titulá ‘Honors Night’. Entre otro Minister di Enseñansa Siensia Kultura i Deporte, sr. van Heydoorn, direktiva di FDOK, representante di famia di Beto Adriana, deportistanan ku a destaká den 2022, miembronan nobo di Salon di Fama, baluartenan di e aña aki, eks miembronan di Salon di Fama, representante di spònsernan, Komishon Atleta i dirigentenan di aña (ADA).
Despues di e antesala, maestronan di seremonia Christine Dania i Jefterick Luciana a habri e programa pa despues sigi ku himno di Kòrsou interpretá pa Cènza Sambo i Wendy-Jane Gomez. Invokashon di Angelique Klooster. MC- nan a menshoná presensia di esnan ariba menshoná sigi pa e programa ku tabata prospektonan, Wes di Aña, Ekipo di Aña, baluartenan, premio Yu di Kòrsou i e otro nominadonan kustumbrá. E aña aki tabatin 3 premio nobo ku ta Premio Yu di Korsou, Selekshon di Aña, Premio Enith Brigitha, Un anochi hopi eksitoso i nos tin e ganadónan. Den kurso di dianan nos lo tin CV di e ganadónan i mas detaye di historia di Salon di Fama.
