WILLEMSTAD - Dia 19 di aprel Confederacion Panamericana de Billar ta manda un anunsio pa tur presidente di federashonan miembro. Kaminda ta anunsiá ku e organisashon Matchroom Multi Sport lo bai organisá e kampionato mundial bola 9 2021. Pero tambe a bini huntu ku e anunsio tur e reglanan pa por drenta Reino Uni i einan ta aparesá nòmber di Kòrsou komo un di e paisnan ku por drenta Inglatera. Mesora Michael Arvelo ku ta miembro di direktiva di CPB a tuma e inisiativa y a inskribí nòmber di Jeffrey Nieuwenhuyzen i pa despues presidente di federashon lokal Sr. Sybren Boekhoudt ofishalmente inskribí nos hungadó. Sr. Arvelo mirando ku e chèns ta grandi pa nos deportista por haña un di e puestonan disponibel no a sinta ketu i porfin djaluna 3 di mei konfirmashon a drenta ku ofishalmente Jeffrey Nieuwenhuyzen lo ta un di e partisipantenan na kampionato Mundial senior bola 9 2021. E evento lo tuma lugar di 6 pa 10 di yüni na Marshall Arena na e siudat Milton Keynes na Inglatera .
Ken ta Jeffrey Nieuwenhuyzen ??
Jeffrey a nase 31 di òktober 1990, ku edat di 12 aña ela kuminsá práktika e deporte di biyar i for di komienso ela aserka e úniko instruktor di biyar di Korsou ku ta Michael Arvelo kende a giyé y siné e base kompleto di biyar. Jeff a sigi praktika i train duru i asina na 2006 Sr. Arvelo ta biaha kunè pa e isla di Guadeloupe kaminda e ta partisipá den su promé evento internashonal kual ta kampionato di Karibe hubenil. Aki ku hopi orguyo eta konkista e título supkampionil. Ela sigi i asina a kuminsá partisipá den eventonan ofishal di Federashon Biyar Kòrsou i ta konkista su promé titulo nashonal na 2011. 10 aña despues Jeffrey tin un total di 22 titulo nashonal, kual ta reparti entre 4 di bola 8 i 6 pa bola 9 , 6 pa bola 10 i 6 pa straightpool. Un nota importante ta ku Jeff ta un di e tres kargadónan di e título di Diamond Crown Player. Esaki ta keda otorgó na e hungadó ku gana titulo nashonal den tur 4 disiplina. E dos otro hungadónan ta Anthony Wever y Michael Arvelo.
Na 2017 eta partisipá na e French Open 9 Ball i ta finalisá den grandinan di e mundu di pool na puesto 5.
Huntu ku Jeffrey lo biaha representando CPB , Ruben Bautista di Mexico i Alejandro Carvajal di Chile. Interesante ta ku despues di 20 aña tin un yiu di Korsou den un mundial atrobe. Ultimo di nos ku a partisipa tabata Jeff su instruktor i amigu Michael Arvelo ku na aña 2000 a partisipá na Cardiff ,Wales.
Federashon Biyar Kòrsou ta sumamente kontento ku Jeffrey Nieuwenhuyzen ta riba kaminda pa representá nos dushi Kòrsou den e magno evento aki i ta deseé tur klase di éksito.
Federashon Biyar Kòrsou ta manda un gradisimentu speshal na Michael Arvelo pa su gran esfuerso realisá pa awe nos tin un representante den mundial bola 9 2021.
