Joshua Leito ta firma pa hunga Beisbòl profeshonal ku organisashon New York Yankees
WILLEMSTAD- Djabièrnè 28 di yanüari 2022, e hungadó di 16 aña Joshua Leito a firma pa hunga Beisbòl profeshonal ku organisashon di New York Yankees. E firmamentu a tuma lugá na e Bar Restorant Faborito na Palu Blanku den presensia di su mayornan. Skout Douglas Skyles skout internashonal di Yankees a firma e prospekto dilanti un gran kantidat di fanátiko di Marchena Braves, coach i personanan ku konosé Joshua Leito foi chiki. Notaris Palm tambe tabata presente i representante di Yankees Doulas Skyles. Biko Hooker asistente di Xavier Gomez tabata presente na e firmamentu.
Pronto Joshua lo sali pa República Dominicana pa start ku su karera profeshonal. Ela start ku organisashon di Santa Maria pa despues pasa pa Marchena. Na hopi okashon Joshua a reforsá e ekipo Sint Michiel Sharks i hunga den selekshon di Liga Pabou. Joshua a kuminsá hunga Beisbòl for di chiki den organisashon di Santa Maria. Dor ku Joshua tabatin hopi energia un amigu di su tata Roy Leito a bisa pa lagé kuminsá hunga Beisbòl. Su mama Lizette Leito - Meursing i su tata a lagé start den organisashon di Santa Maria. Temporada 2021 Joshua a picha i hunga shortstop den ekipo di Beisbòl Dòbel A Marchena Braves. Joshua a nase na Kòrsou dia 20 di mart 2005.
