Junior Millerson a drenta Salon di Fama

Junior Millerson un eminensia den deporte a drenta Salon di Fama djaweps 18 di yüni

Djaweps dia 18 di yüni, William ‘Junior’ Millerson a drenta Salon di Fama. E super deportista i dirigente aki tin algun luna ku kebrante di salu pero ta fuerte i sigur ku elo rekuperá. Na 2001 Deporte Kòrsou a tene un entrevista super profundo ku e karateka I dirigente riba nivel Mundial aki. Millerson a keda president di NAOC te na 2010. E entrevista ekstenso ta riba wèpsait Deporte Kòrsou tambe.

ENTREVISTA DI 2001

Junior Millerson, personahe ku no mester di introdukshon den nos mundu di deporte. Junior Millerson ta presidente di e organismo mas grandi di deporte na Antiyas, NAOC, ku a kumpli 70 aña (NA 2001). Junny a destaká en grande den e deporte di Karate tantu riba nivel lokal komo internashonal. Den e kaso aki komo deportista, dirigente tékniko i atministrativo. Den e edishon number 42 di Revista dDeportivo Kòrsou ( e tempu ei) nos a skohe Junior Millerson komo deportista destaká.

JUNIOR

William Junior Millerson a nase dia 10 di yanüari 1953 na Aruba i ta biba na Kaya Kòkchi na Seru Grandi.

Despues di kaba MULO na Kòrsou, Junior a bai studia na Hulanda (HTS) i gradua na aña 1975 komo ingeniero den elektrónika i telekomunikashon. Junior ta manager di un kompania na aeropuerto ku ta hiba di nòmber SITA.

FAMIA

Junior su tata yama Walter i su mama Mary West. Segun Junior ningun di 2 no a hasi deporte. Junior ta bini di un famia di 8 ruman, 5 hòmber i 3 muhe. Dos ruan di Junior, John i Randolph Millerson a praktiká Karate na nivel haltu. Nan a tuma parti na basta okashon de selekshon di karate. Tantu John di 40 aña komo Randolph di 38 aña ( e tempu ei na 2001) no ta praktiká Karate mas. Albert, otro ruman hòmber di Junior tambe praktiká Karate, pero serka Henry Gougon.

Junior tin 2 yu hòmber, Darcey di 18 aña (awor 39 aña) i Patrick di 17 (38 aña). E yu muhé Sheena tin 7 aña (28 aña) . Junior su señora yama Jacqueline.

E yu hòmbernan di Junior a praktiká algu di Karate i tambe Beisbòl. Tur dos ta na Hulanda. Sheena, e yu mas chiki di Junior ta praktiká Karate.

‍

KOMIENSO

“Tabatin un amigu di mi ta trein Karate serka Henry Gougon. Ela enkurashami pa bai trein. Mi a bai trein serka Henry Gougon. Algun luna despues mi a bai studia na Hilversum, Hulanda i kai den e skol di Van Hellemund Sportschool. E skol ei tabata kampion di Hulanda i un di e mihónan di Europa. Einan mi a haña interes pa trein Karate na un nivel haltu. E skol tabata hopi bon organisá ku mas o ménos 500 miembro I mi a haña bon guia ku ayudo kaminda mi yega.

Mi a hunga Futbòl tambe tantu na Hulanda komo Kòrsou. No den tim di nivel haltu naturalmente, gewon amatùr, paga kontributie, ets. ets.

Na Kòrsou den mi Hubentut promé ku mi a bai Hulanda, mi a hunga Futbòl den tim. Mi a hunga den un tim di Omroep sportvereniging. Mi tabatin un mentor, un señor Pape i e tabata traha na Wereldomroep.

Antes ora bo bai Hulanda bai studia, anto bo ta hòben – mi a bai Hulanda bai studia ku 17 aña – bo ta haña un mentor ku ta sòru pa tur kos. Mi a praktiká Beisbòl tambe na Kòrsou, pero no den tim. Mi ta gusta hunga Futbòl, semper mi a hunga Futbòl banda di Karate. Mi a hunga den un tim di aeropuerto, den un tim ku nan ta yama Daltino Tours, tim de Landsradio i awor mi ta militá den tim di Futbòl Abrahamsz. “

HULANDA

Na Hulanda aña 1973 Junior Millerson a bira kampion di e disiplina Karate i keda kampion te ku aña 1975. Millerson no tabata un Heavy Weight. E tempu ei e tabatin alrededor di 75 kilo.

“Mi tabata kampion den Middle Weight. Mi a yega di bira kampion di Hulanda di tur kategoría siendo un Middle Weight. Esei tabata na aña 1976. Mi a bira kampion Eropeo den mi kategoría i estilo i sali supkampion den tur estilo. Ku e ekipo di Hulanda na 1975 nos a sali di tres di Mundu. Aña ’76 mi a bini Kòrsou i na ’77 nos a bai Mundial na Tokio i bringa kontra Hulanda pa kolmo i nos a sali di 4 di Mundu. Den e aña ei no tabatin kategoría di peso. Den Karate bo por a bringa pa selekshon di Hulanda i despues bringa pa selekshon di Kòrsou. Dependé kon e paisnan a yega na akuerdo i e mester ta mará na un lapso di tempu tambe.”

KARATE

Junior: “Karate ta un deporte rekonosé dor di Komité Olímpiko Internashonal, pero tòg e no ta riba e programa Olímpiko.

T’asina ku na aña 1986 Federashon Mundial di Karate a wòrdu rekonosé komo un deporte Olímpiko. Tabatin un otro federashon di Karate tambe i a bini un pelea entre e dos federashonnan aki. Komité Olímpiko a disidí e pora ei di kita e rekonosimentu. Teakwando a bira promé ku Karate e ora ei apesar ku Teakwando tabatin kuater federashon internashonal. E kos ei tin basta polítika adén. Karate tin 164 pais komo mimbro i por ehèmpel Sòftbòl no ta yega ni mitar i tòg nos ta for di Olimpiada. Deporte tin hopi polítika adén.”

‍

DIRIGENTE

“For di dia ku mi tabata na Hulanda komo studiante mi tabata duna lès na skol. Ke mèn, más o ménos for di aña 1974, pues ku 21 aña mi karera komo dirigente a kuminsá.

Komo dirignte atministratiivo mi a kuminsá na aña 1976 dia mi a regresá kòrsou. Mi a lanta Curacaose Karate Bond.

Mi a trein selekshon di Kòrsou for di aña 1976 te ku 1992. Hopi aña mi a biaha komo entrenadó, coach, dirigente i atleta pareu. E trabou tabata sumamente duru. Mi a bai Mundial di Taiwan ku kasi ocho pa nuebe hende. Mi mes tabatin ku bai reunion, mi mes mester a coach i mi mes tabatin ku bringa. E ta stroba mi i e ta difísil sigur. Ora yega bo bùrt bo tin ku hinka muchu mas tantu adén. Mi a bira presidente di CSF. Mi tabatin más o ménos 8 aña komo presidente di CSF. Dia mi a bira presidente di NAOC na aña 1997 mi a baha komo presidente di CSF. Aworaki kasi sigur lo mi bai 4 más, debí ku no tin kontra kandidato pa presidente”, Millerson ta sigui splika.

KARATE EKSITOSO

“Nos a logra hopi den pasado, dor ku nos komo organisashon di Karate ta plania. For di kuminsamentu di aña ta forma un selekshon i keda trein hinter aña. Ami komo tékniko ta eksigí lo máksimo i mi muchanan. Mi ta prepará nan pa nan bira kampion. Mi ta eksigí di nan pa nan kompetí fuerte pa nan bira kamp[ion. Bo sali di dos, mi no ta keda kontentu.

Nos tabata hasi uso di eksperensianan ku ami tabatin. Mi tabata bai Europa bèk hopi i bini ku e eksperensianan. Despues Dudley Josepa a bai Hulanda i bini bèk ku su eksperensianan. Un man tabata yuda otro. Ami a bini ku mi eksperensia, mi tabata kampion. Mi no tabatin miedu di otro karatekanan ku tabatin skol pa yudanan, pasobra nos tei pa yuda otro.

Konhuntamente nos a lanta. Por ehèmpel, Dudley su meta tabata pa bati mi. E tin su skol, mi tin mi skol, nos ta kompetí fuerte kontra otro. Despues di e evento ei por ta nos mes ta bai deskoteka huntu. No tin envidia, nada di e kos ei.

Dudley Josepa a bira kampion Mundial aña 1988 na Egipto i na Malasia ela sali supkampion Mundial na 1994.

1988 ela bira kampion ku Hulanda i na 1994 ku Antiyas. Ami a yega di 4 di Mundu, pero e tempu ei tabata open. Mi tabata Middle Weight i mi a bringa kontra Heavy Weightnan. Mi por a bai final, mi tabatin un gai ganá fásil i mi a kibra su nanishi den pelea i keda deskualifiká.”

Junior ta splika ku tempu KODEKOR (Kolumnista Deportivo Kòrsou) tabata organisá evento, ela sali Deportista di Aña di Kòrsou. Ela sali Dirigente Tékniko di Aña tambe den e evento organisá pa CSF.

PAISNAN

“Na Asia mi a bai Hapon, Taiwan, Malasia. Mi a bai Australia, Afrika, Egipto i Sur Afrika.

Na Europa: Inglatera, Alemania, Fransia, Spaña, Suesia, Suisa, Bulgaria, Gresia, Monte Carlo i Monaco. Italia so mi no a bai.

Sur Amerika: Mi a bai tur pais ku eksepshon di Uruguay i Frans Guyana.

Den Karibe mi a bishitá Sto Domingo, Puerto Rico, Cuba, St. Kitts, Antigua, Trinidad, Haiti ets.

Amerika Sentral: El Salvador, Meksiko, Guatemala i Honduras. E aña aki lo mi bai Nicuaragua. Lo mi bai pa yuda organisá un kampionato. Mi a bai diferente estado Meriklano i duna lès ayanan tambe.”

‍

IDIOMA

Mi ta papia Hulandes, Spañó, Ingles i tambe Franses. E ta yuda hopi dirigente den nos area. Hopi biaha ku tin kosnan na Haiti, mi ta fungi komo traduktor pa e hendenan ei, dor ku mi ta komprondé nan lenga, Franses.

Mi a yega di tene spich kaminda nan ta bini ku traduktor. Mi ta papia na Ingles, nan ta tradusí na Spaño. E traduktor ta tradusí otro kos di loke mi a bisa, anto e ora ei mi ta bai over na Spaño i keda papia Spaño i asina kosnan ta brua un tiki.

Ta pesei nos hendenan ta briya den Komitenn Internashonal. Bo ta haña bon voto den elekshonnan pasobra bo por komuniká ku nan.”

HOBI

“Mi ta gusta sali, pero mi ta bisa ku mi hòbi ta Karate, Karate ta mi pashon. Mi gusta kome kosnan kriyoyo, kosnan di laman. Owto preferi di mi ta owto Merikano i no muchu chiki. Mi soño defakto ta un Jaguar, un owto Jaguar i lo mi logré tambe.”

BON EKSPERENSIA

“Bon eksperensia ……………… ya ………….. masha hopi. Mi a konosé hopi pais, hopi hende. Bo ta haña masha hopi eksperensia . I komo dirigente nos mester plania, laga nos atletanan tambe konosé hopi pais. Nos mester plania bon i mester ta bon prepará. Ora mi bai komo hefe di delegashon, mi ke pa esnan di e otro paisnan bisa ku nos a bini bon i mi ke pa semper nos logra medaya.”

MAL EKSPERENSIA

“Mundial 77, e aña ku mi tabata den mi flor i hopi skèrpi. Mi a kibra mi kontrinkante su nanishi I keda deskualifiká. Mi no por a bai final. Pa kolmo un amigu di mi, un èkskontrinkante di mi di selekshon, Otti Roethof, ela nase na Suffisant, a bai final.

Den deporte nan ta bisa ku tin más polítika den deporte ku tin den polítika mes. Hopi hende ta papia kos den bo kara i bisa otro kos tras di bo lomba. Mi ta preferá un hende ku ta bot. Tin hopi ku ta bisa e kos manera e ta i tin tambe ku ta gusta dal bou di faha.

MEK RIBA LO MAKSIMO

“Semper mek riba lo máksimo. Bai pa number unu i lo bo logra. Si bo sali number dos bo no keda satisfecho mesora. Traha duru i ku planifikashon lo bo logra.”

Revista Deportivo Kòrsou a puntra Junior si ela yega di bringa riba kaya.

“Nò, mi no sa hañami den problema, mi ta evitá problema. Na chiki mi tabata bringa hopi, pero na grandi si nunka. Na skol mi tabata bringa hopi. Mi ta bringa si, pero komo deporte. Ta dependé di hende. Tin hende ku a trein binti aña sin por defendé nan kurpa. Ta bo mester sa kiko bo ta hasi, pero nos ta siñabo evitá problema.

Millerson a mustra Revista Deportivo Kòrsou un pòtrèt kaminda ela gana Willy Banks i bira kampion Panamerikano. Millerson a bisa ku Willy Banks a sigui den Tae Bo ta traha pelíkula i ta miyonario aworaki.

Mustrando nos e pòtrèt kaminda ela bringa ku Banks, Millerson a terminá e entrevista!

Kuríkulo Deportivo di William Millerson

Fecha di nasementu : 10 di yanüari 1953

Lugá di nasementu : Aruba

Profeshon : Ingeniero

Grado : 6 dan estilo WADO

1973 – 1976 Kampion di Hulanda den kategoría peso Mediano;

1973 – 1975 Supkampion di Europa kategoría peso Mediano;

1973 Kampion di Europa estilo WADO kategoría peso Habrí;

1975 Kampion di Hulanda kategoría Habrí i kampion de Europa estilo WADO

kategoría Habrí;

1973 – 1976 Number 6 entre e mihónan di Europa den Revista Black Belt;

1975 Number 3 ku e ekipo di Hulanda na e Mundial di Long Beach, California;

1976 Kampion Latino-Amerikano i di Karibe na Sto. Domingo;

1977 Di kuater lugá na e kampeonato Mundial na Tokio. Esaki tabata e último Mundial ku

tabatin solamente ‘kumite’ den kategoría Habrí;

1979 Kampion Latino-Amerikano i di Karibe na Guatemala;

1979 Terser lugá na e kampionato Panamerikano organisá pa Nishiyama na Argentina;

1981 Kampion Panamerikano kategoría Pisá.Tabata e promé kampionato organisá pa PUKO;

Di 1975 te ku 1984 ela partisipá na 5 kampionato Mundial. Durante e kampionato

Mundialnan despues di 1975 ela partisipá komo entrenadó, coach partisipante;

1976 – 1992 Entrenadó i coach di e ekipo di Kòrsou;

1986 – 1995 Sekretario General di PUKO;

1994 Miembro di bestuur di e Federashon Mundial di Karate;

1995 Presidente di e Federashon Panamerikano di Karate i Vise-Presidente di e

Federashon Mundial di Karate;

1997 Presidente di Komité Olímpiko di Antiya Hulandes;

1998 Promé Vise-Presidente di Federashon Mundial di Karate.

William Millerson ta un di e promé tres medayistanan di Hulanda for di dia Hulanda a kuminsá partisipá na kampionato di Europa i Kampionato Mundial.

Tin ku menshoná ku ela duna diferente klínika, entre otro na Argentina, Brasil, Costa Rica, Cuba, Estados Unidos, Guatemala, Hulanda, Panama, Sto. Domingo i Venezuela.

‍