Kampionato Latino di Intermediate League di 27 di yüni pa 2 di yüli den Stadion Post 6
WILLEMSTAD – Djaluna 20 di yüni 2022 na sede di FFK na Brievengat tabatin Konferensia di Prensa en konekshon ku kampionato Latino di Intermediate League. RBC Royal Bank ta un di e spònsernan prinsipal di e kampionato manera semper den kaso di kampionatonan regional di Little League. E kampionato lo tuma lugá di djaluna 27 di yüni pa djasabra 2 di yüli den Stadion Post 6 ku partisipashon di 5 ekipo. Dos selekshonnan di Kòrsou i di Aruba, Kòrsou Pabou, Kòrsou Pariba, Mèksiko i Colombia lo partisipá den e kampionato regional. Na e Konferensia di Prensa tabata presente District Administrator sr. Floran, representante di spònser RBC Royal Bank sr. Sharier Dorand i representante di Minister di Deporte Sr. Errol Bishop. Miembronan di direktiva di Liga Pariba i Liga Pabou tambe tabata presente.
Sr. Floran a hiba palabra i duna hopi detaye durante di e Konferensia di Prensa. Ku e kampionato aki na Kòrsou lo ta bon chèns pa nos por gana i regresá e kampionato Mundial na Livermore (California) di 31 di yüli pa 7 di ougùstùs. Na 2014 i 2016 Kòrsou a representá Latino Americano na kampionato Mundial di Intermediate. Floran a papia tambe di entrada ku ta 5 florin pa adulto i 2 florin pa mucha. Mas aleu Floran a elaborá riba e reglanan nobo ku tin pa 2023 ku a keda aprobá den e kongreso Mundial di Little League.
Sharier Dorand di RBC Royal Bank, spònser di Little League ya pa 22 aña i un dje spònsernan grandi di e kampionato, a splika atrobe dikon e patrosinio di RBC ku Beisbòl Little League i e kampionato di Karibe. Ela hasi un súplika na e fanátikonan pa kòrda bai weganan i yega tempran, debí ku tin chèns ku Stadion Post 6 ta yena i lo no tin mas karchi. Dorand a bolbe gradisí e boluntarionan ku ta guía den Little League. Ela splika ku e trabou ei ta impagabel i huntu ku e spònsering di RBC i otro spònsernan ta kosechá e éksitonan di Little League. “E kampionato ta un oportunidat grandi pa e hóbennan ku ta partisipá pa por representá nos pais na un manera positivo riba nivel internashonal. Asina ku nan ta traha riba nan futuro i futuro di nos país.
Norval ‘ Payo’ Faneyte, direktor di e kampionato Latino Intermediate tabatin basta detaye tékniko di e weganan i skèdjel. Sr. Bishop den representashon di Minister di Deporte a hiba palabra na nòmber di Gobièrnu. Despues a sigui e sekshon di pregunta di Prensa.
Norval ‘Payo’ Faneyte ta direktor di e kampionato Latino di Intermediate. Ela duna splikashon di varios detaye.
