Sòftbòl Slowpitch - Kampionato Liga 60 a start djadumingu dediká na 3 baluarte

Kampionato Liga 60 a start djadumingu dediká na 3 baluarte

WILEMSTAD- Djadumingu 26 di mei tabatin apertura di kampionato Liga 60 ku ta dediká na 3 baluarte. Ta trata aki di baluartenan Nelson Candelaria, Irwin leito i Lionel Fransinet. Despues ku MC Wimbert Hato a yama ekipo, direktiva i baluartenan pa subi tereno, a sigi himno di Kòrsou. Orashon tabata na enkargo di Elvis Jacobus. A entregá un plaka na baluartenan i flor na kasa i famia di e baluartenan. A sigi speech di presidente di Liga 60 sr. Urvin Martina, blasnan a bai laria i a kanta playball pa wega number 2 di e kampionato. Nos tin e spich di e presidente i hopi pòtrèt di e apertura.

‍

Baluartenan i famia huntu ku presidente di Liga 60.

‍
“Bon tardi na tur hende presente. Ta un gran honor pa mi pa dirigí algun palabra na boso na okashon di e apertura di e di 11 edishon di Liga 60. Na promé lugá ta un plaser pa mi anunsiá ku e kampionato di 2024 ta dediká na algun persona ku a laga un marka inolvidabel den nos liga i deporte en general: Nelson “Candyman” Candelaria di Nos Power, Lionel Fransinet di Curaçao Super Stars i Irwin Leito di Sluggers. E hòmbernan aki no solamente a keda konosí pa nan habilidat deportivo, pero tambe pa nan dedikashon i amor pa e deporte ku a inspirá i kontinua inspirá hopi hende.

‍

Nos ta honrá nan legado i ta yama bo pa partisipá ku nos den rindi un gran homenahe na nan. E importansia di nos ku ta di 60 aña i mas no ta solamente ku ganamentu. E viktoria mas grandi ta e partisipashon mes. Pa nos, e esensia di Liga 60 no ta un hende ku ta gana na prome lugá, sino e hende ku ta mustra esfuerso, determinashon i pashon pa e deporte.

Nelson Candelaria ku su famia djadumingu na apertura di Liga 60.

Nos ta partisipá pa nos kurpa i mente keda sano i esaki ta e verdadero importansia. Aña tras aña, mayoría di nos akí no tin mas nada di demostrá. Nos a demostrá tur loke nos por demostrá durante e añanan pasá. Pero, partisipando nos ta mantené nos kondishon físiko i mental. Nos ta inkluí nos mes den e komunidat deportivo ku ta briya ku energia i vitalidat. Final, mi kier yama atenshon di tur nos fanátikonan.

‍

WEGANAN DI AWE

11.00 Nos Power - Los Amigos

13.00 Nos Tambe Power - Pitufos

15.00 Curacao Super Stars - Lions

Sluggers tin barwacht i Jaws ta liber.

‍

‍

Danki pa boso presensia i sostén kontinuo durante e henter aña. Bo ánimo i forsa ta inspirashon pa tur partisipante. Bo ta e pilar ku ta mantené e spiritu di Liga 60 bibu i vibrante.
Kompañá nos pa un otro aña di partisipashon, union i mas importante, salud i bienestar. Ku Dios bendishoná e Liga 60 i nos komunidat deportista.
Masha danki i nos ta spera un temporada di éksito pa tur hende.”