Kampionato Sòftbòl Liga 50+ dediká na Bobbel Hamson
WILLEMSTAD- Djasabra 18 di mei na Van Engelen Ballpark tabatin apertura ofishal di kampionato di Sòftbòl Maskulino 50+ ku ta dediká na Samuel ‘Sandy’ Hamson mihó konosí komo Bobbel. Bobbel Hamson ta forma parti di e ekipo Pitufos i promé ku e wega entre Pitufos i Artemisia djasabra último a duna Bobbel un homenahe. Sandy Hansen su kasa i demas famia tabata riba tereno pa risibí e homenahe serka direktiva di Liga 50 i presidente di Liga 50 Gilbert Keller a dirigí palabra. Pitufos a gana e wega aki kontra Artemisia ku skor di 10-1. Den otro weganan djasabra último Baranka a dal Catpower 7-1. Sluggers a derotá Lions 13-6 i finalmente Flamboyan Gamers a derotá Jaws 5-3.
Samuel ‘Sandy’ Hamson mihó konosí komo ‘Bobbel’ a nase 2 di novèmber 1956 na Kòrsou. Bobbel ta yu di nos Hall of Famer, Mr. Samuel ‘Sam’ Buntin, dfm.
E hungadó Bobbel:
Bobbel ku su 17 aña a kuminsá hunga Softball Fast Pitch Doble A den Rising Trotters.
Tambe Bobbel a hunga Baseball Klase A den Berson Braves i Randy Auto Sales.
Su último wega di komo hungadó tabata den aña 2023 den Softball Modified Slow Pitch 60+.
E manager, coach i trainer Bobbel:
Mas ku tur kos Bobbel ta un manager-coach-trainer den e mundu di Softball aki na Kòrsou. Ora su tata, e gran Sam Buntin, fundadó, manager i trainer di Rising Trotters, a kuminsá hala atras, Bobbel a sigui ku su trabou i tambe a kuminsá train e ekipo Malta Amstel di Boy Jansen.
Bobbel a manehá Malta Amstel durante tres temporada.
Tambe Bobbel a manehá e ekipo di Rising Trotters maskulino despues ku e ekipo a degradá pa Klase A. Den 2 aña di tempu e ekipo bou di maneho di Bobbel a logra subi bèk pa Softball Dòbel A. Ku e mesun Rising Trotters Bobbel a bira supkampeon di Kòrsou Softball Fast Pitch Maskulino. Na vários okashon a fungi komo coach den selekshonnan Fast Pitch pa representá Kòrsou na entre otro Argentina, Cuba, Puerto Rico i Bahamas.
Bobbel su aporte den Softball Slow Pitch, Pitufos i Liga 50:
Na aña 1982 Bobbel a kuminsá den Softball Slow Pitch ku Pitufos Softball Club.
Ku Pitufos Bobbel a bira kampeon tantu na Kòrsou komo den eksterior.
Ku 40 aña Bobbel a bai hunga den Liga 40 ku e ekipo di Rising Trotters i a titulá kampeon den un di e Torneonan ABC.
Ku 50 aña Bobbel a bai hunga ku Pitufos den Liga 50 na Chirino Ball Park i aki tambe ela titulá kampeon ku Pitufos den nan di dos temporada den Liga 50.
Awor ku Liga 50 ta hunga na Van Engelen Ball Park ketu bai Bobbel ta coach den e ekipo Pitufos. Na 2022 Pitufos a lanta su ekipo di Softball Slow Pitch 60+ i Bobbel a djòin nan komo coach i hungadó. 2023 Bobbel a disidí ku e ta kologá su wante komo hungadó aktivo.
Bobbel a gusta dediká su tempu na Softball, tantu na Softball Maskulino komo na Softball Femenino i tambe tantu na Softball Fast Pitch komo na Softball Slow Pitch.
Direktiva di Liga 50 a haña ku ta na su lugá pa dediká su Kampeonato 2024 na e personalidat Samuel Sandy ‘Bobbel’ Hamson , kende su forma trankil di atendé ku tur hende, su deportivismo sin buya, su amor pa i dedikashon na e deporte di Softball i e hecho ku tur wega e ta akompañá pa su señora komo gran fanátiko di Softball, ta un ehèmpel pa tur ku ta dirigí i praktiká e deporte di Softball Liga 50. P’esei nos ta dediká e Kampeonato 2024 na su persona. Danki Bobbel.
MAS INFORMASHON DI SÒFTBÒ I BEISBÒL
Fanátikonan di Deporte Kòrsou bon dia i felis wikènt. Pabien na selekshon Little League di Liga Pariba ku a gana e play-off den e divishon menshoná, ganando di Pabou ku skor di 9 pa 2 djasabra, 18 di mei den Frank Curiel Ballpark yen yen di fanátiko. E wega a bai relatívamente fásil kaminda Pariba for di inning number 1 komo ekipo di bishita a nota 4 kareda riba un hit di Xhaiff Franken kombiná ku un eror di Liga Pabou. Pabou no a logra nota mas ku dos kareda, ke mèn for di promé inning ya e wega tabata disidí. Naturalmente emoshonnan a subi entre fanátiko i téknikonan despues di wega riba tereno. Esnan ku no ta forma parti di direktiva, tékniko i hungadónan di Liga Pabou no tin nada di hasi riba tereno. Si permití subi tereno ta OK, pero e ora ei mester komportá.
* * * * *
Pariba ku e viktoria aki lo ta ekipo number 1 di Kòrsou i nan lo hunga prime time, esta 7’or di nochi den e kampionato di Karibe ku lo tuma lugá di 14 pa 21 di yüli den Stadion Post 6. E ekipo Pabou lo hunga e wega di 4’or i ku chèns di hunga solamente un wega 7’or di anochi den e buelta regular na momentu ku Pariba tin un dia liber. E ekipo lo kompetí den e Seri di Karibe aki repartí den dos pul. Un pul di 4 i un pul di 3 ekipo i e ekiponan ku ta den pul di 3 lo enfrentá otro na dos okashon. Paisnan ku ta partisipá den e kampionato di Karibe aki ta Aruba, Boneiru, Kòrsou, República Dominicana, Jamaica i US Virgin Islands. Keda pendiente pa mas informashon di Kampionato di Karibe di Little League i den dianan benidero nos lo tin mas informashon i djaluna 20 di mei tabatin e di 3 Podcast (Podcast Extra inning) den kuadro di e proyekto di Extra Curacao den kuadro di selebrashon di 20 aña ku selekshon Little League a bira kampion.
* * * * *
Nos tabatin tambe detaye di e otro selekshonnan ku lo biaha pa eksterior den lunanan yüni i yüli. Manera ta konosí Pabou a gana den divishonnan Intermediate, Senior i Minor respektivamente. Pariba a gana den Little i Junior. E promé selekshon ku lo biaha pa eksterior ta selekshon Senior ku lo ta di 21 di yüni pa 30 di yüni na Mayaguez (Puerto Rico). Despues ta sigi selekshon Intermediate ku lo ta na República Dominicana (Santo Domingo) di 23 pa 30 di yüni. Selekshon Junior ta na Nicaragua (Managua) di 5 di yüli pa 14 di yüli. Little League kampionato di Karibe ta na Kòrsou di 14 pa 21 di yüli. Ganadónan di e serienan aki lo representá Karibe/Latino Americano na Mundial na USA. Minor League ta di 26 di yüli pa 4 di ougùstùs na Mayaguez. Pa Minor League no tin Mundial.
* * * * *
Nos ta bai un ratu pa Sòftbòl Slowpitch i Beisbòl Veterano. Den Diamond All Stars League Asila Finies a empuhá 4 kareda pa Nos Goso gana pèrtá di The Fighters ku skor di 9 pa 8. E wega aki a tuma lugá djabièrnè na Sam Bunting Ballpark. Ku e viktoria aki Nos Goso a pasa pa semi-final kontra di ekipo Treasure ku a pèrdè kontra Rising Phoenix ku a pasa pa final. E wega entre Rising Phoenix i Treasure tambe tabata djabièrnè i Rising Phoenix a gana ku skor di 6-2.
* * * * *
Djasabra mester tabatin e wega semi-final entre ekiponan Nos Goso i Treasure. E wega a keda suspendé den pitu debí na protesta. Tur dos ekipo, esta Nos Goso i Treasure tabata riba tereno kaba i mester a para wega debí ku tantu Treasure komo The Fighters ku a pèrdè debí ku e wega mester a bai 2 ora segun nan i no un ora i mei. Den regla ta pará ku wega di semi-final ta bai dos ora. Pa loke ta page system no por konta e promé seri komo semi-final, e serinan ei no ta semi-final. Semi-final ta e seri promé ku e final. Ya. E regla ta laga buraku pa otro interpretashon i parse ku e dos añanan anterior a hunga page system ku dos ora di wega. By the way despues The Fighters a gana e protesta. Direktiva a saka un anunsio i bisa ku e prome buelta di play-off ta semi-final. Esei direktiva a saka den un flyer riba Facebook. Miéntras tantu Beisbòl Veterano a start djasabra i djadumingu tabatin apertura ofishal. Liga 50 a sigi na Van Engelen Ballpark. Kampionato di Liga 50 ta dediká na Samuel ‘Bobbel’ Hamson . Nos ta keda te aki pa awe. Te mayan ku Poder di Dios.
%20copy.jpg)
