WILLEMSTAD - Manera último añanan nos tin komentario di analista di Futbòl, Eldon ‘Pepi’ Sulvaran tokante moveshonnan di selekshon, Después di selekshon di Kòrsou a hunga dos wega rumbo pa Mundial 2026, nos tin e komentario di Pep Sulvaran.
BON KOMIENSO
‘Pantera Negra’ a kuminsá manera premirá e ruta pa mundial 2026 ku dos viktoria. Den futbòl gana ta e meta i esei nos a hasi. Pero si nos ta realista, e uniko mitar ku nos a hunga bon ta di dos mitar kontra Barbados. E motibunan ta, ku Advocaat aparentemente pa nòmber a pone Kuwas ku tin 6 luna sin klup mei mei den bolante i Juninho no tabata pasa e bala mei mei di tereno, perdiendo hopi bala ku akshon individual ku no ta produktivo.
Ademas Severina a start poko nervioso riba ala i no a funshona. Na Aruba komo suplente Severina a mustra poko di su klase ku un tremendo gol pa silensia e stadion i pa pone kandal riba e wega. E kambionan kontra Barbados, Felida pa Kuwas i Margaritha pa Severina a boltu e wega. E hubenil Rosario tambe a drenta bon. Esei tabata e uniko bon mitar kontra e numbernan 177 i 193 di mundu. Na Aruba kontra amateur, nos tabatin 68% posishon di bala ku apenas 2 gol, un den pitu.
Ban harma paso 2025 ta ‘Do or Die’
Sèptember otro aña nos mester ta den e grandinan. Ku 6 punto nos ta ku un pia den e buèlta final kaba. Gana Saint Lucia juni otro aña nos ta aden i lo hunga pa kabes di grupo ku tur probabilidat kontra Haiti riba kende nos ta lidera grupo C aworaki pa promedio di gol. Dos ekipo di kada un di e 6 gruponan lo klasifika pa bai forma 12 ku lo wordu reparti den 3 grupo di 4. E Ganado di kada grupo lo pasa dirèkt pa mundial. Di sèptèmber pa novèmber 2025 nos mester hunga 6 wega. E dos mihonan despues di e ganadonan di grupo lo hunga play-off interkontinental. Ke men ku 3 anfitrionnan aden kaba, CONCACAF lo tin entre 6 pa 8 representante na mundial.
Mester di refuerso
Den gol Room ta un siguransa. E ta e piesa mas importante di e selekshon. Brenet riba half ta un refuerso serio. Floranus ta sera e otro pia di half. E duo Martina i Gaari ta un pregunta ora kos bira serio. Nos por husa mas kompetensia den defensa. Bazoer (AZ), St. Jago (Willem II), Obispo (PSV), Sambo (Burnley) i Benita (Feyenoord) ta e opshonnan. Nan no ta bai yega ‘Oranje’. Bolante ta bon okupa mei mei di tereno ku e rumannan Bacuna, Roemeratoe, Felida i Rosario si e sigui krese. Si Chong bin, e por hunga tur kaminda den bolante i delantero. Riba ala ku Gorré, Margaritha i Severina, nos ta bon, paso por spera ku e dos ultimonan aki lo sigui krese. Kuwas mester buska un manera pa haña su forma bèk.
E mester kuminsa buska un klup. Tin Martha tambe si e skoge definitivamente pa nos. Nos ta spera ku Sontje Hansen, otro hoben talentoso lo logra si e ta ambishona selekshon ulandes, pero ta mire difiisil. Ku su edat, ya e mester ta regular kaba den un klup grandi. Na NEC e no a logra bira estelar indiskuti. E lo ta un refuerso sigur i lo ta mas ku bon bini. Sentro delantero si ta un problema hopi serio. Janga ja tin 32 aña i Locadia mester mehora di e ultimo añanan. E tin e kapasidat. Mester wak kon ta hala Živković i Robertha aden atrobe. Nan ta mas hoben i lo oumenta e kompetensia pa e puesto di punta di lansa. Kompetensia den selekshon ta tene tur hende skèrpi. Mester di mas hungado di kalidat, paso e weganan otro aña lo ta di un nivel mucha mas haltu ku aworaki. Mester di un aserkamentu mas agresivo ku of sin Advocaat i su grupo. Mester bisa si ku e ambiente den selekshon ta mustra bon, organisa i disiplina awor. Esei ta un adelanto. Pero mester wak e formula pa sobra drenta e kura blou ku hel. Sin mas hungado nos no ta bai yega.
Bara di Pantera Negra
Laga nos spera ku den tur e hopi weganan ku ta bai bin, nos selekshon por sigui konta ku e ‘bara’ (grupo) di fanatiko ku a domina e stadion na Oranjestad tambe. Un danki na e grupo di ferviente fanatiko aki ta na su luga. Nan ta yuda sigur. Esei bo por ripara na reakshon di e hungadonan tambe. Despues di kada gol di nos i ora wega kaba e hungadonan ta bai mes ora den direkshon di e grupo di fanatikonan fiel aki ku ta animanan ku nan barinan i nan chapinan, ku ta algu tipiko di nos dushi Kòrsou. Pa nan tambe meskos ku nos tur, e soño di mundial mester bira un realidat. Pensa so ku e baranka chiki di nos aki komo e pais mas chikitu hamas den un mundial. Kere den e soño. Den 2025 tambe, Kòrsou ku a kuminsa e ruta aki ku dos viktoria, mester sigui bati manda mondi!!
Eldon ‘Peppie’ Sulvaran.
%20copy.jpg)
