Komentario di Pepi Sulvaran: "Ani ku kran e selekshon aki no ta progresá
SELEKSHON GANÁ 1 -0 NA DI 38 MINUT VVS GRENADA (14-10-24)
E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbol di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
A NI KU KRAN E SELEKSHON AKI NO TA PROGRESA!!
Otro prestashon bow di nivel
Otro prestashon defraudante di nos selekshon. Durante e rueda di prensa di Advocaat promé di sali pa St. Lucia, a bisa ku e grupo ta motivá i inspirá. Awor ta mustra ku Advocaat tabata ke men ‘The Spice Boys’ di Grenada. Nos selekshon a bolbe hunga sin deseo pa gana. Bo ta kuminsá puntra bo mes si nan tin afinidat ku nos isla. Paso lucha pa kada meter manera Grenada a hasi ku alma i kurpa, sigur nos no a demonstrá. Al kontrali. Grenada tabata mihó ku nos den tur sentido. Sino ta pa Eloy Room i e lata vertikal nos lo a pèrdè por lo menos 3-0. Ta manera un ángel chikitu tabata riba nos pali gol, ku nos por tin poko speransa. Nos ta dependé kompletamente di St. Lucia i Grenada pa yega ‘Kopa di Oro’ i alkansa Liga A di CONCACAF.
Eskohensia sin pia ni kabes
Kastaneer for di mei 2024 no hunga niun wega di bala, esei ta 6 luna pasa. E no tin ni klup. Kon ta posibel ku ela kuminsá komo punta di lansa. E no tin ritmo di wega. Ta manera e no tabata sa kiko pa hasi i tabata pèrdè tur bala. Mi ta supone Janga ta leshoná. Kon ta posibel ku nos ta bai hunga un wega importante ku Janga so komo úniko sentro delantero. Van den Hurk i hasta Arias si ta aktivo riba di dos nivel na Ulanda i Suesia respektivamente. Arias por sierto tin bon fisika. Martha ku ta hopi delega den bolante kontra un ekipo fisikamente fuerte ta puntra pa problema. E no por a wantanan fisikamente.
Nos sa ku isla Ingles ta hunga ‘vechtvoetbal’, ku aksento riba forsa i menos riba téknika. Comenencia pa su fisika i Souren ku Felida pa nan sakrifisio i entrega lo tabata mihó eskohensia. Defensivamente Martha no tin peso mei mei tereno. Juninho ta un historia apart. Ta parse ku ora nos hunga ku Juninho nos ta hungando kontra 12 kontrinkante. No ta aworaki, ta basta tempu e ta hunga su mes wega di no laga e bala bai i skak te ora e pèrde. Kisas e tabata un bon futbolista un tempu, pero den selekshon kada be e ta mustra egoisimo i ta lubidá ku futbòl ta wega di konhunto. Mester a sake for di half time. Ta tempu pa pone sinta i spliké ku ta un mitar e ta haña i si e no pasa e bala, ta sake for di wega. Ta kontra nos e ta hunga tur be i mata e wega mei mei di tereno. Anto ora porfin e pèrdè e bala, hopi be e ta kometé infrakshon i peligrá nos arko. Anto rabia ora sake. Inkreibel.
Room, Carolina, Leo Bacuna i Gorré akseptabel, sobra malu
Room (8) tabata e mihó hungadó i a skapa nos sigur na 3 okashon. Carolina (6) a hasi su trabou. Gaari (4) ta bon kla ku e no ta defensa sentral. E no ta para bon riba tereno i mester di muchu infrakshon pa para e kontrinkante, kual ta krea peliger pa nos. Brenet i Floranus ambos un 5. E kombinashon Brenet i Margaritha no a funshoná, Nan no ta kompronde otro i Floranus no tin e pia robes pa avansa bon riba links. Defensivamente e no tabata malu, pero no a aportá ofensivamente. Leo (7), tabata konsistente, pero e so no por a karga e bolante. Martha (4) no tabata presente riba tereno. Margaritha (4), a presta lew for di lokual nos a kustumbrá último tempu. Kisas paso ela baha di nivel bai hunga na Merka den divishon mas abou. Gorré (6) aunke e tampoko a alkansá su nivel, tabata e úniko hungadó ofensivo ku a krea poko peliger. Juninho (3) malu mes. Meskos Kastaneer (3). Kuwas ku Zimmerman a drenta bon i sigiente wega lo ta bon pa duna nan mas tempu. Kuwas semper ta peligroso pa su tiru i e tin eksperensia i Zimmerman su velosidat ta un arma.
Bicentini no i Advocaat si?
Nos ku rason a baha riba Remko día ela pèrdè ku St. Kitts ku ta ubiká na puesto 141 riba ranking di FIFA. Awor, Advocaat i su staff di penshonadó a pèrdè punto ku St. Lucia na puesto 164 i Grenada mas abow ahinda na 173. Ambos ta kasi 90 puesto mas abou ku nos. Remko su tata ta Mooi Bicentini i e tabatin dos hoben yu di tera ta yudé Zinho i Lennox. Ku rason a interveni, paso tòpsport ta resultado. Pa straño ku por zona ta papia di alargá e grupo di ansiano ulandes aki. Dikon? Si nos gana tur nos tres weganan yega 13 punto i St. Lucia i Grenada trompeká nos tin un chèns. Nada no ta den nos man mas. Kaminda un hungadó di nos so, por ehèmpel Brenet of Juninho kada un apart so kaba, ta kosta mas ku hinter e ekiponan di Grenada i St. Lucia parew. Tristu. Pero speransa no ta kos di pèrdè i ‘Pantera Negra’ ta di nos tur.
