Komentario fuerte di Pepi Sulvaran riba maneho i posibilidatnan di selekshon di Kòrsou di Futbòl
WILLEMSTAD - E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbol di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
ADVOCAAT & CO NO POR HAÑA HUNGADO PA NOS
Su tempu a pasa día bieuw
Nos a tira un bista riba e lista di hungadó pa selekshon pa e próksimo weganan e luna aki. Tin hungadó amateur hopi veterano ku ta hunga riba di kuater nivel na Ulanda ahinda den selekshon i hasta hungado ku tin shete luna sin hunga bala mes. Tur esnan ku a i ta kere den e chiste ku un entrenadó di hopi edat i su amigunan penshonadó lo bai manda nos na un nivel mas haltu, no sa kiko nan ta hasiendo. Na promé lugá tur hungadó profeshonal na Ulanda sa ku esaki ta un grupo di edat hopi haltu i sigur no ta normal den futbòl profeshonal pa tin tantu hende ansiano asina den un kuerpo tékniko. Ei so kaba nan sa ku no ta kos serio i ta mira e kos mas bien pa lokual e ta. Komo un grupo di amigu ku a bin gana plaka. Di bèrdat nos ta kere ku e grupo aki ku diferente integrante den kareda di 80, lo bai drenta trein, auto òf avión pa bai papia ku kandidatonan potensial? Ta manera nan mes a bisa message nan ta manda. Pesei tin hungadó ku rason no ta ni reakshoná.
No tin un sentro delantero den selekshon
Aparentemente sin sentro delantero nos ta pretende di bai ‘Kopa di Oro, i mundial. Asina aki ni mundialstraat nos no ta bai yega. Apesar ku tin e insentivo di por yega un torneo mundial grandi manera ‘Gold Cup’, ni esei no a yuda Advocaat i kompania pa por haña hungadó di mas nivel. Janga ta leshoná i Kastaneer no por ta un opshon serio, pa e simpel echo ku for di mei e no a hunga bala mes i ta hasta 7 luna sin klup. Ni van den Hurk (Helmond Sport) ni Arias (Köge) kendenan ta hunga riba di dos nivel na Ulanda i Dinamarka respektivamente, nan no por kombensé pa bin hunga dos wega determinante pa por pasa pa un torneo grandi. Ta kon nan ta bai konbensé e mihónan ku ta bin na remarke, si niun te ahinda no ta tuma nan na serio. Esaki ta un realidat ku no por ninga. Hinter e kuenta ku si Advocaat bin e ta trese hungadó a resultá di ta un farse. Livano Comenencia sigur ta un talento, pero e no ta establesé ahinda i ta hunga den junior riba di tres nivel na Italia. Ku e ta un bon forsa i mester ta estelar ta sigur, pero no por spera di dje ku e ta bai karga e ekipo. Por sierto nos a komprondé ku ela kumpli ku deseo di su famia pa kual nos mester ta gradesido. Ahinda e por kambia si, paso bo por hunga te ku 3 wega pa un país sin strobabu di skoge pa otro después di bo 21 aña. E ta refuerso sigur pa nos den bolante, maske e ta un hubenil.
Pone elekshon pa e miembronan disidí ruta di ‘Pantera Negra’
E komishon ku FIFA a instalá sin konosementu di e problemanan real den nos futbòl, mester pone elekshon mas pronto posibel. No menos ku 5 hurista lokal a kondená e prosedura ilegal ku a sigui pa por boikotiá e elekshon i a ratifiká ku e ‘screening’ di kandidato debidamente a bai según reglanan aplikabel. FIFA a malhusá su poder pa te na final keda sostené esnan ku a hera mata futbòl. Di un organisashon korupto manera FIFA esei no ta straño. Korupshon ta un forma di bida di FIFA, pesei nan ta korumpí hasta nan propio elekshonnan pa por ehèmpel direktiva of sedenan pa mundial. E huristanan ku a konfirmá ku e proseso di screening ta kompletamenmte legal i a deskwalifika e aktuashon di esnan ku si a viola regla, ta un konfirmashon ku no mester di kana e kaminda di nobo. Pone mester pone fecha pa elekshon i hala kita. E kos no ta di bosnan, pero di e klupnan di futbol afilia na FFK. Asina tambe nan por reuní mas pronto posibel i determiná e futuro rumbo di e selekshon. No tuma desishon pa ku selekshon ku ta mara miembronan di FFK, paso ta ‘demisionario’ bosnan ta.
Mester por yega Merka 2025
Apesar di tur esaki, hasta ku e hungadónan aktual, no mester ta problema pa sali viktorioso di e dos weganan benidero, basta hasi esfuerso i ku sosten di e fanatikada fiel di nos selekshon. Pero mester kuminsá pensa riba e futuro serkano for di awor.
PANTERA NEGRA TIN 3 PROBLEMA SERIO (1)
Mester enfrenta realidat
Tin un dicho ku ‘esun ku papia bèrdat no ta haña stul pa sinta’. Sera wowo pa realidat no ta opshon basta por substansia argumentu ku echo. Realidat ta ku ta bayendo hopi malu ku nos selekshon. Ni siegu no por ninga esei. No solamente nos ta kayendo riba ranking di FIFA manera chumbu, pero bou di Advocaat i su grupo di edat hopi haltu, nos a yega e punto di mas abou den historia di nos futbol, di Korsou i Antia Ulandes. Nos a presta di pèrdè punto ku dos di e ekiponan di mas malu di nos región. Paisnan ku ta 80 pa 90 luga mas abou ku nos. Paisnan di cricket kaminda apenas hende ta bin wak futbòl.
Pa es ku no sa, antes nos no tabata ni hunga ku e islanan aki, pasobra nan no tabata yega kaminda nos ta. Te ku añanan 80 ku mi tabata ku selekshon bou di Edmundo Confesor, ta nos, Haiti ku Trinidad tabata manda den Karibe ku hungado manera Raymond Lucas, Frensel Calmes, Bayena Clemencia, Bartje Koots, Rogelio ‘Zot’ Delfina i ‘Bazjot Godfried pa nombra algun. Ni Jamaica no tabata konta e tempu ey. Promé ku esei, Jong Colombia tabata rekonosé den nos región i mas atrás, ku Ergilio Hato, Wilhelm Canwordt, Dagadan i otronan nos tabata wòrdu teme hasta den Sentro Amerika.
Pa aworaki nos ta sinta kome uña den lastu minutnan kontra Grenada ku si no ta pa e echo ku e bala di Juninho a dal den defensor i sorprendé e kiper i San Martin Franses ku no ta ni riba ranking di FIFA a gana St. Lucia, nos posishon aworaki lo tabata kasi imposibel.
Un staf tekniko di hopi edat
Ta mas ku kla ku e kuerpo aki no ta bisa hungadó hóben nada i no por motivá e selekshon. Tur wega bou di nan, e selekshon a deslusiísin inspirashon i deseo pa gana. Kontra San Martin, ku ken ku ta riba banki nos lo a gana. Ta ridíkulo pensa ku den un deporte dinamiko bo por trese kuater hende ansiano den bo staff i spera resultado. Si Advocaat tabatin algu di éksito den pasado, ta pasobra ela hañe ku bon hungadó. Realidat ta ku for di 2009 e no a dura serka niun ekipo. Esei no ta pornada, pero pa falta di resultado, paso den tòpspòrt, otro for di aki, resultado so ta konta. Bèlgika (oktober 2009-april 2010); Rusia (1 di yüli 2010) algu mas ku 1 aña; 2021 PSV (ménos ku 1 aña); Serbia (yüli 2014 pa novèmber 2014); Sunderland (mart 2015 pa òktober 2015); Fenerbache (sèptember 2016 pa mart 2017); Ulanda (mei 2017 pa febrüari 2018) no a logra klasifiká Ulanda pa mundial 2018; Sparta (desèmber 2017 pa mei 2018) a degrada ku Sparta; Utrecht (sèptember 2018 pa oktober 2019); Feyenoord (oktober 2019 pa mei 2021); Irak (yüli 2021 pa november 2021) aki tambe a para kontrato pa falta di resultado; ADO (novèmber 2022 pa maart 2023). Na 1994 Advocaat ku Ulanda a yega lastu ocho na mundial i na EURO 2004 a yega kwartfinal. E tabatin hungadó si manera Bergkamp, Overmars, Rijkaard, Winter, Koeman, Frank de Boer, van de Sar, Stam, Davids, Seedorf, Snijder, Kluivert, Robben i van Nistelrooy. Hungadó di nivel ta tur kos. Advocaat komo entrenadó nashonal di Emiratonan Arabe, Sur Korea, Bèlgika, Rusia, Serbia i Irak, niun no tabata eksitoso. Si nos ta kere ku un entrenadó ku 20 ku 30 aña pasa a kosechá un tiki eksito ku selekshon Ulandes ta bin aworaki ku ‘brothernan’ di edat sumamente haltu bin trese eksito ta simplemente ridikulo.
Kon asina bon?
Después ku nos a pèrdè ku St. Lucia i promé nos enfrenté Grenada den konferensia di prensa bande Advocaat, e presidente di e komishon aktual a bisa ku kos ta bai bon i nan ta kontentu ku Advocaat i su grupo. Ban serio of nos a wak diferente wega?
Ta spònser ta manda den FFK?
Ta ser bisa ku si Advocaat bai spònser tambe ta bai. Awèl pa keda soportá berguensa, mihó nan ku Advocaat tur dos hala kita. Despues di desèmber te yüni tin wega importante atrobe. Sufisiente tempu pa buska un kuerpo mas hoben i dinamiko pa guia nos selekshon i pa buska spònser si mester. Si Advocaat keda mes, e no por keda ku amigunan, mester buska hende serio.
Ki falta nos?
No por konvense mi tampoko ku aki no tin dòkter pa nos selekshon, ku mester laga Advocaat bin ku amigu mes ansiano ku ne ku ta hasta retirá biba Spaña i tampoko por konvense mi ku no tin relashonista póbliko na Korsou ku ta papia nos lenga además di Spaño i Ingles ku ta e lenganan dominante den CONCACAF ku mester a bin ku otro ansiano Ulandes ku no ta papia nos lenga ni Spaño i podise Ingles tampoko manera van Gaal i Ten Hag. Den otro artikulo lo mi trata e problema di sentro delantero i defensa sentral. Mester yena e tobo si otro luna.
