Kòrsou a risibí nos kampionnan Mundial di Senior League den gran forma

Nos tin estadistika i hopi portrèt

WILLEMSTAD- Djaluna den oranan di atardi e selekshon kampion Mundial di Senior a yega Kòrsou i a keda risibí pa hopi hende i fanátiko na airport. Minister i parlamentarionan a bini na gran kantidat na aeropuerto pa risibí e selekshon. Tabatin sakamentu di pòtrèt na salida ku henter e delegashon i despues ku tur e muchanan di Liga Pabou, pues Minor, Little i Junior ku tabata presente.

Despues a sigi un parada di airport pa Brionplein pasando riba Roosveltweg sigi riba e ruta tradishonal di Karnaval. Kantu di kaminda tabatin un bon públiko ku tabata apoyando e selekshon Senior riba trailer i e otro selekshonnan di Liga Pabou riba e London Bus patras di e trailer.

Na altura di viadukto den Breedestraat (O) miembronan di selekshon Senior i tur e otro hungadónan kompañá dor di e diferente Missnan i Ministernan di Gabinete Pisas II a baha i baila riba ritmo di DJ Argenis Huerta, ku tabata riba e trailer di músika rumbo pa Brion Plein. Na Plasa Brion a kampionnan a keda risibí pa un públiko enorme ku hopi animashon.  

Despues a sigi introdukshon di MC Rignald Maduro, invokashon di Pastor Julio Gonzalez i Himno di Kòrsou interpretá pa Juliette de Leeuw. Siguidamente speech di e..o. Presidente di Liga Pabou Eugene Sambo, Presidente di Curacao Little League Foundation drs. Lucas Beaujon, Managing Director di RBC Royal Bank, spònser di Little League ya pa 23 aña, sr. Pierot Hurtado,  speech di Minister di Enseñansa Siensa, Kultura i Deporte sr. Sithree van Heydoorn i di Promé Minister sr. Gilmar Pisas. Despues a sigi entrega di medaya dor di Sosiedat di Komersiantenan di Otrabanda i finalmente ku entrega di medaya dor di Ministernan.