Kòrsou kontra Meksiko den Intermediate 10’or am djabièrnè i Kòrsou vs Republica Dominicana den Senior 1'or pm
WILLEMSTAD- Selekshonnan di Kòrsou ta moviendo den gran forma aya na Puerto Rico i República Dominicana. Selekshon Intermediate lo hunga djabièrnè mainta 10’or kontra di Meksiko. Den e otro seri pa loke ta trata Intermediate Venezuela lo topa ku República Dominicana. Den Senior Kòrsou lo hunga 1’or djabièrnè 28 di yüni kontra di Republica Dominicana. Weganan di Senior ta transmití pa Deporte Aktivo Live via Facebook i TC fm 93.3 . Weganan Junior via La Javilla Network via You Tube.
MAS INFORMASHON DI BEISBÒL I SÒFTBÒ
Fanátikonan di Deporte Kòrsou bon dia. Nos ta den gara, di fiesta e dianan aki ku Futbòl di Kopa Europa, Kopa America, Latino Intermediate i Karibe Senior. Naturalmente Beisbòl lokal i Beisbòl MLB. Sinta na kas trankil wak wega na televishon òf por bishitá un establesimentu horeca ku ta saka nan dia mihó e simannan benidero. Naturalmente nan ta pidi pa ekiponan popular na Kòrsou manera Hulanda, Brasil, Argentina, Colombia i Venezuela keda den kompetensia mas tantu posibel. Ora Hulanda òf Brasil ta hunga ta un kos serio aki na Kòrsou ku ta paralisá kasi kompletu.
* * * * *
Naturalmente aki aya mamamentu di gai, Brazil, Argentina, Hulanda, Alemania, Fransia, Colombia ets. Laga nos ban mesora pa Beisbòl Little League, den e kaso aki nos selekshonnan di Intermediate na Santo Domingo (Republica Dominicana) i Senior aya na Mayaguez (Puerto Rico). Selekshon Intermediate i selekshon Senior tabatin 4 ganá i 0 pèrdí te ku weganan di djaweps i a klasifiká pa semi-final. E wega di djaweps a keda suspendé pa motibu di awaseru i mal estado di tereno. Intermediate a gana Republica Dominicana ku skor di 4-3 djaluna i Colombia djamars ku skor di 15-1 i Aruba 8-0. Selekshon Intermediate tin vários hungadó ku na 2023 a hunga final di Little League World Series manera Alexander Provacia, Shemar Jacobus, Jaydlin Wiel, Nassir El Osais, D-Shawn Winklaar, Nathan Nahr, Helmir Helmijr, Yeadon Lourens – Martie, Juan Ramon Cleto Ferreras ets. Intermediate ta move bon aya na Republica Dominicana. Tene kuenta ku e selekshon aki tabata na un straik di keda eliminá na Kòrsou i mira nan aki ku dos viktoria na Republica Dominicana. Kosnan ta pasa den Beisbòl i deporte tin ora ku bo no por splika.
* * * * *
Ban pa selekshon di Senior Pabou ku a gana dos wega stret. Djadumingu Senior a gana República Dominicana ku skor di 7-4 i djaluna di Aruba ku skor di 9-8. Wega ku nos tabata atras 4-1 bayendo di 7 inning komo ekipo di bishita, nos ta nota 8 kareda den di 7 inning i Aruba a kontestá bèk ku 4 kareda i keda kòrtiku ku skor di 9-8. Djamars den oranan di atardi bai kue anochi nos a hunga kontra Puerto Rico i dado momentu manager di Puerto Rico a baha su muchanan for di tereno i wega a keda suspendé basta ratu. Wega tabata den di 8 inning na momentu ku e para e wega. Kòrsou a laga Puerto Rico den tereno den e wega ei ku a dura 2 ora i 50 minüt. Kòrsou a gana Manati (Puerto Rico) ku skor di 3-2 riba un mal tiru di kècher di ekipo Manati. Tabatin un toke di Izion Mogen den Tie Break di 9 inning. Zazil Schoop ku tabata kore na segunda a kore bai home i nota e kareda di viktoria pa Kòrsou. Kòrsou Senior a gana Virgin Islands 18-0.
* * * * *
Awe nos tin resultadonan di Liga 50. Standing di Liga 50 ta lo sigiente: Baranka/Sharks 5-0, Pitufos 5-1, Marlins 4-2, Jaws 3-3, Ban Serio 3-3, Sluggers 2-3, Flamboyan 2-3, Arthemisia 2-4, Lions 1-4 i Catpower 1-5. Antes nos por a duna average di e lidernan di ekipo, pero aworaki nos por wak esei via game changer ku pa kolmo abono a bira mas karu pa aña (inkreibel). Nos a bai buska algun sifra individual di algun hungadó i e sifranan ei tampoko no ta up to date. Djasabra awor ta kandela tin na momentu ku Pitufos (5-1) lo topa ku Baranka (5-1) i Marlins ku tin rèkòrt di 4-2 lo topa ku Flamboyan (2-3). E skema kompletu ta 10.00 Sluggers – Arthemisia, 12.00 Ban Serio – Lions, 14.00 Pitufos – Baranka, 16.00 Marlins – Flamboyan.
%20copy.jpg)
* * * * *
Dia di Bandera lo tin weganan di Liga 70 na Frank Curiel Ballpark. Rudy Brunken ta invitá tur hungadó 70 plus pa asina por hunga dos partido. Si tin mas ekipo lo hunga un wega mas. Rudy ta pidi pa tur hungadó kita bandera di ekiponan di Futbòl ku ta hungando den Copa America i Eurocup i pone bandera di Kòrsou na nan outo. Masha tempu no tabatin aktividat di Liga 70, pero nos ta kere ku mester laga 68+ i 69+ tambe move den Liga 70, p’asina e liga por bira un kos serio i por organisá un mini kampionato òf torneo. Nos ta keda te aki pa awe i te mayan ku Poder di Dios.
